Balki, men adashayotgandirman, lekin shu paytgacha biror kishidan: “Falon jamoaning murabbiyi kelib, falon mahalladan futbolni zo'r o'ynaydigan falonchini tanlab olib ketibdi...” degan gapni eshitgan joyim yo'q. Sport sohasida ozmi-ko'pmi qalam qitirlatganim uchun vodiyning mahallalar o'rtasida bo'ladigan musobaqalarga ham taklif qilib kilishadi.
Vaqtim, imkoniyatim bo'lsa, albatta boraman. Eh-he, chekka qishloqlarda yombi kabi charaqlab turadigan iqtidor egalarini ko'pini ko'rdim. Biroq, ularning kelajagi o'sha joydagi juda borsa, tuman miqyosidagi turnirda yakuniga etadi. Maydon markazidan to'pni tepib, to'g'ri darvoza joylaydigan, futbolni tiyrak tushunadigan yosh futbolchilar rosa ko'p bizda...
Kichik yoshdagi futbolchilar o'rtasidagi turnirlar, viloyat birinchi va ikkinchi ligasi o'yinlarida hali birorta oliy liga jamoalari selektsionerlarini ko'rmadim. Qarangki, 2015 yilgi jahon chempionati final bosqichida eng ko'p to'p kiritgan Miroslav Kloze 21 yoshigacha qurilishda g'isht tergan bo'lsa, Dado Prsho avtomexaniklik qilgan, Jey Demerit esa barda mijozlarga kokteyl tayyorlagan ekan.
Alqissa, bugungi maqolam jahon futboliga ko'chadan kirib kelgan futbolchilar haqida.
Dado Prsho
21 yoshida - oddiy avtomexanik
29 yoshida –Frantsiya chempioni, chempionlar Ligasi finalchisi
Xorvat 2000 yillar boshida barchani hayratga solgandi. “Monako”ning Frantsiya chempionati g'olib chiqishi hamda chempionlar Ligasi finalchisiga aylanishida hujumchining xizmati katta bo'lgan. Aslida, Dado bu yutuqlarga erishishini besh yil avval o'ylab ham ko'rmagan bo'lsa kerak.
1995 yili 21 yoshli Prsho avtomexanik bo'lib ishlab, bo'sh vaqtlarida “San-Rafael” havaskorlik klubida to'p surar edi. Xorvatni 90-yillar oxirida “Monako”ni boshqargan Jan Tigananing o'tkir ko'zi katta yo'lga olib chiqqan. Frantsuz mutaxassisi monegasklar rahbariyatiga uni tavsiya qilib, iqtidor egasi bilan ikki yillik shartnoma tuzishga erishadi. Klub uni o'yin amaliyotini oshirish uchun ikki mavsumga “Ayachcho”ga jo'natib, 1999-yili qaytarib oldi. Prsho ilk mavsumni o'zidayoq “Monako”ga shu paytgacha so'ngi bo'lib turgan chempionlikni qo'lga kiritishda yordam bergan.
Miroslav Kloze
20 yoshida – qurilishda g'isht teruvchi
36 yoshida – jahon chempionati final bosqichlarining eng zo'r to'purari
Polshalik immigrantlar bo'lgan Mironing ota-onalari –– futbolchi Yozef Kloze va gandbolchi Barbara Yoj o'z o'g'lining bor e'tiborini hayotida tirikchilik uchun qoqilmaydigan bo'lib ulg'ayishiga qaratishadi. Uni hunar o'rganishga beradilar. Kloze bolaligidan duradgor va yog'ochga naqsh solish kurslariga borib, turli stanoklarda ishlab ulg'aydi. U darslardan bo'sh vaqtlarida futbol maktabiga ham borib turardi.
Kloze 21 yoshida Bundesliganing beshinchi divizionidagi «Kayzerslautern»ning ikkinchi jamoasida paydo bo'ldi. Miro g'isht teruvchilik bilan futbolchilikni birvarakayiga olib borishni o'rniga qo'yib bir mavsumda 11 gol kiritishni ham uddaladi. Nemis hujumchisi uchun raqib darvozasiga gollarni terish xuddi g'isht terishdek osongina yumush edi, go'yo. Buni qarangki, Kloze faoliyatining so'ngida jahon chempionati final bosqichlarining eng zo'r to'purariga aylandi.
Edin Jeko
19 yoshida – chex ikkinchi divizioni o'yinchisi
28 yoshida – Angliyaning ikki karra chempioni
Ko'rimsizgina bosniyalik yigitchani jahon miqyosidagi hujumchi bo'lib etishishi uchun tengdoshlaridan ko'ra ko'proq vaqt ketgan. Edin 19 yoshida chexlarning ikkinchi divizionidagi «Jeleznichar» klubining yarim himoyachisi edi. U tengqur Serxio Aguero bu yoshda “Atletiko”ning asosiy tarkibida o'ynar, Stevan Yovetich “Fiorentina” birinchi jamoasiga qabul qilingan, Xesus Navas esa “Sevilya”da gol urishni boshlagandi. Jeko uchun kamtarona “Teplitsa”dan tushgan taklif ham yuqoriga tomon qanot qoqish yo'lida katta qadam bo'lgan. U bu klubda ikki mavsum o'ynab, 30 uchrashuvda 13ta gol kiritdi va Gambrinus-liga to'purariga aylandi. Bu muvaffaqiyat undagi ko'rinmas qalpoqni echib, Edinga 2007-yili “Volsburg” bilan shartnoma imzolash imkonini berdi. Xorvatiyalik futbolchi shundan keyin Evropa futboli VIP-hududidan hech qayoqqa ketmagan.
