Frantsiya chempionatining markaziy uchrashuvi sifatida e'tirof etilgan «Marsel»-«PSJ» qarama-qarshiligi katta qiziqishga sabab bo'ldi. Boisi, 63000dan ko'proq muxlis yosh yulduz Mishi Batshua­yining gol urib, chempionat to'purari Zlatan Ibragimovichga sal bo'lsada yaqinlashib olishi, poytaxt klubi esa mavsumdagi ilk mag'lubiyatini tan olishiga umid qilgandi.
Yo'q, Mishi maydonni golsiz tark etdi, Ibra esa o'z imkoniyatini yo'qqa chiqarmadi. Oxir-oqibat, chempion safardan navbatdagi 3 ochko bilan qaytdi. Shunday bo'lsada, Shampionat.com marselliklarning belgiyalik «qora marvarid»i haqida hikoya qilishni lozim topdi.
Kim o'zi u?
Batshuayi tarbiyasi o'ta og'ir yigitlar toifasidan. Ajablanarlisi, o'zining bu qitmirliklaridan uyalish o'rniga aksincha, faxrlanadi. Chunki Mishi bolalik chog'ida boshqalardan ajralib turishga odatlangan, shu tariqa biroz xudbinlik illatini ham yuqtirib olgan.
80-yillar Afrikadan Evropaga ko'chib o'tgan kongolik muhojirlar oilasida dunyoga kelgan Batshuayi futboldagi ilk saboqlarini rasmiy mashg'ulotlarda emas, ko'chada oldi. Ma'lumki, ko'cha futbolining o'ziga xos qonun-qoidalari, an'analari bor. U bilan futbol akademiya­laridagi kundalik mashg'ulotlar orasida katta farq bor. Kun bo'yi Bryussel ko'chalarida to'p surgan Mishi ana shu muhitda tarbiyalandi, engiltaklik qon-qoniga singib ketdi. Bu qusur tufayli uni 13 yoshida akademiyadan haydab yuborishdi. «Anderlext»dan mudom o'rin olish Mishi uchun juda qiyin edi.
Bryusseldek megapolisda to'g'ri yo'lni tanlay olish ayniqsa, bolakaylar uchun oson emas. Batshuayi kabi qitmirlarni faqat xushmuomalalik bilan egib olish mumkin. Biroq qahramonimizga bu ham ta'sir qilmadi, Mishi bolalarga xos qiliqlaridan voz kechmadi. «Bunday quloqsiz shogirdni kim ham yoqtiradi?», - deydi Batshuayiga U-14 jamoasida ustozlik qilgan Set Nkandu. Jamoa «Lers»­dagi tengdoshlariga imkoniyatni boy berganidan keyin Mishi «Anderlext»­dan ketdi - mag'lubiyatga chiday olmagan futbolchi bor alamini kiyinish xonasidan olib, uni ag'dar-to'ntar qilib tashladi.
Batshuayi bolalikning beozor bezoriliklarini hozir tabassum bilan esga oladi. Lekin o'shanda u o'z yo'liga o'zi to'g'anoq bo'lganini tushunib, boshqa variantlarni izlay boshladi. Shu tariqa, Bryussel akademiyasidan joy oldi. Tez orada uni «Standard»ga taklif etishdi. Lejliklar tarkibni yoshlar bilan to'ldirishga zo'r berishgan, ular uchun Mishining injiq tabiatidan ko'ra gol urish qobiliyati muhimroq edi. Shu sababli, Dominik D~Onofrio unga ilk professional shartnomani taklif etdi. Belgiyalik qora tanli hujumchi esa ajoyib sermahsullikni namoyish etib, 2,5 yil ichida akademiyadan asosiy tarkibga o'tdi. 2011 yilning fevral oyida D~Onofrio uni «Standard» safida maydonga tushirdi.
