Raqamlarga mixlangan qahramonlarni hikoya qilishda davom etamiz. Navbat 9-raqamga etib keldi. Bu raqam ostida asosan hujumchilar harakat qilishlarini yaxshi bilasiz. Hujumchi bo'lganda ham, markaziy hujumchilar! Raqib darvozasi oldida tinmasdan zarbalar yo'llaydigan yulduzlarga topshiriladi bu raqam...
Zamonaviy futbolda ham bu raqamning yulduzli vakillari bor: Kosta, Suares, Benzema, Levandovskiy... Lekin hozirgi hikoyamizdan o'rin olgan afsonalar o'z ishlarini allaqachon amalga oshirib bo'lishgan. Ular shu libosni, shu raqamni xotiramizga o'chmaydigan qilib muhrlab qo'yishgan. Ro'yxatning ne sababdan o'nlikmas, balkim to'qqizlikdan tashkil topganini esa yaxshi tushungan bo'lsangiz kerak?!
9. Fernando TORRES. Ispaniya.
Ro'yxatimizda hozirda to'p surayotgan yagona yulduz bor. O'shandan boshlaymiz.
Ispaniya osmonida porlab chiqqan Fernando Torres Evro-2008 finalida birgina harakati bilan tarixga kirgan, birgina harakat... Uning Germaniya posbonidan bir qarich ilgariroq to'pga etib kelishi natijasida, Ispaniya ko'hna qit'a chempioniga aylana oldi. Tamom – shundan keyin “qizil furiya”ni to'xtatib qolishning imkoni bo'lmadi.
Ikki yildan so'ng jahonni zabt etgan o'g'lonlar navbatdagi Evropa kubogini ham boshlari uzra ko'tardilar. To'g'ri, JARdagi mundialda qahramonimiz jarohati tufayli u qadar yuksak o'yin ko'rsata olmagan bo'lishi mumkin, lekin Ukrainadagi Evro turnirida, so'nggi o'yinda gol urib, tarix sahifalariga “qatorasiga ikki finalda gol urgan o'yinchi” sifatida joylandi.
Torres zamonaviy Ispaniya futbolida yangi hujum asrini ochib bergan, desak mubolag'a ishlatmagan bo'lamiz. Raul paytida Raulga o'xshab nozik harakat qiladigan avlod o'tmish qa'riga singib ketgach, buyog'iga ispanlar aynan shu yigit timsolida tezkor hujum uslubiga ega bo'lishdi. Bu esa qator musobaqalarda naf berganini ko'rdik, tabiiyki, shunday ajoyib hujumchiga afsonaviy to'qqizinchilar ichidan joy topib bermaslikdan hayo qildik!
8. Ivan SAMARANO. Chili.
Chili tarixidagi eng kuchli futbolchilardan biri – Ivan Samarano 9-raqamning eng sodiq vakillaridan biri ham. U deyarli hamma jamoada shu raqam ostida o'ynagan.
1998 yili “Inter”da qiziq voqea sodir bo'lganidan ko'pchilikning xabari bor. Jaamoa safiga shu raqamning boshqa bir “egasi” – braziliyalik Ronaldo kelib qo'shiladi. Tabiiyki, Ivan dunyoning o'sha paytdagi tengsiz yulduziga jonajon raqamini topshirishga majbur edi. Shunda... six ham, kabob ham kuymaydigan o'rta bir yo'l topiladi: Samarano hech kim kiymayotgan “18”-raqamni oladi va “1” bilan “8” orasiga “qo'shuv” (plyus) belgisini yozdirib qo'yadi = 9!
Qo'shuv belgisi bo'lmaganida ham, 18 ning yarmi 9 bo'lardi, demakki, u bir paytning o'zida  ikkita 9-raqamga ega hisoblanardi...
Shaxsan menga Samaranoning Chili terma jamoasidagi 9-raqami qo'rqinchliroq ko'rinardi. Shu libosi topilsa, sotib ham olardim...
