To'g'risi, Andijonda muxlislarning millionlar o'yiniga bo'lgan mehri, e'tibori o'zgacha...
Shundan bo'lsa kerak, viloyat, tuman miqyosidagi, hatto mahallalararo o'tadigan musobaqalarda ham stadionlar atrofi ko'p sonli ishqibozlar bilan gavjum bo'ladi. Oliy liga o'yinlari bo'lib o'tadigan kunlar Qo'shariq dahasida joylashgan “Barkamol avlod”stadioni atrofidagi muhit xuddi bayramni eslatishi, bor gap. Har bir o'yinga alohida fayz berib, chin dildan ishqibozlik qiladigan - Nodirbek To'ychiev boshchiligidagi muxlislar klubi esa alohida mavzu.
Yangi mavsumga qizg'in tayyorgarlikni boshlagan fan-klub sardori bilan mo'jaz suhbat uyushtirdik.      
- Nodirbek, fan-klubning asosiy vazifasi nimadan iborat deb o'ylaysiz?
- Savolingizga, uzundan-uzoq javob berish mumkin. Deylik, har bir jamoaning muxlislar klubi o'z suyuklilarini uy va mehmondagi o'yinlarda qo'llab-quvvatlab turishga bor kuchini berib harakat qilishi kerak. Aslini olganda ham shundaydir... Fikrimcha, ishqibozlar klubi eng avvalo stadionga keladigan tomoshabinlarga yuksak darajadagi muxlislik madaniyatini targ'ib etishni o'z oldiga asosiy maqsad qilib qo'yishi, lozim. Muxlis o'yingohga o'z klubiga ko'r-ko'rona ishqibozlik qilish uchun emas, balki futbol deb atalmush mo'jizadan zavq olish uchun kelishi kerak, deb o'ylayman.
- “Andijon” muxlislari yangi mavsumga qanday tayyorgarlik ko'rishyapti?        
- Ko'psonli jonkuyar ishqibozlar bilan yig'ilib, tayyorgarlik ishlari borasida kelishib oldik. O'zingiz bilasiz, uchrashuv davomida futbolchilarni qo'llab-quvvatlab turishda musiqa asboblari va do'mbiralar sadosining o'rni bo'lakcha.  Nasib qilsa, bu yil yangi musiqalar, hayqiriq(krichalka)lar bilan stadionga o'zgacha fayz bermoqchimiz. Turli bannerlar ham tayyorlanyapti. Barcha yangiliklarni aytsam, qizig'i qolmaydi. O'zimizda bo'lib o'tadigan  “Lokomotiv” bilan o'tadigan ilk o'yinda tomoshabinlarga alohida “syurpriz” tayyorlab qo'yganmiz.
- Demak, muxlislar chempionatga shay. Jamoaning holati haqida nima deya olasiz?
- Hozirgi kunda yosh izlanuvchan murabbiy – Baxtiyor Ashurmatov boshchiligidagi tarkibni mashg'ulotlarida bo'lib, ularning harakatlaridan ko'nglimiz to'lyapti. Asosiy tarkibga bir nechta yangi  o'yinchilar taklif etilgan. Undan tashqari o'zimini Andijonda ulg'aygan Salohiddin Salohiddinov va Farhod Bekmurodov singari yoshlar jamoaga qo'shildi. Biz muxlislar yangi mavsumda klubimizdan faqat mazmunli va samarali o'yinlar kutyapmiz. Nasib qilsa,  “Andijon” chempionatda faqat yuqori o'rinlar uchun kurashib, uzoq yillardan beri kutilayotgan Osiyo chempionlar Ligasi, Osiyo kubogi kabi qit'amiz miqyosidagi o'yinlarda qatnashadi, deb umid qilamiz. “Burgutlar”ni etarli darajada qo'llab-quvvatlash  esa bizdan...          
- Suhbat uchun tashakkur.                                    Elmurod ERMATOV, Andijon
(Muallif olgan suratlar)
— deya xabar beradi uff.uz nashri.