Azal-azaldan ma'lumki, ko'pgina bolakaylar ulg'ayganlaridan so'ng ko'proq ota kasbini davom ettirishga qaror qilishadi. Albatta, millionlar o'yini hisoblanmish futbol ham bundan mustasno emas. Qani, ko'raylik-chi, yaqin o'tmishning qaysi yulduzlari o'zlaridan munosib vorislar qoldirishyapti ekan?
Darvozabon: Kasper Shmeyxel («Lester Siti», Angliya)
2015 yilning eng yorqin klubi darvozaboni yaqinda uni mashhur otasi bilan qiyoslashlari joniga tekkanini aytib o'tdi: «29 yoshga kirdim, ota bo'ldim. Endilikda meni otam bilan solishtirishlarini istamayman. Aytgancha, bu narsa dadamni ham bezor qildi. Bu taqqoslash vaqtlar o'tishi bilan unutilib ketishiga umid qilgandim, ammo bunday bo'lib chiqmayapti. Bu esa borgan sari jahlimni chiqarmoqda».
Shunisi qiziqki, Kasper asta-sekin «otasining soyasi»dan ajralib chiqmoqda. Zero, u ham Peter Shmeyxel kabi ajoyib golkiper. Kasper katta futboldagi faoliyatini «Manchester Siti»da boshlab, uzoq yillar davomida Jo Xart bilan raqobatlashib kelgan (darvoqe, Jo darvozabonga qo'l keluvchi ko'plab usullarni aynan Kasperdan o'zlashtirganini tez-tez eslab turadi) va APLga katta mashaqqatlar bilan kirib kelgan. Ammo kichik Shmayxel uzoq vaqtlargacha barqaror o'yin namoyish qilolmadi. «Lester»ga o'tganidan so'ng esa, nihoyat, izlagan narsasini topdi. Bugunga kelib Kasper Shmeyxel - APL­dagi eng e'tiborga loyiq klub va Daniya terma jamoasining asosiy darvozaboni.
Himoyachi: Deyli Blind («Manchester Yunayted», Angliya)
Bundan 20 yillar muqaddam Gollandiyaning «Ayaks» klubi Chempionlar Ligasida muvaffaqiyat qozonadi. Zafarli yurishning boshida esa Lui van Gal (bosh murabbiy) va Danni Blind («Ayaks» sardori)lar turishardi. Van Gal va Blindlar o'rtasidagi munosabat shu qadar yaqin ediki, ular birga tushlik qilishdan tashqari, oilaviy bordi-keldilarni ham yo'lga qo'yishgandi. Shunday ekan, van Gal kichik Blind «Manchester Yunayted» bilan shartnoma imzolamasidan oldin ham «Ayaks» sardorining uyida ajoyib iste'dod etishib chiqayotganidan xabardor edi, albatta. Ammo Deyli Blind terma jamoa eshigini qoqqan ilk pallalarda gollandiyalik muxlislar uni hushtakbozlik bilan qarshi olishadi. Axir, bu ishda otasining qo'li borligi ham mumkin edi-da! Lekin vaqtlar o'tishi bilan Deyli chindan-da mahoratli futbolchi ekanini isbotlay oldi. 2014 yilda esa erediviziyaning eng yaxshi futbolchisi, deb topildi. Braziliyada o'tgan mundial kichik Blindning iste'dodini to'liq ochib bergach, u «Manchester Yunayted»dan taklif oldi.
Himoyachi: Kristian Maldini («Milan», Italiya)
Aslini olganda, 19 yoshga to'lgan Kristian hali-hamon «Milan» asosiy tarkibiga kira olmayati, biroq «yoshlar» jamoasida uni o'rnini bosa oladigani yo'q. Eng muhimi, Kristianning raqami hozirdanoq ma'lum - u o'z ajdodlari kabi 3-raqam ostida maydonga tushadi. Qadim o'tgan zamonlarda bu raqamni Chezare Maldini elkasida ko'rishgan, keyin esa u 24 yil mobaynida Paoloning «tashrif qog'ozi»ga aylandi. Shunday ekan, tez orada bu omadli raqam Kristianga ham asosiy tarkibdan o'rin kafolatlasa, ajabmas. Har holda, Sinisha Mixaylovichdan buni kutsa bo'ladi, chunki u yaqindagina 16 yoshli Janluiji Donnarummaga ham ishonch bildirdi-ku...
O'ng qanot himoyachisi: Nil Kioun («Reding», Angliya)
Nilning otasi Martin Kioun faoliyatining katta qismini «Arsenal» libosida o'tkazdi. Ammo butsalarni mixga ilish vaqti kelganida, u «Reding»ni tanladi. Shuning uchun Nil futboldagi ilk qadamlarini aynan shu klubda qo'yganiga ajablanmasak bo'laveradi. To'g'ri, hozircha Nil jamoada barqarorlikka erisholmayapti. Lekin u endigina 20 yoshga kirdi va hammasi hali oldinda ekaniga ishongimiz keladi.
