Tailand terma jamoasi bosh murabbiyi Viktor Xermans Osiyo chempionatida uchinchi o'rin uchun Vetnamga qarshi kechgan uchrashuvdagi 8:0 hisobidagi g'alabadan so'ng, yarim finalda O'zbekistonga qarshi kechgan uchrashuvdni yana bir bor yodga oldi. Eslatib o'tamiz, yarim finalda O'zbekiston - Tailand bahsi 2:2 hisobida yakuniga etgan va penaltilar seriyasiga ko'ra O'zbekiston terma jamoasi 3:1 hisobida g'alabaga erishgan edi.
- Bugun Vetnam bizga darvozamiz yonidayoq qarshilik ko'rsatishga urinib ko'rdi. Ammo biz raqibdan ustun chiqa oldik va ajoyib g'alabaga erishdik. Men OFK tomonidan guruh bosqichi so'nggi turida qo'llanilgan tadbirdan xursandman. 2012 yilgi musobaqada oxirgi tur o'yinlari turli vaqtda o'tkazilgani tufayli jamoalar o'ziga kerakli hisobni ushlash uchun kelishib o'ynagan holatlar ham bo'lgan edi. Bu yil so'nggi tur bir vaqtda o'tkazilgani tufayli haqiqiy futzal tomosha qildik.
Shu bilan birga bir gap aytishim lozim. O'tgan o'yinlarda hissiyotlarimni bosa olmay jahl aralash fikr bildirdim. Meni to'g'ri tushuning, o'sha vaqtda jahl ustida edim va qornim ham och bo'lgani uchun o'zimni bosa olmadim.

Men Osiyo chempionatida hakamlik masalasidan noroziman. Qanday qilib bir jamoa o'yinini faqat bir hakam boshqarishi mumkin. O'zbekiston terma jamoasining bugun finalda o'tkazadigan o'yini qaydnomasini ham ko'rib turibman, avvalgi uchrashuvlarni boshqargan hakam ro'yxatda bor ekan (xitoylik hakam Liu Jiankiao O'zbekiston terma jamoasi o'yinlarini ketma-ket boshqargan edi - tahririyat izohi). Yarim finalda bizga qarshi o'tkazilgan o'yinda ham shu hakam bor edi. Men bundan noroziman. Bu gapni o'zimni yoki terma jamoamni o'ylab aytmayaman, balki sportni o'ylab aytmoqdaman. Futzal rivojlanishi uchun hakamlik masalasida ham xolislik kerak. O'zbekiston terma jamoasining o'yinlarini ketma-ket bir hakamlar brigadasi boshqardi va ular finalga etib keldilar. Men bunga qarshiman.
- Vetnam terma jamoasi bosh murabbiyi ham bugungi hakamlikdan norozi bo'ldi va uchinchi golingizda xato qilishganini aytdi. Demak hakamlar sizning foydangizga ham adashmoqda. Yoki Vetnam terma jamoasi bosh murabbiyi ham qorni och bo'lgani uchun jahl ustida hakamlarni tanqid qildimikan?
- Bo'lishi mumkin. Balki uning ham qorni och bo'lgandir. Tushuning, men bu gaplarni sport ravnaqi yo'lida aytmoqdaman. To'g'ri, hakamlik ham oson ish emas. Ularning ishi juda og'ir. Ammo baribir xolislik bo'lgani yaxshi.
- O'zbekiston terma jamoasi va musobaqa tashkilotchiligi haqida nima deya olasiz?
- Men bir gapni ishonch bilan ayta olaman, mening jamoam O'zbekiston termasidan kuchliroq edi. Shuni yana bir bor ta'kidlashim mumkin. Musobaqa haqidagi taassurotlarimga kelsak, hammasi ajoyib. Ko'rib turibman, yurtingizda hamma joy toza, ozoda. Odamlari xushmuomala va biz uchun yaratilgan sharoitlar ham a'lo darajada. Buning uchun hammaga rahmat aytaman.
— deya xabar beradi uff.uz nashri.