Hozirga qadar yurtimizda ko'plab iqtidorli futbolchilar o'z mahoratlarini namoyish etishga ulgurishdi. Ularni bir-biriga taqqoslash, qaysi biri kuchliroq ekanini aniqlash noto'g'ri, bizningcha. Zero, milliy termamizga jalb etilib, xalqaro maydonlarda javlon urgan o'yinchilarning har biri o'ziga xos ustunlikka ega.
Kimdadir tezlik yuqori, boshqasida jismoniy imkoniyat. Shunchaki, millionlar o'yiniga befarq bo'lmagan muxlis ushbu nomlardan muayyan talqin bo'yicha reyting hosil qilishi mumkin, xolos. Sports.ru saytining «Uzbekskaya kuxnya» blogi vakillari shunga binoan, o'zbek futboli tarixida yorqin iz qoldirgan 11 nafar charm to'p ustalaridan iborat ideal jamoa tuzishdi. Quyida ushbu ro'yxatdan kimlarning o'rin olganini bilib olishingiz mumkin.
Pavel BUGALO
Ikki afsonadan birini tanlash naqadar og'ir. Bu «Messi kuchlimi yoki Ronaldu?» deb so'rash bilan barobar. Lekin baribir, men Pavel Bugaloni tanlayman. U Nesterovdan farqli o'laroq, ikki marta mamlakatning eng yaxshi futbolchisi deb topilgan. Hamma darvozabonlar ham bunday sharafga munosib ko'rilavermaydilar. «Lokomotiv»ning hozirgi posboni faoliyatini hamon davom ettirayotganini inobatga olsak, uning O'zbekiston termasidagi roli haqida gapirishga hali erta.
Muqobil variant: Ignatiy NESTEROV
Vitaliy DENISOV
Kuchli ishtiyoq, mehnatkashlik bobida bu o'yinchi bebaho. Agar Denisov hujum chizig'ida to'p surganida, «xet-trik»larni yog'dirib tashlar, kiper vazifasida esa darvozasi daxlsizligini saqlab qolgan bo'lardi. Moskva «temiryo'lchilari» etakchilaridan biriga aylangan futbolchimiz bilan otasi har qancha faxrlansa arziydi. Shunday holatda Vitaliy «Latsio» yoki dengiz ortidagi boshqa jamoalar taklifiga rad javobini berishdan ham aslo cho'chimaydi.
Muqobil variant: Nikolay ShIRShOV
Andrey FYoDOROV
Termamizda porlagan aqlli himoyachilardan yana biri. Bir necha yillar avval Qurbon Berdievning «Rubin»i RFPLda shov-shuv ko'targan, bunda esa Andreyning xizmatlari beqiyos bo'lgandi. Qozonliklarda Xalk yo'q edi, ammo safda Makbet Sibayya singari futbolchilar o'ynashgan. Fyodorov ham O'zbekiston, ham Rossiya chempionatlarida g'olib chiqqan uch futbolchidan biri. Milliy termamiz ushbu futbolchi tarkibga kiritilgan 75 foiz o'yinni o'z foydasiga hal qilgan. Bu markaziy himoyachi uchun ajoyib natija. Uning bosh jamoamizdagi rolini e'tirof etmaslikning iloji yo'q. Mana, Fyodorov qadrdon Farg'onaga qaytib, «Neftchi» bosh murabbiyi sifatida g'alabalarni qo'lga kiritmoqda.
Muqobil variant: Farhod MAGOMETOV
Asror ALIQULOV
Ishqibozlar bu himoyachini «Paxtakor»dagi ishtiroki orqali yaxshi tanishadi. U «sherlar» bilan besh marta «oltin dubl» qayd etgan. Qolaversa, poytaxtdagi faoliyati davomida ikki marta Osiyo Chempionlar Ligasi yarim finaligacha etib bordi. Bu esa o'sha kezlari o'zbek futboli uchun qoyilmaqom natija edi. Balki Aliqulov o'z davrida mashhurlik bobida Ponomaryov, Koshelev, Soliev kabi jamoadoshlaridan ortda qolgandir, ammo bu omil uning terma jamoa hamda «Paxtakor»dagi salmog'iga zarracha ta'sir ko'rsatmadi.
