Qatar poytaxti Doha shahrida davom etayotgan jahon chempionatida 2016 yili Rio-de-Janeyro shahri (Braziliya)da o'tkaziladigan XXXI yozgi Olimpiada o'yinlarining yo'llanmalari ham o'ynalayotganligi haqida xabaringiz bor.

Mazkur jahon chempionatida “Rio-2016” o'yinlariga o'ynalishi lozim bo'lgan jami 23 ta yo'llanmadan 18 tasi o'z egalarini topdi. 14 va 15 oktyabr kunlari qolgan 5 ta yo'llanma uchun janglar o'tkaziladi.

Jumladan, bugun o'tkaziladigan final janglaridan oldin -56 kg, -64 kg va -75 kg vazn toifalarida litsenziyalar uchun janglar o'tkaziladi.

15 oktyabr kuni ham final janglaridan avval yana ikki vazn toifasida (-60 kg, -69 kg) yo'llanmalar uchun bahslar o'tkaziladi. Shu kuni birinchi bo'lib ringga hamyurtimiz Elnur Abduraimov (-60 kg) chiqadi.

Shu o'rinda ta'kidlash joizki, ertangi jangda garchi Elnur braziliyalik Robson Donato Konseysaodan ustun kelgan taqdirda ham sportning ushbu turida ayni paytga qadar qo'lga kiritilgan litsenziyalar soni to'rttaligicha qoladi.

Sababi, reglamentga ko'ra har bir vazn toifasida har bir davlatdan bittadan sportchi ishtirok etishi mumkin. Xabaringiz bor, -60 kg. vaznda hamyurtimiz Xurshid Tojiboev “Rio-2016” yo'llanmasini qo'lga kiritib bo'lgan.

Agarda Elnur Abduraimov ham “Rio-2016” o'yinlariga yo'llanma olsa, ushbu ikki bokschidan qay birini Olimpiada o'yinlariga borishi O'zbekiston boks federatsiyasi tomonidan e'lon qilinadi.

14 va 15 oktyabr kuni o'tkaziladigan janglar Toshkent vaqti bilan 21:00dan boshlanadi.Shavkat Jalilov
Manzil: O'zbekiston Milliy Olimpiya qo'mitasi matbuot xizmati
— deya xabar beradi uff.uz nashri.