Frantsiya yashil maydonlarida o'tkaziladigan 15-Evropa chempionati boshlanishiga to'rt oydan kamroq vaqt qoldi. «Chiptani qaerdan olsa bo'ladi?» hamda «Evroga borish qanchaga tushadi?» kabi savollar hozirdan dolzarblik kasb etmoqda. Savol tug'ildimi, demak uning javobi ham bor. «SE» muxbiri shuni inobatga olib, ko'hna qit'a chempionati chiptalari haqida faktlarni to'plashga kirishdi. Quyida ana shu ma'lumotlar hukmingizga havola etiladi.
OChIQ VA YoPIQ SAVDO
Evropa chempionatiga borish istagini bildirganlar soni shu qadar ko'pki, bu omil UEFAni chiptalar sotuvini bir nechta bosqichda amalga oshirishga undadi.
2015 yilning 10 iyunidan to 10 iyuliga qadar davom etgan 1-bosqichda bir milliondan ko'proq muxlis Evro-2016ga borish huquqini qo'lga kiritishdi. UEFA yo'lga qo'ygan maxsus kvotaga ko'ra, jahondagi barcha ishqibozlar chipta xarid qilish imkoniyatiga ega bo'ldilar. E'tiborlisi, birinchi kunning o'zidayoq 317tadan ortiq «zayavka» kelib tushgan.
Chiptalar sotuvining 2-bosqichi esa, mos ravishda, faqat qit'a chempionatidagi ishtirokchi davlatlar ishqibozlariga ataldi. Ushbu jarayon 2015 yilning 14 dekabridan 2016 yilning 18 yanvariga qadar davom etdi.
EVRODA BAHOLANGAN EVRO
UEFA stadionlardagi joylarni to'rtta toifaga ajratdi. Eng arzoni - darvozalar ortidagi yuqori va pastki sektorlar. Bu erga chiptalar narxi 25 evrodan belgilandi. Aynan shu tribunaning o'rta qismida joylashish muxlislarga 55 evroga tushadi. Burchak tomonda o'tirishni xohlaganlar 105 evrodan to'lashadi. Nihoyat, birinchi toifa chiptalari - markaziy tribunaning markaziy sektoridan joy olish - 145 evroga narxlangan. Gap guruh bosqich o'yinlari haqida bormoqda. Final bahsida chiptalar narxi 85dan 895 evrogacha baholanadi.
Ta'kidlash joizki, Evro-2012da narxlar nisbatan pastroq bo'lgan. Ayniqsa, bu «pley-off» bahslariga taalluqli. Vaholanki, o'shanda UEFA chiptalarni uchta toifaga ajratgandi. Ularning eng qimmati - final uchrashuvi chiptasi 600 evrodan sotilgan. Guruh bosqichidan keyingi bahslarda esa ishqibozlar stadionga kirish uchun 50dan 330 evrogacha sarflashgan.
Chiptalar shuningdek, paketlarga ajratilgan:
- Individual - bitta stadionda bitta o'yin.
- Stadionga oid - bitta arenada ikkita uchrashuv.
- «Jamoa ortidan» (3tadan 7tagacha o'yin) - 2015 yildan kuchga kirib, muayyan milliy federatsiyalar ishqibozlari tomonidan band qilingan.
HOTAMTOY UEFA
Tashkilotchilarning va'da berishlaricha, Evro-2016ning 85 foiz o'yinlari (51tadan 43tasi)ga 25 evro evaziga kirish mumkin bo'larkan. Shunday narxdagi chiptalar 210 ming nusxada chiqarilgan. 895 evrolik chiptalar soni esa atigi 25 mingtani tashkil etadi.
Navbatdagi ko'hna qit'a chempionatining har qaysi uchrashuviga kirish uchun 100 evrodan ozroq mablag' sarflash kifoya. Bundan tashqari, UEFA 20 ming nafar imkoniyati cheklangan bolalarni o'yinlarga taklif etadi. Mazkur tadbir yaqinda asos solingan UEFA Bolalar fondi hamkorligida tashkil etilgan «Evro-2016 uchun 20 mingta tabassum» ijtimoiy dasturi asosida amalga oshiriladi.
Davomi InterFUTBOL gazetasi blogida.
— deya xabar beradi uff.uz nashri.