O'zbekiston terma jamoasi bosh murabbiyi Xose Mendez Osiyo chempionati chorak finalida Iroq ustidan 3:0 hisobida qozonilgan g'alabadan so'ng matbuot anjumanida ishtirok etdi. Murabbiy avvalo o'yin va qo'lg a kiritilgan JCh yo'llanmasi haqida fikr bildirdi.
- Iroqqa qarshi kechgan uchrashuv chiroyli o'yindan ko'ra har qanday yo'l bilan bo'lmasin. g'alaba qozonish shart bo'lgan o'yin edi. Aslida Iroqqa qarshi to'qnashuv oldin aytmagan edik,yashirgandik. Endi aytsak bo'ladi - terma jamoamiz tarkibida 6 nafar futzalchi shamollab, og'ir ahvolda qolgan edi. Ammo ular bugun haqiqiy jangchilarga hos matonat ko'rsatdilar va bor kuchlarini maydonga tashlab chiqdilar. O'zbekiston terma jamoasi har doim JChga bir qadam qolganida omadsizlikka yo'liqardi. Bugun mana shu qora an'anaga barham berdik. Futzalchilarimiz shamollab qolganlari tufayli hatto tunda uxlay olmadilar. Ammo maydonda o'zlarini ko'rsatdilar, jang olib bordilar. Ular bilan faxrlanaman. O'yinga to'xtaladigan bo'lsak, Iroq terma jamoasi juda kuchli edi. Ular tarkibida klublar o'rtasidagi jahon chempionatida behad kuchli o'yin ko'rsatgan futzalchilar bor edi. Men bu raqibni hurmat qilaman va beshinchi jamoa sifatida jahon chempionatiga chiqishiga tilakdoshman. - Birinchi va ikkinchi bo'lim o'rtasidagi o'yinda bu qadar farq bo'ldi. Nima uchun ikkinchi bo'limda yaxshiroq o'ynadingiz?
- Men bunday demagan bo'lardim. Biz o'yinga to'g'ri yondoshdik va raqibni asta sekin kuchsizlantirib borishga harakat qildik. Shu sababli ham o'yin boshida raqib yaxshiroq o'ynadi va bora bora kuchdan qola boshladi. O'yinni umumiy jihatdan olsak, biz u qadar yaxshi o'ynay olmagan bo'lishimiz mumkin. Ammo kerakli natijaga erisha oldik. Bugun chiroyli o'yin ko'rsatishga emas, balki g'alaba uchun qo'limizdan kelgan barcha ishni amalga oshirishga harakat qildik.
- Bugun jamoangiz ko'proq zarba yo'lladi. Bu sizning ko'rsatmangiz edimi?
- Albatta Iroq birinchi bo'limda o'z darvozasiga yaqin o'ynagani uchun uzoqdan zarba yo'llashga majbur bo'ldik. Biz shunday zarbalar bilan hujumni davom ettirishga qaror qildik. Ikkinchi bo'limda bu taktika ish berdi. Iroq birinchi bo'limda himoyada yaxshi o'ynadi. Ikkinchi bo'limda esa ko'zlagan maqsadlarimiz amalga oshdi. Yarim finalda boshqacha o'yin ko'rsatishimiz turgan gap. Tailand bilan yarim finalda to'qnash kelamiz. Bu jamoa juda kuchli. Ular bizga qarshi kechadigan o'yinda favorit. Ammo biz ularni mag'lub eta olamiz. Ular hujumga o'tganda, bizda qarshi hujum uyushtirish imkoniyati bo'ladi. Tailandga qarshi qiziqarli o'yin bo'lishi turgan gap. Bizda bosim bo'lmaydi va endi boshqacha o'yin ko'rsatamiz. Biz endi hujumga ko'proq e'tibor beramiz.
- Olti futzalchi davolangan bo'lsa, ularga tibbiy dorilar berishda alohida e'tibor bo'ldimi. Chunki ba'zan davolanish uchun qo'llangan dorilar doping tekshiruvida pand berib qo'yishi mumkin.
