O'zbekiston kubogi finali oldidan jamoamizning tajribali himoyachisi Maqsud Karimovning fikrlari bilan qiziqdik.

- Finalga doimgidek tayyorgarlik ko'rmoqdamiz. Final bu o'z nomi bilan final. Bu erda kimning ruhiy tomonlama tayyorgarligi kuchli bo'lsa o'sha jamoa g'alaba qozonadi. Biz avval ham finallarda ishtirok etganmiz. Lekin hozircha g'olib bo'lish nasib etmagan. O'sha paytdagi finalda o'ynagan tarkibimizni oladigan bo'lsak, raqib jamoaning tarkibidan kuchsizroq bo'lgan. Oldingi final o'yinlarida jamoamiz g'alaba qozonishga tayyor emasdi deb o'ylayman. Bunga tajribamiz kamligi pand bergan. Lekin hozir jamoamizdagi barcha futbolchilar finalni yutishga tayyorlar deb ayta olaman. Biz nihoyat g'alaba qozonib kubokni boshimiz uzra baland ko'tarishni juda istamoqdamiz. Finalda har ikkala jamoaning imkoniyatlari teng deb bilaman. Bizga ishonayotgan muxlislarning ishonchini oqlab, "Nasaf" tarixida yangi sahifa ochishga harakat qilamiz. Kubokni yutish uchun bizda yaxshigina imkoniyat mavjud va biz bundan unumli foydalanib qolishimiz zarur. Jamoamiz futbolchilari bilan ko'p yillardan buyon birga o'ynab kelmoqdamiz va hozirda bir-birimizni yarimta so'z orqali ham tushunib olishimiz mumkin. Aytoqchimanki, "Nasaf" O'zbekiston kubogini yutish darajasiga etib keldi. "Bunyodkor" jamoasi haqida gapiradigan bo'lsam, ularning hech bir futbolchisini ajratib ko'rsatmoqchi emasman. "Bunyodkor" jamoasining har bir futbolchisi yuqori mahoratga ega. Xavfni butun jamoadan kutish mumkin. Final bitta o'yindan iborat. Finalda jismoniy tayyorgarlik yoki boshqa jihatlar bo'yicha ham kuchli bo'lish kerak, lekin bular baribir ikkinchi darajaga tushib qoladi. Aytib o'tganimdek bu o'yinda kim aqlliroq o'ynasa, ruhiy jihatdan ustunroq bo'lsa va vaziyatlardan to'g'ri foydalana olsa, o'sha jamoa g'alabani ilib ketishi mumkin. Bu erda hozir jamoalarning chempionatda egallab turgan o'rni yoki boshqa narsalar hech qanday ahamiyatga ega emas. Finalda kim kuchliroq o'ynay olsa, yaxshi tayyorgarlikka ega bo'lib, omadi chopsa o'sha marrani zabt etishi mumkin. Imkoniyatlar teng. Biz shu imkoniyatdan maksimum foydalanishga va muxlislarimizni xursand etishga harakat qilamiz.
— deya xabar beradi uff.uz nashri.