«Lester»ning 24 yoshli vingeri Goal.comga intervyu berish chog'ida Frantsiyadan Angliyaga ko'chib o'tishi haqida gapirdi. Shuningdek, tez orada «Barselona» bilan kelishuvga erishishi borasidagi gap-so'zlarga munosabatini bildirdi.
«Manchester Siti»ga qarshi bahsda chap qanotdan markazga kirib borib, Martin Demikelisni aldab o'tib, Jo Xartni dog'da qoldirgan Riyod Mahrez nafaqat o'yin taqdirini hal qildi, balki «Lester»ning chempionlik uchun astoydil kurashmoqchiligini ko'rsatdi. Aynan shu bahsdan so'ng «tulkilar»ning musobaqa favoritiga aylanganliklarini ko'pchilik tushuna boshladi.
Parij chekkasidagi shaharchada tug'ilgan futbolchi bilan hozirda nafaqat premer-liga etakchilari, balki Evropaning tengsiz klubi - «Barselona» ham qiziqmoqda. Mahrez o'zining tezkorligi orqali Ang­liya chempionatidagi eng yaxshi o'yinchilar qatoriga qo'shildi. Endi esa o'zini ko'k-anorrang libosda, eng yaxshi ko'rgan futbolchilaridan biri - Lionel Messining yonida tasavvur qilishdan aslo iymanmayapti.
- Gap mening maqsad yoki orzularim haqida ketmayapti, shunchaki, har bir futbolchi Messi bilan yonma-yon to'p surishni xohlaydi. Balki bir kun shu niyatim amalga oshar, - dedi Riyod. - Kimnidir kumirim sifatida ko'rsatolmayman, ammo ilgarilari Zayniddin Zidan, Dide Drogba, Lionel Messi hamda braziliyalik Ronaldoning o'yinlarini kuzatishni yoqtirardim.
Jazoir terma jamoasi vakilining o'sish jarayoni xuddi Jeymi Vardinikiga o'xshash. Har ikkisining taqdiri 2009 yildan boshlab Angliyaning uchinchi divizionidan premer-liga etakchiligigacha bo'lgan yo'lni bosib o'tgan «Lester» bilan uzviy bog'liq. Endilikda joriy mavsum yakuni tobora yaqinlashayotgan bir pallada jamoa Klaudio Raneri bosh murabbiyligi ostida chempionatda peshqadamlik qilmoqda.
Ranerining katta futbolga qaytishi ko'pchilikni xursand qildi. Ayniqsa, uning Gretsiya termasidagi omadsiz faoliyatidan so'ng bu holat muhim ahamiyat kasb etardi. 24 yoshli vinger italiyalik mutaxassis haqida gapirarkan, uning doimo o'zligini saqlab qolishga intilishi, hamisha quvnoqlikka urg'u berishini alohida ajratib ko'rsatdi. O'z navbatida, Ranerini «tulkilar»ning sobiq ustozi Nayjel Pirson bilan taqqoslashni xohlamadi. Aynan shu murabbiy Mahrezni hozirgi klubiga olib kelgandi.
Riyod uchun cho'qqi sari yo'l «Lester» chempionshipga chiqqan palla - 2009 yildan boshlandi. Mahrez 2010 yili «Kemper» (Frantsiya to'rtinchi divizioni vakili)dan «Gavr»ga o'tgach, ma'lum muddatdan so'ng «tulkilar» safiga qo'shildi va birinchi yilning o'zidayoq jamoasi bilan APL yo'llanmasini qo'lga kiritdi.
Vaholanki, qahramonimiz premer-liga va Britaniya futbolining bir qismiga aylanishni orzu qilmagandi. «Arsenal», «Chelsi» yoki «MYu»ga raqiblik qilishdan ko'ra, «PSJ» «Marsel» hamda «Monako»ga qarshi to'p surish uning uchun ma'qulroq edi.
- «Gavr»dan ketganimdan so'ng prem­er-ligaga kelishni xohlamadim, menga Liga 1 ko'proq yoqardi, - deydi Mahrez. - Tumanli o'lkaga tashrifimdan keyingina Angliya chempionatiga mehr qo'ydim. Bunga qadar qarashlarim mutlaqo o'zgacha edi.
Davomi InterFUTBOL gazetasi blogida.
— deya xabar beradi uff.uz nashri.