- Biz bunga alohida e'tibor berdik. Doping masalasida xavf borligini bilardik, shu sababli shifokorimiz bunga alohida e'tibor berdi. Bizda ruxsat berilgan preparatlar ro'yxati bor va faqat u erda keltirilgan dorilardan foydalandik. Biz imkon qadar bu masalada extiyot bo'ldik va doping tekshiruvi borasida xavotirga o'rin yo'q.
- Tailand terma jamoasida oltinchi, ettinchi va to'qqizinchi raqamli futzalchilar juda kuchli. Siz Tailandda ham ishlagansiz va bu futzalchilarni yaxshi bilasiz. Ularga qarshi qanday chora qo'llamoqchisiz?
- Tailand terma jamoasi tarkibidagi kamida 7, 8 futzalchini juda yaxshi bilaman. Men martga qadar ham ularga ustozlik qilganman. Olti yil Tailand termasini boshqarganman va "Buriram"da ham ishlaganman. Shunday ekan, ularni juda yaxshi bilaman. Ammo muammo shundaki, ular ham meni yaxshi biladilar. Uslubimdan xabardorlar. Tailand tarkibida bir necha juda kuchli futzalchilar bor. Ular jamoalar o'rtasidagi farqni oshirib yuborishlari turgan gap. Ammo bugungidek muxlislik bo'lsa, bu farq o'z o'zidan yo'qqa chiqadi. Men 20 yildan buyon murabbiylik qilaman, ammo hali bunday muxlislikni ko'rmaganman. Ishqibozlar bizga kuch beradilar. - Shamollab qolgan futzalchilar nomini ayta olasizmi? Sir bo'lmasa...
- Sir emas. Eliboev, Sharipov, Rahmatov, Shlema, Artur Yunusov va yana bir futzalchining nomi dabdurustdan yodimga tushmayapti. Bu futzalchilarning barchasi matonat ko'rsatdilar.
- Bu g'alaba bilan yurtingizdan tabriklar bo'ldimi?
- Kiyinish xonasiga borganimda 50dan ortiq tabriklar kelganini ko'rdim. Shuningdek ijtimoiy tarmoqlarda ham tabriklashmoqda. Hozircha ularni ochib ko'rishga ulgurmadim. Men bu yo'llanmani qo'lga kiritishni juda istagan edim. JChga O'zbekiston haqli edi. 2011 yilda O'zbekistonda ishlaganman, ammo o'shanda ishim juda omadsiz kechgan edi. Bu safar O'zbekiston bilan o'sha xatolarni to'g'riladik. Bu yurt jahon chempionatiga haqli. Men futzalchi sifatida ham mundialda o'ynaganman, Tailand termasi bilan murabbiy sifatida ham ishtirok etganman. Shunday ekan, menga mundial ko'p ham kerak emas edi. Mundial O'zbekistonga kerak edi va bu ish amalga oshishi uchun qo'limdan kelgan barcha ishni amalga oshirdik. Men bu yurtning ishonchini oqlashni juda istadim. Aslida O'zbekistonda ish boshlashimdan oldin Xitoy va Eron klublaridan ham yaxshi takliflar bo'lgan edi, ammo men O'zbekistonni tanladim. Chunki bu erda futzalni yaxshi ko'radigan, uni targ'ib etadigan fidoyi insonlar bor. Futzal assotsiatsiyasi rahbari Jahongir Usmonov juda katta hajmdagi ishlarni amalga oshirmoqda. O'FF prezidenti Mirabror Usmonov sportga ulkan hissa qo'shmoqda. Jamoada menga yordam bergan insonlar bor. Ular bu yo'llanma uchun qo'llaridan kelgan barcha ishni amalga oshirdilar. Shuningdek bugun jamoa tarkibida bo'lmaganlarni ham ta'kidlab o'tmoqchiman. Bir yil oldin 25 futzalchi bilan ish boshlagan edik. Afsuski ularning hammasi ham hozir tarkibda emas. Bugungi g'alaba uchun ularga ham rahmat aytaman.
— deya xabar beradi uff.uz nashri.