Boks bo'yicha Doha shahri (Qatar)da davom etayotgan kattalar o'rtasidagi jahon chempionatida bugun 5 vazn (-49 kg, -56 kg, -64 kg, -75 kg, va -91 kg vazn) toifasida dastlabki final bahslari o'tkaziladi.
Unda uch nafar charm qo'lqop ustalarimiz – bular Murodjon Axmadaliev (-56 kg), Fazliddin G'oipnazarov (-64 kg) va Bektemir Meliqo'ziev (-75 kg) ringga ko'tariladilar.
Jumladan, Murodjon Ahmadaliev (-56 kg) irlandiyalik Maykl Konlonga, Fazliddin G'oipnazarov (-64 kg) rossiyalik Vitaliy Dunaytsevga, Bektemir Meliqo'ziev (-75 kg) esa Kuba vakili Arlen Lopesga qarshi bahs yuritadilar. Qolgan vazn toifalaridagi final janglari 15 oktyabr kuni o'tkaziladi.
Avval xabar qilganimizdek, mazkur jahon chempionatiga Rustam Saidov boshchiligidagi O'zbekiston terma jamoasi 9 nafar sportchi bilan yo'l oldi.
Hamyurtlarimizning bugunga qadar o'tkazgan janglariga nazar tashlasak, ikki nafar bokschimiz Xasanboy Do'smatov (-49 kg) va Shaxobiddin Zoirov (-52 kg) 1/8 finalga, Rustam To'laganov (-91 kg) ¼ finalga, Elnur Abduraimov (-60 kg), Elshod Rasulov (-81 kg) hamda Bahodir Jalolov (+91 kg) yarim finalga, Murodjon Axmadaliev (-56 kg), Fazliddin G'oipnazarov (-64 kg) va Bektemir Meliqo'ziev (-75 kg) finalga qadar etib keldilar.
Shu kunga qadar hamyurtlarimiz Qozog'iston, Italiya, Tailand, Rossiya, Kuba, Hindiston, Turkiya, Gruziya, Frantsiya, Irlandiya, Jazoir, Yangi Zelandiya, Mo'g'iliston, Venesuela va Iordaniya kabi 15 davlat vakillarini mag'lub etishga muvaffaq bo'ldilar.
Jumladan, finalga qadar kechgan janglarda hamyurtlarimiz Tailandning uch nafar, Qozog'iston, Italiya, Jazoir va Yangi Zelandiya terma jamoalarining ikki nafardan, Kuba, Rossiya, Irlandiya, Mo'g'iliston, Turkiya, Venesuela, Hindiston, Frantsiya, Iordaniya va Gruziya terma jamoalarining bir nafardan sportchisini mag'lub etishdi.
O'z navbatida finalga qadar etib kela olmagan 6 nafar hamyurtimizni Ozarbayjon, Xitoy, Kuba (ikki nafar), Irlandiya va Qozog'iston sportchilarigina to'xtatib qola oldilar.
14-15 oktyabr kunlari o'tkaziladigan final janglarida Kubadan – 6 nafar, O'zbekiston va Rossiya – 3 nafardan, Ozarbayjon, Irlandiya, Qozog'iston – 2 tadan, Frantsiya hamda Marokash terma jamoalaridan bittadan bokschi ringga ko'tariladi.
Ma'lumot uchun. 2015 yilgi jahon chempionatining final bahsida 2013 yili Almati (Qozog'iston)da o'tkazilgan jahon chempionatida finalga qadar etib borgan besh nafar bokschi ringga chiqadi. Bular, Lazaro Alvares (-60 kg, Kuba), Daniyar Eleusinov (-69 kg), Qozog'iston), Xulio de la Kruz (-81 kg, Kuba), Evgeniy Tishenko (-91 kg, Rossiya) va Ivan Dichko (+91 kg, Qozog'iston). O'tgan jahon chempionatida Ivan Dichkodan tashqari yuqorida nomlari zikr etilgan finalchilarning barchasi g'oliblikka erishgan.
Barcha vazn toifalarida finalga etib kelgan juftliklar bilan O'zbekiston Milliy Olimpiya Qo'mitasining rasmiy sayti Olympic.uz'da tanishib olishingiz mumkin.
— deya xabar beradi uff.uz nashri.