Ertaga O'zbekiston superkubogi-2016 uchun o'yin bo'lib o'tadi. Uchrashuvga qiziqish katta ekanligi o'z-o'zidan tayin. Chunonchi, muxlislarimiz bunday o'yinlarni ancha sog'inib qolishgan. Garchi ayni kunlar Toshkentda futzal bo'yicha Osiyo chempionati ham davom etayotgan bo'lsa-da, tan olaylik, futbolning o'rni baribir, boshqa-da. Nima dedingiz?
O'YIN HAQIDA
Aslida superkubok bahsi har qanday davlatda muxlislarni g'oyat qiziqtirishi muqarrar. Chunki bunday o'yin o'tkaziladigan vaqt mavsum hali boshlanib ulgurmagan va ishqibozlar katta futbolni qo'msab turgan bo'ladilar. Ammo superkubok bahsi har doim ham kutilganidek, sermazmun kechmasligi mumkin. Chunki jamoalar mavsumoldi tayyorgarligidan o'tayotgan va hali to'liq shakllanib ulgurmagan bo'ladilar. Xullas, jamoaviy o'yin to'liq yo'lga qo'yilmagan va yangi futbolchilar moslashish jarayonini boshdan kechirishayotgani sababli, ularning harakatlari qovushmay qolishi ehtimoli bor. Shunday ekan, xatolar ko'zga tashlanishi, kutilmagan natijalar qayd etilishi hech gap emas. Ammo bir narsani aniq aytish mumkin - superkubok uchun kurashda har doim yuqori shiddat ufurib turadi. Axir kim ham mavsumni sovrin yutish bilan boshlashni istamaydi?
TARIX
Endi biroz tarixga to'xtalsak. Joriy yilgi superkubok bahsi o'zbek futboli uchun hisob bo'yicha to'rtinchisidir. Xabaringiz bor, bizda aslida chempion va kubok sohibi o'rtasidagi to'qnashuv uzoq 1999 yildayoq yo'lga qo'-yilgan edi. O'shanda Namanganning «Navbahor» va Toshkentning «Paxtakor» klublari o'zaro to'qnash kelishgan. Bahs Farg'onadagi stadionda bo'lib o'tgan. Keyin, bu o'yin hozirgidek qish emas, balki 29 avgustda tashkil etilgan. Qiziq holat, shunday emasmi? Xullas, o'zbek futboli tarixida ilk bora o'tkazilgan superkubok bahsida namanganliklar 4:2 hisobida g'alabaga erishib, ilk g'olibga aylanganlar. Biroq nima uchundir shundan so'ng superkubok to'qnashuvi to'xtatib qo'yildi. Muxlislar chempion va kubok sohibi o'rtasidagi navbatdagi to'qnashuvni roppa-rosa 15 yil kutishga majbur bo'ldilar...
YaNGI SOVRIN
Faqat, 2014 yilga kelib superkubok bahsi qayta yo'lga qo'yildi. Balki yangi kubokni yasashga shuncha vaqt ketgandir, ehtimol, oradagi uzoq uzilishning boshqa sabablari bordir, bunisidan bexabarmiz. Bilganimiz shuki, qayta tiklangan superkubok bahsining ilk ishtirokchilari «Bunyodkor» va «Lokomotiv» klublari bo'lishdi. Bu jamoalarning o'zaro qarama-qarshiligida «qaldirg'ochlar» 2:1 hisobida g'alabaga erishdilar.
«Lokomotiv»ning yulduzli onlari oradan roppa-rosa bir yil o'tgach keldi. Esingizdadir, avvalgi mavsum arafasida Vadim Abramov boshchiligidagi «Lokomotiv» chempion - «Paxtakor»ga qarshi maydonga tushdi va kuchli raqib darvozasiga javobsiz 4ta gol urishni uddaladi. Bu Abramov va o'sha «Lokomotiv»ning darhaqiqat, eng yulduzli damlari edi. Keyin voqealar qanday rivojlanganini esa eslab o'tirishning hojati yo'q. Chunki bu maqola «Loko» emas, superkubokka bag'ishlangan.
NAVBATDAGI SUPERKUBOK
 Mana, endi yana superkubok o'yinini tomosha qilishga chog'lanmoqdamiz. Qiziq tomoni, joriy mavsum ushbu sovrinning yangi egasini ko'rishimiz aniq. Chunki na «Nasaf» va na «Paxtakor» shu vaqtga qadar superkubokda g'alabaga erishgan. Agar «Nasaf» bunday o'yinda hali biror marta maydonga tushmagan bo'lsa, «Paxtakor» superkubok uchun ikki marta kurash olib borgan va har safar alamli mag'lubiyatga uchragan. Yana bir qiziq jihat - «Paxtakor» har ikki o'yinda o'z darvozasidan 4tadan gol qo'yib yuborgan: 1999 yili «Navbahor»dan (2:4), 2015 yili esa «Lokomotiv»dan (0:4). Ko'ramiz, bu yil «sherlar» ushbu qora an'anani buzishadimi yoki yana davom etishiga to'sqinlik qilolmaydilar...?
