“Al-Ittixod” klubi bosh murabbiyi Viktor Pitsurke hamda futbolchi Muxtor Fallatah o'yinoldi matbuot anjumanida ishtirok etishdi. Pitsurke shamollab qolgani va buning natijasida ovozi biroz bo'g'ilib qolgani uchun jurnalistlardan uzr so'rab, keyin o'yin haqidagi fikrlari bilan o'rtoqlashdi:
“Biz uchun natija juda muhim. Raqibimiz kuchli, “Lokomotiv” to'p uzatmalarini juda yaxshi amalga oshiradi, agressiv harakat qilishda ham klub menda iliq taassurot qoldirgan. Biz bu erga chiroyli futbol ko'rsatib, g'alaba qozonish uchun etib kelganmiz. Raqib ham xuddi shuni istaydi. Umid qilamanki, g'alaba biz tomonda bo'ladi”, deydi Viktor Pitsurke.
Mutaxassis fikriga ko'ra, “Lokomotiv”ning rasmiy o'yinlarda ishtirok etmayotgani “Al-Ittixod”ning imkoniyatlarini bir muncha oshirib beradi:
“Mavsum davomida bir qator rasmiy o'yinlarda maydonga tushib ulgurdik. Raqibda esa buning aksi, “Lokomotiv” asosan o'rtoqlik o'yinlari bilan cheklandi. Bu narsa tabiiyki bizga kichik ustunlik beradi”.
Viktor Pitsurke “Lokomotiv”ning o'tgan mavsum milliy chempionatda namoyish etgan o'yinlari hamda chempionlar ligasidagi ishtirokini puxta o'rganib chiqqanligini ma'lum qildi:
“To'g'ri, hozir bir qator yangi futbolchilar kelib qo'shilishdi, bundan xabarim bor. Yarim himoyachi Maxaradze Gruziyadan, tajribali futbolchi. Server Jeparov esa jarima zarbalarini qoyilmaqom qilib amalga oshira oladi”.
“Al-Ittixod”ning Osiyo chempionlar ligasida ikki bor zafar quchgani emas, ertangi bellashuvda kim kamroq xato qilib, g'alabani kim ko'proq xohlasa o'sha zafar quchajagini Pitsurke alohida ta'kidladi.
— deya xabar beradi uff.uz nashri.