Osiyo chempionlar ligasining guruh bosqichi, ikkinchi turidan o'rin olgan "Nasaf" hamda "Al Ahli" jamoalari o'rtasidagi o'yindan oldin “Nasaf” jamoasi bosh murabbiyi Ro'ziqul Berdiev va jamoa himoyachisi Maqsud Karimovlar jurnalistlar savollariga javob qaytardi.
Ro'ziqul Berdiev: Barchani futbol bayrami boshlanishi bilan tabriklayman. Ertangi o'yinga keladigan bo'lsak, raqibimiz juda kuchli. Ammo o'tgan o'yinni ko'rdilaringiz bu jamoa bilan o'ynasa bo'ladi. Shuning uchun ushbu o'yinga puxta tayyorgarlik ko'rdik va o'ylaymanki yaxshi natijani qo'lga kiritamiz.
Maqsud Karimov: Ertaga nasib bo'lsa, muxlislarni xursand qilish uchun maydonga tushishga tayyormiz. Umidimiz muxlislar ham bizning qatorimizda o'n ikkinchi o'yinchi vazifasini o'tab berishadi.
- Nega o'tgan o'yinda ayrim o'yinchilar maydonga tushmadi?
-Bunga sabablar, chernagoriyalik legionerimiz Deyan Bolevich OFK zayavkasiga kiritilmadi, uning skauterlarlari bizga etarli hujjatlarni o'z vaqtida etkazib bera olishmadi. Shuning uchun uni OFKga vaqtida zayavka qila olmadik. Saydullo Rahmatovning esa viza masalasida muammo bo'ldi, bunga jamoamiz ma'murlari ham sustkashlikka yo'l qo'yishdi. Bahrom Abdurahimovga kelsak, o'zlaringizga ma'lum, uning o'tgan mavsumda olgan qizil kartochkasi bor edi shu tufayli u ham maydonga tushmadi. Ammo ertaga biz Saydulloning ham Bahromning ham xizmatidan foydalanishimiz mumkin.
-Maqsud, o'tgan o'yinda har ikkala bo'lim boshida gol o'tkazib yubordilaringiz, bunga sabab nima?
-Murabbiylarimiz doimo bizga o'yin boshida ham o'yin davomida ham hushyorligimizni yo'qotmaslikni tayinlashadi. Albatta bu gollarda biz himoyachilarning ham aybimiz bor, biroz diqqatimizni yo'qotdik. O'ylaymanki bu holat endi takrorlanmaydi.
— deya xabar beradi uff.uz nashri.