Bugun Evropa ligasining 1/16 final bahslariga start beriladi. Ko'hna qit'ada nufuzi jihatidan ikkinchi o'rinda turuvchi mazkur musobaqaga bu gal har qachongidan qiziqish yuqori. Chunki 1/16 finaldayoq har qanday chempionatni bezab berishi mumkin bo'lgan grand jamoalar bir-birlariga ro'baro' kelishgan.
Ayniqsa, Borussiya Dortmundt – Portu, Vilyarreal – Napoli, Fiorentina – Tottenhem, Marsel – Atletik Bilbao, Sporting – Bayer, Shaxtyor – Shalke-04, Galatasaroy – Latsio o'rtasida kechishi kutilayotgan shiddatli bahslar hech bir futbolsevarni bee'tibor qoldirmasa kerak.
Grand klublarning aksariyati Evropa chempionlari ligasining guruh bosqichida omadsizlikka uchrab, muxlislari ko'nglini xufton qilishgan. Ularning ishqibozlari ko'nglini harna xalqaro turnirda o'ynayapmiz-ku, hech bo'lmasa shu erda bosh sovringa sazovor bo'larmiz degan birgina ilinj yoritib turgan bo'lsa ne ajab.
O'zbekistonliklar uchun Evropa ligasining ushbu bosqichi nafaqat kuchli jamoalarning to'qnashuvi, balki unda hamyurtlarimiz ham ishtirok etayotgani bilan ham ahamiyatlidir. Jumladan, Moskvaning “Lokomotiv” klubi safida Vitaliy Denisov o'ynayotgan bo'lsa, Krasnodarning shu nomdagi klubi safida esa Odil Ahmedov to'p surmoqda. Albatta, Evropa maydonlarida, ustiga-ustak, nfuzli xalqaro turnirda ottiriladigan tajriba va ko'nikmalar 2018 yilgi JCh saralashining muhim o'yinlari arafasida turgan terma jamoamiz a'zolari uchun katta maktab vazifasini o'tashi shubhasiz.
Afsuski, “Lokomotiv” kecha Turkiyaning “Fenerbaxche” klubiga imkoniyatni boy berib qo'ydi (2:0), endi “temiryo'lchilar” nimchorak finalga chiqish uchun o'z maydonida bo'lib o'tadigan javob o'yinida ancha ter to'kishiga to'g'ri keladi.
“Krasnodar” esa bugun maydonga tushadi. Uning raqibi Chexiyaning “Sparta”si. Dastlabki o'yin chexiyaliklar maydonida, javob o'yini esa Rossiyada o'tishini inobatga olsak, mazkur o'yindagi durang natija ham, mag'lubiyat qayd etilgan taqdirda raqib darvozasiga kiritiladigan har bir gol ham javob uchrashuvida “Krasnodar”ning imkoniyatini oshirishi tabiiy. G'alaba qozonishsa-ku, nur ustiga nur.
Davomi Tafsilot.Uz blogida.
— deya xabar beradi uff.uz nashri.