Muqobil variant: Baxtiyor AShURMATOV
Fevzi DAVLETOV
O'zbekiston milliy termasida hamisha «Arbeloa sindromi» hukm surgan, zero o'ng qanot himoyasida porlaganlar uncha ko'p emas. Vaholanki, so'l tomonda iqtidorlar bisyor bo'lgan (Tixonov, Denisov, Shirshov, Suyunov). Darvoqe, Baxtiyor Ashurmatov ham markazga o'tishidan avval o'ng qanot mudofaasida to'p surgan. Hujumlarga doimo faol qo'shilgan Davletov o'z pozitsiyasida termamizdagi barcha futbolchilarga namuna vazifasini o'tamoqda.
Muqobil variant: Islom TO'XTAXO'JAEV
Odil AHMEDOV
«Krasnodar» yarim himoyachisi 2018 yili Rossiyada o'tadigan jahon chempionatida o'zini ko'rsatish uchun imkoniyatga ega (nasib qilsa, mundialga chiqamiz-ku!). Tashabbusni zimmasiga olib, faqat oldinga intilish bobida Odilga teng keladigani yo'q. O'zingiz o'ylang, o'zbek futbolida muxlislarni o'ziga rom etish bobida Ahmedovga teng keladigani bormi? Uni nafaqat barqaror o'yini, balki insoniy jihatlari uchun ham sevishadi. Odil aslo ortiqcha gapirmaydi, xurmacha qiliqlar qilmaydi. Galitskiyning matbuot anjumanlarida aynan Ahmedov bilan ishtirok etayotgani ham adolatli qaror. Futbolchimizni oldinda ulkan yutuqlar va yoqimli onlar kutib turgani aniq.
Muqobil variant: Temur Kapadze
Server JEPAROV
Hozirgi avlodning eng yorqin futbolchisi. Uning ishtirokida har bir o'yin qiziqarli o'tadi. Shu kungacha golni nishonlash chog'ida hech kim ishqibozlarga Jeparovchalik zavq baxsh etolmadi. Burchak to'pini qoyilmaqom tarzda o'yinga kiritish usulini ilk bor 2011 yilgi Osiyo kubogida aynan Server ishtirokida ko'rgandik. Ushbu futbolchimiz Evropaga yo'l olishi ham mumkin edi, ammo «Paxtakor»dan «Bunyodkor»ga o'tishni ma'qul bildi. So'ngra Osiyo futboli yulduziga aylanib, ikki marta qit'amizning tengsiz futbolchisi nomiga loyiq ko'rildi.
Muqobil variant: Andrey AKOPYaNTs
Mirjalol QOSIMOV
Shubhasiz, O'zbekistonning barcha davrlardagi eng yaxshi futbolchisi. Mirjalol Qo'shoqovich o'yinchilik faoliyatining boshlanishidan to murabbiylikda ishlagan kezlariga qadar o'zbek zamini iqtidorlarga naqadar boyligini isbotlab berdi. Ishqibozlar orasida «O'zbek Maradonasi» nomini olgan Qosimovning futbolimizga ko'p nafi tekkan. Ayniqsa, 1994 yilgi Osiyo o'yinlarida yurtimiz sharafini munosib himoya qilgandi.
Muqobil variant: Sardor RAShIDOV
Azamat ABDURAIMOV
O'sha - 1994 yilgi g'alabalar sari etaklagan terma jamoaning yana bir vakili. Tasodifmi yoki oddiy faktmi, bunga o'zingiz baho berasiz: Abduraimov Toshkentdagi dahshatli zilzila ro'y bergan 1966 yili tavallud topgan. Uning e'tiborga molik voqealarga boy tarzda o'tgan faoliyati Azamatning imkoniyatlari nechog'li yuksak ekanidan dalolat. Bir qator xorij chempionatlarida to'p surdi, «Paxtakor»da g'alabalarni nishonladi, Osiyo o'yinlari yarim finalida muhim gol muallifiga aylandi, mini-futbol o'ynadi. 90-yillardagi eng yaxshi forvardlardan biriga bugungi tarkibdan joy ajratmaslik adolatdan bo'lmasdi.
Muqobil variant: Aleksandr GEYNRIX
Davomi InterFUTBOL gazetasi blogida.
— deya xabar beradi uff.uz nashri.