Endi jamoalarning ayni vaqtdagi holatiga to'xtalib o'tsak. Har ikki klub ham mavsumga jiddiy tayyorgarlik olib bormoqda. Ammo bu borada klublardagi vaziyat bir xil emas. Masalan, «Paxtakor»da avvalgi moliyaviy barqarorlikka biroz putur etgan ko'rinadi, klub hattoki, xorijda o'tkazilishi rejalashtirilgan bitta yig'inni bekor qildi. «Nasaf»ning esa yaqinda BAAga       borib kelganini nazarda tutsak, bu masalada qarshiliklarda muammo yo'q, chog'i.
TARKIBLAR
Tarkib borasida esa, mavsum oldidan odatiy tarzda bo'lganidek, har ikki klubda bir qator o'zgarishlar amalga oshirildi. «Nasaf»dan Shohruh Gadoev  ketdi va Kenja To'raev bilan ham xayrlashilgani xabari chiqdi. «Paxtakor»dan esa Kaxi Maxaradze, Egor Krimets va Aleksandr Lobanovning o'z faoliyatlarini boshqa klublarda davom ettirishlari tayin. Albatta, bu o'zgarishlar jamoalar o'yiniga ta'sir o'tkazishi turgan gap. Ammo ta'sir ko'lami turlicha bo'lsa kerak. Masalan, Gadoev va To'raev so'nggi mavsum «Nasaf» o'yinida deyarli ko'zga tashlanmagandilar. Kaxi Maxaradze esa «Paxtakor»ning «motori» vazifasini bajardi. Shularni inobatga olib, o'zgarishlar qaysi jamoaga qay darajada og'ir botishini taxmin qilish qiyin emas. Aytaylik, «Paxtakor» Maxaradzening o'rniga Azim Ahmedov va Suhrob Berdievni taklif etdi. Bu futbolchilarning imkoniyatlaridan kelib chiqib aytsak, «sherlar»ga yangi mavsumda oson bo'lmasligi turgan gap.
Ammo «Nasaf» tarkibida ham muammolar etarli. Masalan, qarshiliklar sira ham yaxshi legionerga yolchimayaptilar. O'tgan yili Roy Rok binoyidek o'ynab turgan edi, keyin salomatligi talabga javob bermasligi ma'lum bo'lib qoldi. Bu yil «Nasaf» murabbiylar shtabi yana Bolqon yarimorolidan legioner qidirdilar va Deyan Bolevichni topdilar. Bu futbolchi yig'inlar chog'i o'zini ko'rsata oldi, «Xenan»ga qarshi kechgan nazorat uchrashuvida gol ham urdi. Ammo bitta masalada Deyanning ham omadi kelmadi - «Futbol-Med»da tibbiy ko'rikdan o'tolmadi. Bu yaxshi bilamiz, har qanday futbolchi uchun «bo'ri pattasi» demakdir.
TERMA VA SUPERKUBOK
Ammo superkubok o'yiniga ta'sir o'tkazadigan jihatlar faqat klublar bilan bog'liq emas. Yana shunday tash-qi omillar ham borki, ularga birrov e'tibor qaratsak.
Taqdir taqozosi bilanmi yoki PFLdagi taqvim tuzuvchilar shuni istashdi, bunisi bizga noma'lum, ammo superkubok bahsi nima uchundir O'zbekiston milliy jamoasining BAAda olib borgan yig'ini bilan ketma-ket joylashtirildi. Ya'ni termamiz Amirliklardan qaytib kelgani hamono, oradan ikki kun o'tar-o'tmas, superkubok bahsi boshlanadi. Boz ustiga, O'zbekiston milliy jamoasi 14 fevralda Livan termasiga qarshi o'rtoqlik o'yinida maydonga tushganini inobatga olsak, bu holat «Nasaf» va «Paxtakor»ga ancha noqulaylik tug'dirishi mumkinligini ko'ramiz. Ayniqsa, «Paxtakor»ga, chunki bu klub tarkibidan oz emas ko'p emas, 7 nafar futbolchi jamoa tarkibiga jalb etildi. «Nasaf»dan esa faqat 3 o'yinchi BAA safariga borib keldi. Bu albatta, terma jamoa yig'ini qarshiliklardan ko'ra, toshkentliklarga ko'proq muammo tug'dirishi mumkinligini bildiradi.
Boz ustiga, «Nasaf»ning 3 nafar futbolchisidan biri - darvozabon Eldor Suyunov. U yig'inda juda ko'p kuch yo'qotmagandir. Harqalay, darvozabon o'yin chog'i 90 daqiqa yugurmaydi-ku. «Paxtakor»dan termaga chaqirilgan barcha futbolchilar esa maydonda to'p suradigan o'yinchilar. Shunday ekan, kimga qancha yuk tushishini chamalab olavering.
Davomi InterFUTBOL gazetasi blogida.
— deya xabar beradi uff.uz nashri.