«Milan» futbolchilari «Napoli»ga qarshi bahs (7-tur) davomida sharmandalik (0:4)dan qochishga urinishayotgan pallalarda «rossonerlar» muxlislari klub vitse-prezidentini kinoya aralash olqishlashdi: «Rahmat, Galliani!» Ular shu usulda «Milan»ga ko'p xizmatlari singgan funktsionerni tribunadan chiqib ketishga majbur qilishdi.
Fanatlar ayniqsa, ikkinchi bo'limda faollashishdi. Ular Gallianiga «rahmat» aytishdan tashqari, «Bor, ishla!» qabilida ham so'z qotishdi. Hisob 0:3ga etgan vaqt bechora Adriano stadiondan chiqib ketdi. Shunday qilib, u himoyachi Rodrigo Elining avtogolini ko'rmadi. O'yinni jarohat sabab o'tkazib yuborgan «beo'xshov» Mario Balotelli ham vitse-prezident bilan birga o'rnini bo'shatib qo'ydi. Uning «Liverpul»dan «San Siro»ga qaytarish tashabbusi aynan Gallianidan chiqqan edi. To'g'ri, keyinchalik «rossonerlar»ning transferlar bo'yicha rahbari o'yindan so'ng kiyinish xonasiga kirgani ma'lum bo'ldi. U erda nimalar xususida gap borganini o'ylash dahshat. Zero, Galliani uchrashuv arafasida ham jamoa a'zolari bilan alohida uchrashgandi. Unda omadsiz startdan kelib chiqib, murabbiylar shtabiga qat'iy e'tiroz bildirgani ham aniq: «Men 90 mln. evroga futbolchi sotib oldim. Ular qaerda, o'yin qani?» Vitse-prezident bu bilan «Napoli»ga qarshi o'yin oldidan futbolchilarni uyg'otishga uringani rost. Shuningdek, bir hafta muqaddam «Jenoa»dan uchralgan mag'lubiyat (0:1) uchun izoh talab qilgan.
Eng qizig'i shuki, muxlislar yaqinda Gallianiga aynan transferlar kampaniyasi bo'yicha e'tiroz bildirgandilar. Yanada e'tiborlisi, ular ham o'ziga xos savolni o'rtaga tashlashgan: «90 mln. evro qaerga ketdi?» Xususan, «Kurva sud» fanatlar guruhi Gallianining yana o'zining agent do'stlari va qadrdoni - «Jenoa» prezidenti Enriko Pretsiozi bilan hamkorlik qilganidan norozi. Chunonchi, Genuyadan yarim himoyachi Yuray Kutska sotib olindi. U hozircha gol urish u yoqda tursin, hattoki, birorta samarali uzatmani amalga oshirgani yo'q. Agar boshqa jamoalarning shu pozitsiyasida to'p suradigan futbolchilari o'yinlariga qarasangiz, «qizil-qoralar» tiffozilariga achinish hissi uyg'onadi. E'tibor bering, «Roma»dagi Pyanich, «Napoli»dagi Allen, «Torino»dagi Bazelli 3tadan gol urishga ulgurishdi.
Aytgancha, La Gazetta dello Sport nash-ri yaqinda «Milan» inqirozi. Bunga kim aybdor?» mavzusida maxsus so'rov o'tkazdi. Unda ishtirok etganlarning 81 foizi ayb rahbarlarda ekanini qayd etdi. Qolganlar esa, murabbiylar yoki futbolchilarni qoralashdi. Muxlislar shubhali transferlardan tashqari, hujumkor yarim himoyachi sotib olinmaganidan ham g'azablanmoqdalar. Ha, «Milan»da negadir bunday futbolchi xarid qilishni unutishdi. To'g'ri, sobiq «armiyachi» - Keysuke Xonda bor, ammo u bu pozitsiyada shunday o'ynamoqdaki, muxlislardan «soxta trekvartist» («soxta hujumkor yarim himoyachi») nomini oldi. O'z o'rnida ma'lumot: yapon futbolchisi shamollab qolgani tufayli «Napoli» bilan bahsda maydonga ham tushmadi.
Allegri bilan omadsizlik, Zeedorf boshqaruvidagi sust ishtirok, Inzagining noshud chiqqani, Mixaylovichning yangi mavsum startini shunchaki, barbod etgani... Ha, «Milan» rahbarlari oxirgi vaqtlarda dahshatli bosim ostida qolishdi. Tiffozilar «Napoli» bilan o'yingacha ham Aredo Braydani klubga qaytarish vaqti kelganini sha'ma qilishdi. U sport direktori lavozimida naq 11 yil ishlaganidan so'ng 2013 yili klub bilan xayrlashgan edi. Muhimi, Brayda davrida «rossonerlar» butun Evropaga dahshat solishardi. Italiya OAV xabarlariga tayansak, Adriano Galliani sobiq sport direktori bilan muzokara ham olib borgan. Brayda ayni payt «Barselona»da ishlayapti, ammo uning shartnomasi 2016 yilning yozida o'z kuchini yo'qotadi.
Qiziq tomoni, «Kurva sud» guruhi 2 yil oldin Braydaning ketishida ham aynan Gallianini ayblagandi. Muxlislarning gumon qilishlaricha, vitse-prezident unga transferlarga bog'liq ishlarda to'liq erkinlik bermagan. Tabiiyki, ayni payt Galliani oldida bir qator muhim vazifalar turibdi: muxlislar bilan munosabatni yaxshilash, klub mavqeini saqlab qolish va albatta, o'z lavozimiga munosibligini isbotlash. Boz ustiga, u hozir 71 yoshda. Bu yoshda xatolarni tan olish qimmatga tushishi hech gap emas. Fanatlar Gallianining endigi harakatlarini qanday baholashadi? Bu savolga Brayda taklifni qabul qilgan taqdirdagina javob olish mumkin.
Manba: "InterFUTBOL" gazetasi
— deya xabar beradi uff.uz nashri.