7. Alan ShIRER. Angliya.
Angliya terma jamoasi va “Nyukasl” klubining eng kuchli to'qqizinchi raqami!
To'g'risini aytsam, hech ham uni futbolchiga o'xshata olmayman. Kostyum-shimda yuradigan, papka qo'ltiqlab olguvchi galstukli ziyoli shaxsga o'xshaydi. Mana shu ko'rinish bilan ham u maydonda, tag'in, hujum chizig'ida o'ynaganiga aqlim bovar qilmay turaveradi.
Gol urish borasida ham Shirerning harakatlari g'alatiroq edi. Qanaqaligini bilmaymanu, ammo markaziy hujumchilarga sira o'xshamasdi. Biroq, gol uraverardi. Golni nishonlashi ham jentelmenchami-ey...
“Nyukasl” umrbod o'rtamiyonalikdan chiqa olmagan bo'lsa-da, grand jamoalarning super himoyachilari Alandan qo'rqib yashashgan. Hamma ko'rgan buni.
Terma jamoadagi eng yorqin mavsumi sifatida 1996 yilgi Evropa chempionatini esga olamizu, shunda ham uyida o'tgan musobaqada finalsiz qolganiga hayron turaveramiz. Alamli holat, a?
Xullas, ushbu ro'yxatimizning eng omadsiz hujumchisi aynan Alan ekan. Aytishga arzirli kubok yo'g'-u, gol urish borasida to'xtash nimaligini bilmaydigan daho! Qizig'-a?!
6. Jan-Per PAPEN. Frantsiya.
Biz shu yigitning gollarini ko'rib o'sganmiz.
Jan-Per Papenga qarasangiz, frantsuzlarning komik aktyorlarini ko'rgandek bo'lasiz: kichkina, kulgiliroq bashara. Ammo bu kulib turgan chehra ostida yovvoyi bir tezlik va gol sezish qobiliyati yashiringan ediki, uni faqatgina so'nggi zarbani yo'llayotgan paytda ilg'ardingiz. U darvozabonni deyarli aldab o'tirmagan - aniq va kuchli zarba bilan hammasini tinchitib qo'yishga o'rgangan yulduz edi. Frantsiya terma jamoasi 1986 yili bronza medal sohibi bo'lganida, Papen ilk bora muxlislarga “tanishtirilgan”, tajribasiz o'yini evaziga mamlakati tomonidan rosa mazax qilingandi. Bu masxaralarga hujumchi munosib javob berdi. (Shu erini bizning Fominimiz o'qisin!) O'z ustida tinmay ishladi. Ikki-uch yildan so'ng, “xira yulduz” superforvardga aylanib ketdi.
Qatorasiga 5 marta Frantsiya chempionati to'purari bo'lgani etarli faktdir! U paytda bu yurt birinchiligi juda kuchli bo'lardi...
Papenning eng katta yutug'i – kuchli zarbasi va imkonsiz nuqtalardan ham to'pni darvozaga aniq yo'llayverishi edi. Jahon futbolida faqat Marko van Bastengina bu aniqlikka erisha olgan, xolos. Chiroyli gollarini-ku, gapirmay qo'ya qolay. “Bavariya”ga o'tgan mavsumida, ilk bahsidayoq “qaychi” uslubida yo'llagan to'pi bir yil futbol roliklarini bezab bergan. Vaholanki, o'sha mavsumning asosiy vaqtini qahramonimiz kasalxonada o'tkazgan edi.
Va nihoyat unga 1991 yili “Oltin to'p” topshirildi. Afsuski, uch yil o'tgach, sheriklarining qo'pol xatosi tufayli AQShdagi mundial Frantsiyasiz o'tishi aniq bo'ldi. Bu esa uning faoliyatidagi eng muhim turnir bo'lishi kutilayotgandi, afsus!
5. Jorj VEA. Liberiya.
“Liberiya jahon chempionatiga boradi, qachonki uning tarkibida 11ta Vea bo'lsa!” Bu mashhur fraza 90-yillar boshida yangragan. Sabab esa oddiy - Jorj Veadek dahoning butun faoliyati klub bilan bog'liq bo'lib qolgani! Liberiya tarkibida u Robinzon Kruzo yanglig' yolg'iz edi.
