Kechagi O'zbekiston – Iroq bahsini qadrdonlar bilan birga ko'rdik. Kayfiyat chog' bo'lganligi uchun gaplashib o'tirib, kun qoraygach, uyga kech qaytdim. Ishqiboz do'stlar ham bor bo'lsin, termamizni jahon chempionatiga chiqqanligi bilan telefon orqali ko'p qutladilar. Mahallamiz tomon ketayotganimda hamsoyalardan biri “Matiz”ni to'xtatib –Aka ketdikmi? –deya mashinasiga o'tqazdi. Qo'shnim bilan salomlashib ulgurmay, yana qo'ng'iroq... – “Qulluq bo'lsin, oshna, mendan kattakon tabriklar!”- degan so'zlarni eshitgan haydovchi yigit – Bugun tug'ilgan kuningizmi?,- deb savol berdi. –Yo'q, bugun futzaldan termamiz jahon chempionatiga chiqdi, shunga... Uni savol nazari bilan qarab aytgan menga aytgan so'zi juda ta'sir qildi: – Men futbol ko'rmayman, lekin termamizni yutug'i zo'r bo'libdi, O'zbekistonimiz har sohada rivojlanib boryapti. Futbolni suymasa ham Vatan sha'ni uchun quvonganidan rosa xursand bo'ldim.
Aslida, futbolni yoqtirish yoki yoqtirmaslik barchaning ixtiyorida. Millionlar o'yinining muxlislari esa unda Vatan aksini ko'radilar. Biz shunaqamiz... Hech qachon Vatanimiz jamoasini maydondan elka qisib chiqib ketishini xohlamaymiz.
Axir yozuvchi aytganidek: “Vatan, bu shartli jo'g'rofiy hududgina emas, balki inson  idroki bilan yuragining mustahkam, ayrilmas birligidir. Vatanni tark etmoq, vatanni unutmoq mumkin emas. Vatan seni nafasingda, yuragingda. Umring tugab, hayotdan ko'z yumganingda ham u sen bilan birga bo'ladi”.  
Chunki, vatan – sehrli qudrat! U kishini ohangraboday o'ziga tortadi. Tuprog'i ham, toshi ham tortadi. Nafasiyu- qo'shiqlari ham... Futboli ham... Futzalmi-voleybolmi, boksmi-shashkami terma jamaolarimiz g'alaba qozonsa, ko'nglimiz tog'dek ko'tariladi.
Ha, kechagi g'alaba, sermulohaza Mendes va shogirdlarining muvaffaqiyati qalbimizni g'ururga to'ldirdi.
Andijonlik shoir Ravshan Hamrozdan:
 
Futboldan Vatanning isi keladi
Tandirning yonidan o'tar bo'lsangiz,
Dimoqqa urilar shirin non isi.
Beshikka ko'z tushsa, o'shal zahoti,
Chulg'ab olar dilni bolalik hissi.
Futboldachi, ha, ha, shunday bo'ladi:
-Futboldan Vatanning isi keladi.
“Bu bir o'yin”, demang, buzmay pinakni,
“G'olib, mag'lubligi ularning ishi...”
Axir bu o'yinning ortida turar,
Bir millat sha'niyu, baxti, tashvishi.
Kimki vatanparvar – yaxshi biladi,
-Futboldan Vatanning isi keladi.
Elmurod ERMATOV, Ravshan HAMROZ, Andijon
— deya xabar beradi uff.uz nashri.