Tayanch yarim himoyachi: Serxio Buskets («Barselona», Ispaniya)
Frantsiyaning L~Equipe nashri 1990 yilda Karles Busketsni «qo'lqopsiz golkiper» deb atagandi. Lekin shunisi qiziqki, u «Barselona»da 10 yildan ko'proq o'ynagan bo'lsa-da, atigi 79 marta maydonga tushgan xolos. Biroq uning o'g'li Serxio «Barselona» tarkibiga yorqin nur sochib kirib keldi. Aslida, Serxioni «Barselona» maktabiga qabul qilishmaydi. Chunki u testlarni ko'ngildagidek topshira olmagandi. Lekin kichik Buskets yoshligidan klub haqidagi orzular bilan o'sgani bois, maqsadidan chekinmaydi va nihoyat, 2005 yilga kelib kataloniyaliklar tarkiga qo'shiladi. Jamoa ustozligi Xosep Gvardiola qo'liga o'tganidan keyin esa Serxioning yulduzi porlay boshladi. Bugunga kelib Buskets «ko'k-anorranglilar»ning eng muhim futbolchilaridan biriga aylandi.
Markaziy yarim himoyachi: Tyago Alkantara («Bavariya», Germaniya)
Tyago va uning ukasi Rafinya Alkantaralar klub miqyosidagi muvaffaqiyatlar bo'yicha Mazino Alkantaradan o'zib ketishdi, desak yanglishmaymiz. Chunonchi, Mazino uchun «Fiorentina» va «Valensiya»da o'tgan yillar faoliyatning eng yuqori cho'qqisi bo'lib qolgandi. Uning o'g'illari esa «Barselona» akademiyasida ta'lim olib, padarlaridan ancha-muncha o'zib ketishdi. To'g'ri, Rafinya haligacha kataloniyaliklar safini tark etmay, hamon o'z vaqtini kutib yashamoqda. Biroq Tyago mana uch yildirki, Xosep Gvardiola bilan hamkorlikni to'xtatmay, uyidan olislarda yuribdi va anchagina dong taratishga ulgurdi.
Hujumkor yarim himoyachi: Yanis Xaji («Viitorul», Ruminiya)
George Xaji nafaqat rumin futbolida iz qoldirgan shaxs, balki o'zi kabi futbolchilarni etishtirib berishda tengi yo'q mutaxassis sifatida ham nom taratmoqda. Jumladan, uning o'g'li Yanis aynan otasi asos solgan futbol akademiyasida ta'lim olib, 16 yoshidayoq «Viitorul» klubida debyutini nishonladi. Unutmaslik lozim, bu jamoada katta Xaji murabbiylik qiladi, lekin Yanisda ham nimadir borki, George uni tanqidlardan cho'chimay maydonga tushirmoqda.
Eng muhimi, Yanisning iste'dodi xorijlik skautlarni ham qiziqtirib qolgan. Buning samarasi o'laroq, u yozda «Viitorul»dan «Fiorentina»ga ko'chib o'tishi kutilmoqda.
Chap qanot yarim himoyachisi: Denis Cherishev («Valensiya», Ispaniya)
Katta yoshli futbol muxlislariga ma'lumki, Dmitriy Cherishev futbolchilik davrida juda chaqqon va tezkor bo'lgani uchun «Dinamo» muxlislari unga «Elektrichka» deb laqab qo'yishgandi. Xullas, u futbol olamida etarlicha nom qozongach, Xixonning «Sporting» klubiga o'tib ketadi va butsalarini mixga ilganidan so'ng Ispaniyada yashab qolishga qaror qiladi. Keyinroq murabbiylik ishiga tayyorlanish bilan birga, o'z o'g'lida futbolga mehr uyg'otib, uni «Real» akademiyasi darajasiga olib chiqadi. Garchi Denis «Real» asosiy tarkibidan joy ola bilmasa-da, mahorati chakki emasligini namoyon qilishga ulgurdi. Shu bois, la-liganing «ikkinchi darajali» klublari uni ijaraga olishga astoydil kirishishdi. Ayni paytda kichik Cherishev «Valensiya» sharafini himoya qilmoqda.
O'ng qanot yarim himoyachisi: Andre Ayyu («Suonsi», Uels)
Bor ekanu-yo'q ekan, Abedi Pelening ikki o'g'li bo'lgan ekan... Bu ertakning oxirida har ikki o'g'il ham otasining izidan borib, futbolchi bo'lib etishdi. Taqdirni qarangki, Andre ham, Jordan ham Abedi kabi katta futboldagi faoliyatlarini Frantsiya­da boshlashdi. Ular «Marsel» yarim himoyasining har ikki qanotini egallashdi. Lekin vaqtlar o'tgani sari, og'a-ini Ayyularning yo'llari ayro tusha boshladi. Nihoyat, o'tgan yozga kelib Jordan «Aston Villa»ni, Andre esa «Suonsi»ni tanladi.
E'tiborlisi, Jordan Ayyu «Villa» bilan jadval so'ngida «sudralib» yuribdi. Andre va uning «Suonsi»si esa harqalay, xavf­li hududdan sal uzoqroqda.
Davomi InterFUTBOL gazetasi blogida.
— deya xabar beradi uff.uz nashri.