«Barselona» hujumchisi Neymar o'z vatanida bo'lib o'tadigan Olimpiada bahslarida ishtirok eta olmasligi mumkin.
Kataloniyaliklar 24 yoshli hujumchini Olimpiadaga qo'yib yuborishni istamayaptilar. Agar Neymar Rio-de-Janeyroga borgan taqdirda ham, buning uchun «Barselona» o'z shartlarini qo'yadi. Ya'ni, klub musobaqa davomida hujumchining maoshini to'lashni istamayapti va bu ishni Braziliya futbol federatsiyasi gardaniga qo'ymoqchi. Shuningdek Neymar jarohat olsa, «Barselona»ga sug'urta puli va'da qilinishi lozim.
Eslatib o'tamiz, Neymar Olimpiadaga ketgan taqdirda, «Barselona» mabodo Evropa Superkubogi va Ispaniya Superkubogida ishtirok etsa, braziliyalik hujumchi maydonga tusha olmaydi. Braziliya olimpiya terma jamoasi bosh murabbiyi Dunga Olimpiada o'yinlariga Neymar, Miranda va Alissonni taklif etishni rejalashtirmoqda.
— deya xabar beradi uff.uz nashri.