2015 yilning 21-31 oktyabr kunlari Qatar poytaxti Doha shahrida 2016 yil Braziliyaning Rio-de-Janeyro shahrida bo'lib o'tadigan XV yozgi Paralimpiya o'yinlariga to'g'ridan-to'g'ri yo'llanmalar beradigan engil atletika bo'yicha jahon chempionati o'tkaziladi.
Dunyoning etakchi engil atletikachilari ishtirokida bo'lib o'tadigan mazkur nufuzli musobaqada Vatanimiz sharafini 11 nafar paralimpiyachimiz himoya qiladi.
Jumladan, turli masofalarga yugurish baxslarida xamyurtlarimizdan Fahriddin Hamroev, Ulug'bek Chariev, Ma'rufjon Murodullaev, Sirojiddin Norov va Miran Saxatov startga chiqishadi.
Yadro va disk uloqtirish baxslarida esa tajribali sportchilarimiz Xusniddin Norbekov hamda Mavlonbek Xaydarov g'oliblik uchun kurash olib boradilar.
Bundan tashqari terma jamoamiz tarkibidan Sanobar Sobirova, Dilafruzxon Axmadxonova (ikkalasi yadro uloqtirish), Mansur Abdirashidov (yugurish) va Bekjon Chevarov (uzunlikka sakrash) kabi iqtidorli sportchilarimiz ham o'rin egallashgan. Ushbu sportchilarimiz yosh bo'lishligiga qaramay, turli darajadagi xalqaro musobaqalarda munosib qatnashib, terma jamoamiz murabbiylari ishonchini qozonishga muvaffaq bo'ldilar.
“Davlatimiz rahbarining 2013 yil 25 fevralda qabul qilingan “O'zbekiston sportchilarini 2016 yil Rio-de-Janeyro shahri (Braziliya)da o'tkaziladigan XXXI yozgi Olimpiada va XV Paralimpiya o'yinlariga tayyorlash to'g'risida”gi qarori ijrosini ta'minlash maqsadida terma jamoalarmiz zaxirasini iqtidorli yoshlar bilan boyitishga ham alohida e'tibor qaratib kelinmoqda – deydi O'zbekiston Milliy paralimpiya assotsiatsiyasi rais o'rinbosari Umid Axmadjonov. Buning samarasi uloroq, bugungi kunda har bir terma jamoamizda mahoratli sportchilarning munosib izdoshlari kamolga etmoqda. Qatar davlatiga yo'l olayotgan yoshlarimiz ham bir qator xalqaro turnirlarda ishtirok etib, xalqaro tajribalarini boyitib borishyapti. Shuni ishonch bilan aytishim mumkinki, ular navbatdagi musobaqada ham Vatanimiz sharafini munosib himoya qilib, o'zlariga bildirilgan ishonchni oqlaydilar”.
O'zbekiston terma jamoasi a'zolari 17 oktyabr kuni Dohaga yo'l oladilar. O'z oldiga doimo yuqori maqsadlarni qo'yadigan Paralimpiyachilarimizga bo'lajak jahon chempionati bahslarida ham omad va zafarlar tilab qolamiz.
Eslatib o'tamiz, ayni paytga qadar matonatli sportchilarimiz 2016 yilgi Paralimpiya o'yinlariga 22 ta yo'llanmani naqd qilib qo'yishgan. Shavkat Jalilov O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.