1995 yili dunyoning eng yaxshi futbolchisi bo'lgan qora tanli yulduz “kichik jahon chempionati” bo'lmish A seriyada nimalar qilib tashlaganini esdan chiqarmagandirsiz?
Agar yosh avlodda: “Iya, u nima qilgan ekan-a?” degan savol tug'ilsa, 20 yil oldingi futbolni diqqat bilan kuzatgan katta avlod vakillaridan so'rab olishsin. Yoxud, butun maydonni bir o'zi bosib o'tib, raqib jamoa vakillarining HAMMA VAKILIni bittama-bitta aldab turib urgan golini youtubedan ko'rib olishsin! Bu golni ko'rmaslik mumkin emas.
Ha, faqat klubdagi raqam bilan ham shu ro'yxatdan joy olish mumkin...
4. Gabriel BATISTUTA. Argentina.
Gabriel Omar Batistutaning 9-raqami Florentsiya shahrini bezab turibdi. Haykal o'rnatilgan unga. Argentina terma jamoasidagi libosi ham mamlakat faxriga aylanayozgan.
Bati-gol yoshligidanoq iqtidori yaqqol ajralib qolgan, deyishadi. U futboldan tashqari voleybol ham o'ynagan, basketbol ham. Bu sport turlarining hammasida Gabrielning birgina jihati bo'lardi, deyishadi – u gol urmaslikni bilmasdi.
Batistuta GOL degan so'zning sinonimidir! Italiyaning eng kuchli darvozabonlaridan biri Palyuka u haqda shunday degan ekan: “Ko'p zarbalarining golga aylanishiga bitta sabab bor – u yo'llagan to'pni darvozabon ko'rmay qoladi. Imkonsiz!”
To'qqiz yil “Fiorentina”da o'ynagan hujumchi klubdan ketishida ham qadrdon Florentsiyasini moliyaviy inqirozdan qutqarib ketgan. “Roma”ga borib, Italiya chempioni bo'lgan nihoyat. Yangi jamoasi tarkibida “Fiorentina”ga kechgan o'yinda, sobiq jamoasiga gol urib, florentsiyalik muxlislar quchog'ida yig'lagan Batistutani men hech qachon unuta olmayman. Bu ham, Palyuka aytganidek, imkonsiz!
3. Patrik KLYuYVERT. Gollandiya.
Gavdali futbolchilarning to'p bilan nozik muomala qilishlariga qoyil qolaman. Patrik Klyuyvert ana shunday noyob iste'dod egalaridan biri edi. Gollandiyalik ajoyib hujumchini men “futboldagi Tayson” deyman. Maydondan tashqaridagi bezoriliklarini nazarda tutyapman... Yashil maydonda esa u raqiblarining sho'rini qurituvchi “gol mashinasi” edi.
“Ayaks”ning “oltin avlod”iga mansub hujumchi katta futbolga qanday kirib kelgani ham yodingizda bo'lsa kerak?! 1995 yilgi EChL finalida “Milan” darvozasiga urilgan yagona gol yoshgina Patrikka tegishli edi.  
“Barselona” libosidagi va terma jamoadagi “to'qqizligi” bilan uning siymosi yanada ulug'lashadi. Ayniqsa, bosh bilan yo'llaguvchi zarbalarini takroriy lavhalarda takror-takror ko'rgisi keladi odamning. Ah-ha, esingizga tushdi-ya - qo'llar oyoq bilan sinxron harakatlanar, lab tishlangan, bosh esa to'pning yo'nalishini golga aylantirardi...
Men negadir haligacha Gollandiyaning “oltin avlodi” 1998 yilgi mundialda chempion bo'lishga haqli edi, deb hisoblayman. Braziliyaga boy berilgan bahsda Klyuyvert o'zining ajoyib goli bilan yodda qolgan, biroq “la'nati” penaltilar seriyasi...
