Yunon-rim kurashi bo'yicha O'zbekiston terma jamoasining etakchilaridan biri, 2015 yilning 7-12 sentyabr kunlari Las-Vegas shahri (AQSh)da bo'lib o'tgan Jahon chempionatida kumush medalni qo'lga kiritib, "Rio-2016" Olimpiada o'yinlari yo'llanmasiga ham ega bo'lgan Rustam Assakalov o'zining bugungi kundagi jismoniy holati va 18-20 mart kunlari Qozog'iston poytaxti Astana shahrida o'tkaziladigan litsenzion musobaqada oldidan olib boriladigan o'quv-mashg'ulot yig'inlarining ahamiyati haqida to'xtalib o'tdi.
“Bugungi kunda tizzamdan olingan jarohatdan so'ng tiklanish jarayoni ketmoqda va mashg'ulotlarga to'liq kirishib ketish uchun yana ikki uch hafta kerak davolanishim kerak. Ayni paytda funktsional holatim ustida ishlayapman. O'ylaymanki, qisqa fursatda avvalgi holatimni tiklash uchun qiyinchiliklar bo'lmaydi. Mart oyining boshida terma jamoa bilan Astana shahrida o'tkaziladigan yig'inga jo'nab ketaman. Ushbu mashg'ulotlar men uchun Olimpiada o'yinlari oldidan tayyorgarlikning muhim bosqichi bo'ladi.
Albatta, o'quv-mashg'ulot yig'inidan so'ng bu erda o'tkaziladigan litsenzion musobaqada jamoadoshlarimni qo'llab-quvvatlayman. Ishonamanki, ularning ayrimlarida mazkur musobaqada muvaffaqiyatli ishtirok etib, yo'llanmalar sonini ko'paytirish uchun imkoniyatlari yuqori. To'rt yillikning eng yirik sport o'yinlari oldidan Germaniya yohud Polshada o'tkaziladigan nufuzli turnirlarning birida ishtirok etaman”, - deydi Rustam Assakalov.
Biz ham o'z navbatida mamlakatimiz polvonlariga bo'lajak musobaqalarda omad va zafarlar tilab qolamiz. Shavkat Jalilov O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.