Ha, aziz muxlis, maftunkor o'yinlari bilan barchani o'ziga rom etayotgan, bolakaylarning «kumir»lariga aylangan yorqin futbol yulduzlarini hammamiz yaxshi bilamiz. Ammo yashil maydonlarda ular kabi shuhrat qozona olmagan kasbdosh aka-ukalari haqida hech narsa bilmaymiz. Keling, shu paytgacha sizu-bizga notanish bo'lgan Runi, Suares va Pogba bilan tanishaylik.
10 Jonatan Benteke
Kristian Benteke «Liverpul» tarkibidan muqim o'rin olish uchun bor kuch va mahoratini ishga solayotgan paytda xuddi u kabi oldingi chiziqda to'p suradigan ukasi Jonatan «Zelte Veregem» safida etakchi o'yinchilaridan biri bo'lishga intilmoqda. Hozirda maqtanishga arziydigan ishlarni amalga oshirganicha yo'q. Belgiya chempionatida 8 marta maydonga tushgan bo'lsada, biror marta gol yoki samarali uzatmani uddalay olmadi. Lekin kichik Benteka uchun hammasi oldinda. Axir u endigina 20 yoshga chiqdi. Belgiyada yosh iqtidorlarni tarbiyalash yuksak darajaga ko'tarilganidan kelib chiqadigan bo'lsak, yaqin kelajakda aka-uka Bentekelar «Liverpul» yoki boshqa qaysidir grand safida yonma-yon to'p surishlari ham mumkin.
9 Talant Jaka
Agar o'yinchi chinakam talantga, granit kabi mustahkam irodaga ega bo'lsa, yulduzga aylanishi aniq. biroq hayotda ko'pchilik yo u, yo bu fazilatdan bahramand bo'ladi. Ehtimol, Granit va Talant Jakalarning ota-onasi suyukli o'g'lonlarida har ikki fazilatni ko'rishni orzu qilishgandir. Futbol nuqtai nazaridan yondashadigan bo'lsak, Granit omadliroq chiqdi. U «Borussiya» Menxengladbax yarim himoyachisi. Uning akasi - Talant esa hozircha «Bazel»dan «parvoz» qilishga ulgurgani yo'q. Shveytsariya chempionatining joriy mavsumida 24 yoshli himoyachi 15 marta maydonga tushdi va bitta golga assistentlik qildi. Qizig'i shundaki, bo'lajak Evro-2016 turnirida bu aka-ukalar o'zaro raqiblarga aylanishlari mumkin: Granit Shveytsariya terma jamoasining, Talant esa Albaniya sharafini himoya qilmoqda.
8 Born Riise
Norvegiyalik Yon-Arne Riise bir paytlar o'z ukasi Born bilan «Fulxem»da yonma-yon to'p surgandi. Aslida kichik Riiseni ko'pchilik tanimaydigan futbolchilar sirasiga kiritish to'g'ri emas - u Norvegiya terma jamoasi safida 35ta uchrashuv o'tkazgan, 2009|2010 yillar mavsumida «Fulxem» bilan ELning finaliga qadar etib borgan. Hozirda 32 yoshli yarim himoyachi o'z vatanida «Olesund» jamoasi tarkibida o'ynamoqda. Joriy mavsum 28 marta maydonga tushib, bitta samarali uztamani amalga oshirdi.
7 Jordan Lukaku
Romelu va Jordan Lukaku o'rtasidagi farq bir yildan sal ko'proq. Akasi «Everton»ning etakchi hujumchisi bo'lsa, ukasi Belgiyaning «Ostende»sida chap qanot himoya chizig'i uchun javobgar. Jordanning asosiy yutuqlari hali oldinda. U barcha yosh toifalaridagi terma jamoalarda toblanib, oktyabr oyida Belgiyaning bosh jamoasida debyutini nishonladi. Albatta, uning yoshida Lukaku ancha mukammal o'yin ko'rsatardi. Lekin Jordanning mahorati ham chakki emas. Joriy mavsumda himoyachi 17ta uchrashuvda ishtirok etib, o'z noimga bitta gol va 6ta samarali uzatmani yozib qo'ydi. Demak, himoyachi «Ostende»da uzoq qolib ketmaydi.
6 Katilina va Villi Obameyang
2015 yili Afrikaning eng yaxshi futbolchisi bo'lgan Per-Emerik Obemeyangning 2 nafar akasi ham «Milan» maktabida tahsil olishgan, Gabon terma jamoasi safida maydonga tushishgan. Obameyanglarning eng kattasi bo'lmish 32 yoshli Katilina 2011 yilgacha Frantsiyada faoliyat yuritdi, endi o'z yurtida «Sapine» klubi sharafini himoya qilmoqda. Chap qanot himoyachisining hisobida shuningdek milliy terma tarkibidagi 4ta o'yin va bitta gol mavjud. 28 yoshli Villi Obemeyang esa Gabon terma jamoasi sharafini himoya qilishga ulgurdi. Biroq 2001|2012 yillar mavsumidan keyin uning «Kilmarnok» va «Sapine» klublaridagi ishtiroki deyarli to'xtab qoldi. So'nggi paytlarda Villi Germaniyaning kamtarin «Kray» klubida to'p surmoqda.
5 Matias va Florentin Pogba
«Yuventus» hamda Frantsiya terma jamoasining yarim himoyachisi Pol Pogba esa egizaklar - Matias va Florentindan keyin dunyoga kelgan. Ular Gvineyada tavallud topishgan va shu mamlakat sharafini himoya qilishadi. Matias Shotlandiyaning «Partik Tisl» klubi hujumchisi, joriy mavsumning 13ta bellashuvida bitta gol va shuncha samarali uzatmani amalga oshirgan. Florentin esa «Sent-Eten»ning himoya chizig'ida to'p suradi. U 12 marta maydonga tushib, 1ta gol urdi. Darvoqe, ukasi Pol «Stad de Frans»dagi Frantsiya-Germaniya o'rtoqlik uchrashuvida maydonga tushganida 25 yoshli Matias tribunadan ukasini quvvatlab turdi.
Davomi InterFUTBOL gazetasi blogida.
— deya xabar beradi uff.uz nashri.