Qisqa faoliyatim davomida dodamdek sodda va kamtarin insonni ko'rmadim. U xuddi yosh bolaga o'xshaydi – beg'ubor. Yoniga ozgina shirinlik qo'ysangiz – u ayniqsa, ho'l-meva bo'lsa, shodligi ichiga sig'maydi. Yoshligi mana shu meva kabi shirin o'tmagan, buni uning hikoyalaridan bilaman. Biroq bugun shu maqolani o'qisa, yillar davomida qilgan mehnatlarining mahsulini balki bir kunda ko'rgandek bo'lar, qaydam... Millionlab muxlislar qalbidan joy olishiga mana shu kamtarligu soddaligi sabab emas deb, kim ayta oladi? U hali ham orzulari og'ushida yuradi. O'zining uy muzeyi bo'lishini, futbolimizning yuz yillik tarixida o'tgan qadrdonlari haqida so'nggi hikoyasi chop etilishini, nabira va evaralaridan iborat futbol jamoasi bo'lishini-yu, O'zbekiston terma jamoasi bilan jahon chempionatiga borish haqida shirin xayol suradi. U bu istaklarini bir necha yillardan buyon takrorlaydi. Aqlimni tanibmanki, mashina, uy-joy, boylik yoki obro' haqida aytgan birorta fikriga duch kelmadim. Borgan erida izzat va hurmatda ekaniga sabab ham aslida shu emas deb, kim ayta oladi? Roppa-rosa yigirma yil oldin besh yuz kishiga yuzlanib barcha nabiralar to'rt qatordan she'r aytib bergandik. O'zimning to'rtligim hech qachon yodimdan chiqmaydi:   Hozircha siz tufayli, Gazetlarda chiqdim ko'p. Biroz ulg'ayib hali, Shuhratga shon qo'shay xo'p!   Oradan shuncha vaqt o'tdi, ko'p suvlar oqib ketdi. Dodam hozir futbol ishqibozlarining kumiri bo'libgina qolmasdan, millionlar o'yini tarixi haqida hikoya qila oluvchi kam sonli kishilar qatorida e'tirof etiladi. Bir qator do'stlarini ko'zidagi yoshi bilan ko'pga qo'shib ulgurdi. Ha, u juda oson yig'laydi, qalbida g'ubor to'planib qolmaganidan bo'lsa kerak. Birorta 11 avgust yo'qki, men uning ko'zlari namsiz ekanini ko'rgan bo'lsam. Futbol uchun qo'lidan kelgan hamma yaxshilikni qildi. Barchasini bir chetga surib turgan taqdirda ham, otamni, amakimni, ularning ketidan meni tarbiya qildi. Ilgari o'sha gazetlarda dodam bilan suratlarim ko'p bosilardi, bugun men o'rnimni uning evaralariga bo'shatib berganman. Hozir eng katta orzularidan biri katta o'g'lining katta o'g'lidan bo'lgan evarasi bilan suratga tushib qolish. Men esa uning kichik nabirasi farzandlarini ham ko'rishini istardim. Aqlimni tanib, oyoqqa qanchalik turib olmay, hozircha dodamsiz hayotimni tasavvur etib ko'rmaganman. Bugun u 80 yoshga qadam qo'ydi. Endi yonida suyuklisi, doimo unga qalbim deya murojaat qiladigani oyim yo'q. Axbor Imomxo'jaevning bugunida rahmatli oyimning hissasi benazir ekanligini ko'pchilik yaxshi biladi. Dodam 80 yoshida ham haftasiga uch marta futbol o'ynaydi, suzish bilan shug'ullanadi, ijod qilishda davom etadi. O'zi ziyorat yoshida bo'lishiga qaramay, zerikkan kuni 4 ta non ko'tarib, sog'ingan yaqinlarining uyida mehmon bo'ladi. Kattaga ham, kichikka ham birinchi bo'lib o'zi salom beradi. Misqollab to'plagan obro'si botmonlab ketib qolmaganiga mana shu kamtarligi sabab ekanini men ongli ravishda tushunaman. Dodam menga ism qo'ygan, dodam birinchi marta stadionga olib borgan, birinchi suratim ham dodam bilan bog'liq, Siz hozir unga qarab turibsiz. Men har safar unga termulganimda, dodamni qanchalik sevishimni his etaman. Bugunim qanday bo'lishidan qat'iy nazar, shu insonning avlodi ekanimdan, uning suyukli nabirasi ekanimdan faxr his etaman, g'ururlanaman. Dodam uchun hech narsa qilmadim, qilganim – 80 yoshida ham televideniedan chiqarib yuborishlariga sababchiligim. Ammo aniq bilaman, bunda u o'z mehnatlariga achinmadi, bir og'iz so'zi bilan bergan tarbiyasi beiz ketmaganidan xursandligini aytdi. Bundan og'ir vaziyatda ham nabirasining yoni bo'lishini bilardim, shunda ham uni sevmay bo'ladimi? Dodam men uchun fenomen, u olov, biz esa undan keyingi cho'g'chalarmiz, xalos. Dodam xalq mehrini halol mehnati bilan qozona olgan sanoqli kishilardan biri, dodam o'zidan keyingi avlodga to'g'ri yo'lni ko'rsata olgan inson. U 80 yoshida orzularidan birini amalga oshirishga ahd qilgan. Shu hafta nabiralaridan iborat futbol jamoasi birinchi marta zalga chiqadi. Ular uchun sotib olgan formalarini ko'rib qolganimni u hali bilmaydi, o'yindan bir kun oldin berishni niyat qilib, bu haqda fikrlarini oq qog'ozga tushirgani-yu, shumligim tutib uni o'qib chiqqanimdan ham xabari yo'q. Uning xarakteri shunaqa – ko'pchilik, yubileyida sovg'a-salom olishga tayyorlansa, dodam o'sha kuni nevara-yu, evaralariga sovg'a ulashishni niyat qiladi. Bu yil uning yangi kitobi bosmadan chiqadi, shu ish bitmagunicha necha yildirki, kechalari xotirjam uxlay olmaydi. Muzey uchun xonasining yonidan joy ajratib qo'ygan. Shular qatorida O'zbekiston terma jamoasi ham jahon chempionatiga yo'l olsa, u bilan birga Rossiyaga borishni maqsad qilib qo'yganman. Men uni emas, u meni Moskvada aylantiradi. “Paxtakor” o'yinlari sabab hatto Moskva ko'chalari ham unga yod bo'lib ketgan, uni o'sha rus diyorida ham tanishadi. Men uning shuhrati uchun emas, halol, kamtar, to'g'riso'z, mehribon, kechiruvchan, pokiza, beg'ubor insonligi oldida bosh egaman. Baxtimga hamisha yonimda bo'ling, doda!  Diyor IMOMXO'JAEV izhori
— deya xabar beradi uff.uz nashri.