Xalqimizda bir gap bor: - insonni maqtama ko'z tegadi,-deyishadi. Darhaqiqat “Ko'z tegishi”-bor gap.
Lekin, har safar, maydonda moviy ko'z, uzun jingalak sochlari bilan boshqalardan ajrab turuvchi, asosiysi, o'yinga butun borlig'ini berib, o'ynaydigan Vitaliy Denisovning harakatlarini ko'rganimda –mana shu yigit haqida material yozish kerak,-degan fikr miyamda aylanaveradi.
Ukrain nashrlarida yozilishicha, O'zbekiston termasi safida maydonga tushish uchun Toshkentga uchib kelayotgan Vitaliyga styuardlardan biri –bilasizmi, siz Gollivudda olingan “Tor” filmi qahramoniga juda o'hshar ekansiz,-deb aytgan ekan. O'sha kinoni men ham ko'rganman, Vitaliyning maydondagi harakatlari darhaqiqat film bosh qahramoniga juda o'hshaydi. Bilasiz, “Tor” o'ziga hos sehrli quroli, ya'ni yashin va momoqaldiroqli bolg'a egasi bo'lgan qahramon, akasining hiylasi bilan, o'ninchi falakdan haydaladi. Tavba, e'tibor bersam, Vitaliyning maydonda hech kimdan tap tortmay, raqib tarafiga chaqindek hujum qilishida ham o'sha kinofilm qahramoniga o'hshash jihatlari juda ko'p ekan. Ha, dono xalq birovga bekordan-bekor laqab qo'ymaydi. Hatto, internetdagi “Vikipediya” sahifasida ham laqabi-degan joyiga “Tor” deb yozib qo'yilgan. Faqat uning sehrli bolg'asi yo'q, Uning bor sehri - shijoatda.
Uning otasi mashhur futbolchi, Gennadiy Denisovni bilmaydigan o'zbek ishqibozi bo'lmasa kerak. “Ot o'rnini –toy bosar”-deganlaridek, iqtidorli va shijoatli futbolchi bo'lib etishgan o'yinchimiz ham padari singari o'zbek muxlislari olqishlarini olib yuribdi.
E'tibor bergan bo'lsangiz, Denisovni ishqibozlar, termamiz yutqazgan o'yinlardan so'ng ham ayblamaydilar. Chunki, u har doim o'z vazifasini a'lo darajada bajaradi. Har qanday natija so'ng maydondanboshini tik tutib, chiqib ketishi mumkin bo'lgan yagona futbolchi bu - Denisov desam yanglish bo'lmas.
Blogimizda o'tkazilgan so'rovnomalarimizda ham deyarli barcha muxlislar uni terma jamoa tarkibida ko'rishni hohlashayotganini bildirishgan. Chunki, futbol maydoniga xuddi so'ngi marta tushayotgandek, bor kuchini berib o'ynaydigan futbolchi kimga yoqmaydi, deysiz?..
Vitaliy Denisov, ayni paytda, Rossiyaning “Lokomotiv” klubida ham asosiy o'yinchilardan biriga aylangan. Vitaliy ko'p bora jamoaning eng yaxshi o'yinchisi, deb topilgani ham umidli futbolchimizning klub muxlislari ko'nglidan joy olayotganidan dalolatdir.
Barcha o'zbek muxlislarining Vitaliydan umidlari katta. Maydonda, vatan tuyg'usini chin dildan his etib jangchidek so'ngi nafasigacha kurashadigan sevimli futbolchimizga “ko'z tegmasin” - deb qolamiz.
Tug'ilgan kuning bilan, Vitya! Elmurod ERMATOV, Andijon
— deya xabar beradi uff.uz nashri.