Lekin Lejda ham hujumchi o'zining «xurmacha» qiliqlaridan forig' bo'lolmadi. Jumladan, «Genk»ka qarshi kechgan bahsda u maydonda yiqilib yotgan raqibini tepkilab tashladi. 2013 yili esa odobsizligi uchun Belgiya yoshlar terma jamoasi safidan chetlatildi. To'g'ri, asta-sekinlik bilan o'zini o'nglab borayotgan Mishi bolalikdagi sho'xliklaridan batamom voz kecha olmadi. Masalan, u hozir ham «Gubka Bob - kvadrat ishtoncha» multfilmining ashaddiy ishqibozi. «Bu multfilm­ni juda yaxshi ko'raman. Uyda yolg'iz qolgan paytlarim uxlay olmayman. Shunda «Gubka Bob» meni ovutadi. Hatto ulg'ayganimda ham undan voz kechmayman», - deydi futbolchi. Sevimli qahramoni xususida «Marsel»dagilar bilan o'rtoqlasha olmasligi Mishini biroz ranjitadi. Chunki jamoadoshlarining qarashlari mutlaqo boshqacha. Multfilm qahramoniga taqlid qilish Batshuayining barcha xatti-harakatlarida yaqqol sezilib turadi. «Gubka Bob» goh Mishining sumkasidan, goh ayfonining g'ilofidan yorug' olamga nazar tashlaydi.
U qanday o'ynaydi?
Ajabo, toqat qilib bo'lmas darajadagi tabiati bilan Batshuayi qanday qilib Frantsiyaning nomdor jamoalaridan birining safidan joy oldi? Chunki u yo'q erdan mojaro chiqarishdan tashqari, gol urishni ham joyiga qo'yadi. 2014 yilning yozida «Marsel» Mishini Belgiya chempionatining yulduzlaridan biri sifatida xarid qilgandi. O'shanda qahramonimiz 2013|2014 yillar mavsumini 21ta gol bilan yakunlab, «qora butsa» sohibiga aylangandi. Belgiyaliklar bu nufuzli sovrinni chempionatning eng yaxshi afrikalik legioneri yoki kelib chiqishi «qora qit'a»­ga daxldor bo'lgan futbolchiga taqdim etadilar. Aytishlaricha, Mishi «Baselona»dan taklif olgan, lekin 2-jamoada to'p surishga g'ururi yo'l qo'ymagan. Shu sababli, Kataloniya grandining taklifini rad etib, «Marsel»ga yo'l olgan.
Marselo Belsadek tajribali murabbiy Batshuayini maydonga tushirishga oshiqmadi. Boisi, uning ixtiyorida Andre-Per Jinyakdek mohir va sermahsul hujumchi bor edi. Oqibatda, tinimsiz ter to'kishlar evaziga Mishi faqat ikkinchi davradan boshlab maydonga tushdi va mavsumni 9ta gol bilan yakunladi.
Keyinchalik hujumchi muntazam ravishda asosiy tarkibdan joy ola boshladi. Lekin u golsiz «quruq seriya»larni ham qayd etadigan bo'lib qoldi. Albatta, sermahsullik bu noxush an'anaga qaraganda ko'proq. Masalan, joriy mavsumda Mishi qatorasiga 5ta uchrashuvda gol urdi. Qolaversa, uning «Marsel»dagi ulushi ulkan - jamoa hisobidagi gollarning 35 foizi unga tegishli. Bu borada Batshuayi bilan tenglashadigan hujumchi yo'q.
Futbolchining o'yin uslubini mutaxassislar eski maktab usuli sifatida e'tirof etishadi. Darhaqiqat, butun o'yin davomida «ofsayd» chizig'ida yurishi, lekin bir marta aqlini ishga solib, qahramonga aylanishi mumkin. U himoyaviy majburiyatlardan to'la forig' etilgan, maydon markaziga deyarli qaytmaydi. Jamoaviy pressing ham uning ishtirokisiz amalga oshiriladi. Mishining zaif jihati mana shu.
Davomi InterFUTBOL gazetasi blogida.
— deya xabar beradi uff.uz nashri.