Emanuele Jakkerini
23 yoshida – “S” seriya o'yinchisi
28 yoshida –ikki bora Italiya chempioni, Evropa chempionati kumush medali sovrindori
Italiyalik futbolchining faoliyati yomon boshalanmagan edi: 19 yoshida u “V” seriya a'zosi “Chezena” bilan shartnoma tuzgan. Biroq, yigitcha “dengiz otlari” safida bitta ham maydonga tushmay “S” seriyada uzoq muddat qolib ketdi. Emanuele quyi ligada «Forli», «Bellariya-Ijea-Marinu» va «Paviya» singari mashhur bo'lmagan klublar sha'nini himoya qilgan. Qarangki, “Chezena”ning o'zi uchinchi divizionga tushib ketadi. 2008 yili Jakkerini jamoaga qaytib, ikki mavsum “Chezena”ning “A” seriyasiga qaytishiga yaqindan yordam bergan. Emanuele Italiyaning bosh ligasidagi debyut o'yinini 25 yoshida o'tkazgan. Shundan so'ng u “Chezena”ni “Yuventus”ga almashtirgan. So'ng ikki bora Italiya chempioni, Evro-2012da kumush medal sohibi, 2013-yilda Konfederatsiyalar Kubogida muvaffaqiyatli ishtirok etib, Tumanli Albionni zabt etish uchun yo'l oldi va “Sandarlend” futbolchisiga aylandi.
Di Jey Kempbell
25 yoshida katta futboldan uzoq bo'lgan
29 yoshida - “Blekpul” safida Premer-liganing eng zo'r to'purari
2000 yili “Aston Villa” maktabini tugatgan 18 yoshli Kempbell Angliyaning ettinchi divizionida to'p sura boshladi. Uning faoliyati “Yunayted”da - biz biluan Manchester, Nyukasl yoki Lids jamoasi emas, balki 20 000 ming kishi istiqomat qiladigan Cheshemi shahridagi shu nomli klubda boshlangan. “Stivenidj Boro”, “Billeriki Taun”, “Yiding” – Di Jey 25 yoshigacha mana shunday taniqli bo'lmagan jamoalarda o'ynadi.
2005 yili Kempbell 1-ligada paydo bo'lgach, uni “Brentford” murabbbiyi Martin Allen payqab qoldi. Di Jeyning Angliya Kubogida “Sandrlend” ga urgan ikkita goli va 1-liganing eng zo'r o'yinchisi deb tan olinishi, uni katta shartnoma asosida sotilib ketishiga asos bo'lgan.
O'zining ko'p yillik faoliyati davomida Angliyalik o'yinchi Premer-ligada to'rt mavsum to'p surib, “Manchester Yunayted”, “Nyukasl” va “Tottenxem” darvozalariga gol kiritgan.
Karlos Bakka
20 yoshida - avtobus haydovchisi
27 yoshida – Kolumbiyaning ikki karra chempioni, Evropa Ligasi g'olibi
Karlos 20 yoshida tong sahar uyg'onib, Kolumbiyaning Puerto Bolivar shahridagi avtobus saroyi tomon oshiqar va 15 soat vaqtini yo'lovchilar tashish bilan o'tkazar edi. Yigit o'z hududi jamoasida o'ynar va futbolchi bo'lishdan allaqachon ko'nglini uzgan bo'lib, to'p tepishni tashlashni o'ylab qolgandi. Lekin, baxtli tasodif ro'y berdi... Doimgiday, yakshanba kungi o'yinlardan birida Bakka to'rt-beshta gol urganida, u “Barrankilya” murabbiyi David Pinilosning e'tiborini qaratgan. Natijada – Kolumbiya “B” Primerasi eng zo'r to'purarligi, “Atletiko Xuniors”bilan shartnoma, chempionlik va oliy liganing eng zo'r goleadorligi... Endi Bakka Kolumbiya milliy terma jamoasiga chaqiriladi.
2012 yili Karlos Belgiyaga yo'l olib, “Bryugge” bilan shartnoma imzolagan. Futbolchi Belgiyada ham chempionatning eng zo'r to'purariga aylanib, 2013-yili “Sevilya”ga o'tdi. Uning o'tgan mavsumdagi “Real” darvozasiga urgan ikkita goli, Evropa Ligasi finalida g'olib bo'lganligi yuksak iqtidoridan dalolat.
Ule Gunnar Sulsher
21 yoshida – Norvegiya uchinchi divizioni o'yinchisi
34 yoshida – Angliyaning olti karra chempioni, Chempionlar Ligasi g'olibi
1991 yili norvegiyalik futbolchi 19-yoshni qarshilagan edi. U harbiy xizmatni tugatishi bilan uchinchi divizion jamoasi “Klausenengen” bilan shartnoma imzolab, to'rt yil shu klubda faoliyat yuritgan. 1994-yili u jamoaning jami 47 golidan 31tasiga mualliflik qilgach, “Myolde” safiga qo'shildi. Norvegiyaning oliy ligasida Sulsher bir mavsumdayoq o'zini namoyon etib, 38 uchrashuvda 31ta gol kiritdi. Endi unga Tumanli Albionni ikki grand klubi “Everton” va “Manchester Siti” sovchi qo'yadi. 22 yoshli futbolchi esa “Man Yunayted”ga boradi. Sulsher “qizil iblislar” libosida 11 mavsum o'ynab, olti bor Angliya chempionligini qo'lga kiritdi. Yana, Chempionlar Ligasining dramatik finallari ishtirokchisi bo'lishi bilan birgalikda APL va “Yunayted”ning zahiradan tushish bo'yicha rekordchisi(150) hamda zahiradan o'yinga qo'shilib gol urish bo'yicha(28) ham eng zo'r natijalarini ko'rsatgan. Elmurod ERMATOV
— deya xabar beradi uff.uz nashri.