2000 yilgi Evropa chempionatida ham Patrik vatandoshlarini xuddi shu seriyada “skuadro adzurra” dog'da qoldirib ketgan. O'sha yili ham eng chiroyli o'ynagan terma jamoa Gollandiya edi.  Umuman olganda, Klyuyvertning ketishi bilan o'sha avlod ham tugadi. Buyog'iga Robbenlar avlodi tayyorgarlik ko'rayotgan edi...
2. Alfredo DI STEFANO. Vengriya.
Oldinlari qiziq bo'lardi. Buenos Ayresda tug'ilgan va ikki yil oldin Madridda vafot etgan Alfredo Di Stefano turli yurt terma jamoalari tarkibida to'p surgan: Argentina terma jamoasida 6ta o'yin (6ta gol), Kolumbiya terma jamoasida 4ta o'yin, Ispaniya terma jamoasida 31ta o'yin (23ta gol)... Hammasida u o'zining suyumli 9-raqamida o'ynaganiga nima deysiz endi?!
Di Stefano - FIFA tomonidan o'tkazilgan 20-asrning eng yaxshi futbolchilari ro'yxatida Pele va Maradonadan keyingi o'rin egasi. U futbol tarixida “ortga qaytib o'ynovchi ilk hujumchi” hisoblanadi.  
Uning transferi eng katta janjalli voqea sifatida esga olinadi:
...Di Stefano Ispaniyaga “Barselona” bilan shartnoma imzolagani keladi. Shartnoma imzolangach, birdan pul masalasida janjal ko'tariladi. Keyinroq ma'lum bo'lishicha, o'rtaga Santyago Bernabeu (“Real” prezidenti) hiyla yo'li bilan aralashib, unga shartnoma taklif qilgan va shuning oqibatida Di Stefano tomondagilar “Barsa”dan ko'proq pul talab qilishgan. Alfredo bir paytning o'zida ikki shartnomalik o'yinchiga aylanib qoladi. Keyin, bu vaziyatdan chiqib ketish uchun uni “Yuventus”ga sotib yuborishmoqchi bo'lishadi, turinliklar esa uni kimdan sotib olish kerakligini so'rab ariza yozishadi. Ispaniya futbol uyushmasining qarori bilan Di Stefano ikki yil “Real”ga, ikki yil “Barsa”ga o'ynab berishi tasdiqlanadi. Kataloniyaliklar o'z ulushlarini Madrid jamoasiga sotishadi. Xullas, oxiri Di Stefano qirollik klubi a'zosiga aylanadi.
Uzoq janjalli voqealardan so'ng, qaymoqranglilar unga 9-raqamni berishgan. Bu libos bilan u nimalar qilib yuborganiga bir qarang:
8 karra Ispaniya chempioni va 5 marta Evropa chempionlar Kubogi sohibi!
Hozirda “Real”dagi “9-raqam” abadiyga Di Stefanoga topshirilgan...
 
1. RONALDO. Braziliya.
Di Stefanodek buyuk darg'ani ikkinchi o'ringa tushib turishga majbur qilgan o'g'lon argentinalik afsonadan farqli ravishda 9-raqamini asosan TERMA JAMOASIda mashhur qilgan. Bu o'sha, biz bilgan braziliyalik Ronaldodir.
Ochig'i, men bu hujumchini maqtab o'tirgim yo'q. Baribir siz bu ro'yxatda uning tengsizligini bilasiz. Oddiy bir taklif bildirish ila masalaga nuqta qo'ymoqchiman: Oldingizda mana shu to'qqizta o'yinchining to'qqizinchi raqamli liboslari turibdi. Bittasigina sizga sovg'a qilinadi... Qaysi birini olasiz?
Nima? “Sariq rang ko'zni qamashtirib yuboryapti...”, deysizmi?! To'g'ri qilasiz, to'ppa-to'g'ri!!! Xayrulla Hamidov
— deya xabar beradi uff.uz nashri.