So'nggi etti kun ichida futbol ishqibozlari qiziqarli voqea va hodisalar, ajoyib o'yin va kutilmagan natijalar guvohiga aylanishdi. UFF.uz sayti an'anaga sodiq qolgan holda, Evropa yashil maydonlarida bo'lib o'tgan muhim hodisalarga jahon karikatura namoyondalarining ijodlari orqali ta'rif berib o'tadi.
Kavani “PSJ”ni qutqardi
Evropa chempionlari ligasi nimchorak final dastlabki o'yinida “PSJ” o'z maydonida “Chelsi” futbolchilarini qabul qildi. O'yin anchagina qiziqarli va murosasiz o'tdi. Parijliklar safida Edinson Kavani haqiqiy qahramonga aylandi. U zaxiradan maydonga tushib, jamoasiga g'alaba keltirgan gol muallifi bo'ldi.   
Ronaldu – EChLda, Messi esa La Ligada rekordchi
O'tgan hafta “Roma”ga qarshi EChL nimchorak final dastlabki o'yinida ajoyib gol muallifiga aylangan “Real” hujumchisi Krishtianu Ronaldu musobaqadagi gollar sonini 89 taga etkazib, yaqqol to'purarga aylandi. Uning kiritgan har bir goli endi rekord bo'laveradi. “Barselona” etakchisi Lionel Messi esa o'tgan haftada La Ligadagi gollar sonini 301 taga etkazib oldi.
Manchester klublarining omadsizligi
O'tgan haftaning eng kutilmagan va eng hayratlanarli natijasi Daniyada, “Midtyullann” va “Manchester Yunayted” o'rtasidagi o'yinda qayd etildi. Unda mankunianliklar 1:2 hisobida mag'lubiyatga uchragandi. O'yindan so'ng Lui van Gal tanqidlar ostida qolib ketdi. U esa jamoaning mag'lubiyatiga jarohatlar sabab bo'lganini “bahona” qildi.
Manchester shahrining yana bir jamoasi “Manchester Siti” Angliya Kubogi 1/8 finalida “Chelsi”ga qarshi bahs olib borgandi. Manuel Pellegrini nomdor va azaliy raqibiga qarshi kutilmaganda ikkinchi tarkibni tushurdi va bunga qattiq pushaymon edi. London klubi esa 5:1 hisobidagi yirik g'alabani va chorak final yo'llanmasini qo'lga kiritdi.  
Ronaldu katta kinoda rol o'ynamoqchi
Madridning “Real” jamoasi hujumchisi Krishtianu Ronaldu futbolchilik faoliyatini yakunlaganidan so'ng o'zini kinoaktyor sifatida sinab ko'rishini aytib o'tdi. Vaqti kelib u katta kinolarda kichik bo'lsa ham rollar ijro etishni niyat qilib qo'ygan. Bu gaplardan so'ng Messi “kinofilmlarda bosh rollarni ijro etaman” – deb qolsa, ne ajab!?
Luis Enrikening “sehrli quroli”
Luis Enrike “Har bir o'yindan avval Messi, Suares va Neymarga “Abrakadabra” deyman va afsun o'z kuchini ko'rsatadi” – dedi. Ispaniyalik murabbiyning bu gaplari Omar Momani nazaridan chetda qolmadi va u ajoyib karikatura chizdi. Darqahiqat, ushbu uchlik so'nggi paytlarda aqlbovar qilmas sermahsullik ko'rsatmoqa.
“Arsenal” himoyachisi Gabriel o'yindan oldin MSN “trio”sini to'xtatadigan formula bor ekanini aytgandi. Barchamiz guvohi bo'lib turganimizdek, u aytgan formula o'z samarasini ko'rsatmadi va kataloniyaliklar qatorasida 33-o'yinda mag'lub bo'lmay kelmoqda.  
Qolgan qutganlar
“Borussiya” D klubida yorqin o'yinlari bilan ajralib turgan va Jahon chempionati finalida Germaniya terma jamoasiga g'alaba keltirgan Mario Gyottse “Bavariya”da zaxira “qiroli”ga aylandi.  Bir vaqtlar Yoaxim Lyov o'z shogirdini Messiga o'xshatgandi va bu narsa unga ilhom keltirgan. Hozir esa bu gaplar unga hech qanday dalda bermayapti. “Roma” yangi bosh murabbiyi Luchano Spaletti klub afsonasi Franchesko Tottiga asosiy tarkibdan joy bermayotgani ko'pgina bahs-munozaralarga sabab bo'ldi.  Italiyalik murabbiy “Rim imperatori”ni o'yinlardan birida xatto qaydnomaga kiritmadi. Muxlislar ham bunday qarorga norozilik bildirishdi. O'z navbatida, murabbiy faxriy futbolchiga jarohatidan to'liq forig' bo'lishi uchun imkoniyat yaratib berayotganini aytdi.  
P.S.
Sahifada Omad Momani, beINSports hamda Zezo Cartoons karikaturalaridan foydalanildi.
— deya xabar beradi uff.uz nashri.