"Nasaf" jamoasi O'zbekiston kubogining nimchorak final bosqichidan bosh sovrin uchun kurashni boshlagandi. Jamoamizning dastlabki raqibi O'zbekiston Birinchiligi vakili Toshkentning "Oq-tepa" jamoasi bo'ldi. Ushbu to'qnashuvning birinchi uchrashuvi Toshkentdagi "Jar" o'yingohida bo'lib o'tgandi. O'sha bahsda "ajdarlar" safardan 2:1 hisobidagi g'alaba bilan qaytishgandi. O'yin qahramoni sifatida yosh iste'dodli hujumchimiz Bobir Abduxoliqov barchaning yodida qolgandi. Aynan o'sha bellashuv yosh hujumchimiz uchun jamoamiz safidagi debyut uchrashuv bo'lgandi. Bobir Abduxoliqovning o'yin yakunlanishiga sanoqli soniyalar qolganida kiritgan goli yakunda jamoamizga g'alaba keltirgandi. Javob bahsida esa Qarshi "Nasaf" "Oq-tepa"ni ortiqcha qiyinchiliksiz taslim etib, chorak finalga yo'l olgandi.
Chorak finaldagi raqibimiz ham O'zbekiston Birinchiligida ishtirok etadigan "Paxtakor-2" jamoasi bo'lgandi. Toshkentda kechgan dastlabki bellashuvda Ro'ziqul Berdiev shogirdlari raqiblariga hech qanday imkoniyat qoldirmay, "Paxtakor-2"ni o'z maydonida 6:0 hisobida tor-mor keltirgandi. Birinchi o'yindayoq barcha masala hal etilgandi. Qarshidagi javob o'yinida ham vakillarimizning qo'llari baland kelgandi. Farruh Sayfiev va Doniyor Narzullaev kiritgan gollar navbatdagi g'alabamizga zamin yaratgandi. Yarim finalda "Lokomotiv" jamoasi bilan final chiptasi uchun kurash olib borgandik. Final uchun kechgan kurashda "ajdarlar" "temiryo'lchilar" ustidan zafar quchishni uddasidan chiqishgandi. Qarshida o'tgan birinchi o'yinda Azamat Allaniyazov va Shohruh Gadoevlarning goliga "Loko" vakillari javob qaytara olishmagandi. Uchrashuvning so'nggi daqiqasi "Lokomotiv" futbolchisi Islom To'xtaxo'jaevning super-zarbasini aqlbovarqilmas "seyv"i orqali bartaraf etgan Eldorbek Suyunov jamoamizning yakunda final yo'llanmasini qo'lga kiritishda asosiy rolni o'ynadi. Chunki Toshkentda o'tkazilgan javob bahsida "Lokomotiv" 1:0 hisobida g'alaba qozongandi. Biroq to'plab nisbatiga ko'ra, finalga "Nasaf" yo'l olgandi.

Shunday qilib jamoamiz mashaqqatli yo'lni bosib o'tib, nihoyat final ostonasiga etib keldi. Buyog'iga so'nggi hal qiluvchi nuqtani qo'yish qoldi. "Nasaf" shu kunga qadar O'zbekiston kubogi finalida to'rt marotaba qatnashgan va barchasida imkoniyat boy berilgan. Endi jamoamiz tarixida yangi sahifa ochish vaqti etib keldi. Ro'ziqul Berdiev boshchiligida jamoamiz nihoyat ko'zlangan marrani zabt etishini minglab muxlislarimiz intizorlik bilan kutib o'tirishibdi. Endi katta sahnaga chiqadigan palla etib keldi. Jamoamiz etakchilari Artur Gevorkyan, Erkin Boydullaev, Eldorbek Suyunov, Shuhrat Muhammadiev, Shohruh Gadoev, Maqsud Karimov, Ilhom Shomurodov va Sherzod A'zamov singari futbolchilarimiz "Nasaf"ning yangi tarixini yaratilishida maydonda boshchilik qilishlari zarur. Billur sovrinni qo'lga kiritish uchun beshinchi urinishda ishni ham "5" qiladigan payt keldi. Buni klub rahbariyati, murabbiylar shtabi, futbolchilar va barcha klub xodimlari his etib turishibdi. Ortga yo'l yo'q. Buyog'iga faqat g'alaba zarur! O'zbekiston kubogi Qarshiga, klubimiz muzeyiga keladigan palla yaqin qolganida ishonamiz. Demak, jamoamizning barcha ashaddiy va jonkuyar ishqibozlarini 17 oktyabr kuni Jizzaxda bo'lib o'tadigan "Bunyodkor"ga qarshi O'zbekiston kubogi final uchrashuviga taklif etamiz va jamoamizni qizg'in qo'llab-quvvatlashlarini so'rab qolamiz! Olg'a, "Nasaf"!

Finalgacha bo'lgan yo'l... O'zbekiston Kubogi – 2015. 1/8 final. Dastlabki uchrashuv. 12 iyun. Toshkent. “Jar” stadioni. 355 tomoshabin.
OQ-TEPA – NASAF – 1:2 (0:0)
Gollar: Ilhom Shomurodov, 56 – 0:1. Temur Hakimov, 78 – 1:1. Bobir Abduxoliqov, 90+4.
Bosh hakam: Rustam Bobomurodov (Navoiy) – 8,4.
Qanot hakamlari: Ruslan Samandarov (Navoiy) – 8,0. Obid Jumaev (Navoiy) – 8,3.
Zaxiradagi hakam: Dilshod Karimov (Toshkent) - 9.
Nazoratchi: Igor Nexochin (Namangan). O'zbekiston Kubogi. 1/8 final. Javob uchrashuvi. 23 iyun. Qarshi. “Markaziy” stadioni. 1216 tomoshabin.
NASAF – OQ-TEPA – 3:1 (2:0)
Gollar: Sharof Muhiddinov, 10 – 1:0. Ilhom Shomurodov, 39 – 2:0. Sergey Rekun, 64 – 2:1. Bobur Abduxoliqov, 86 - 3:1.
Bosh hakam: Olimjon Tolibjonov (Toshkent) – 8,4.
Qanot hakamlari: Vladlen Lushin (Guliston) – 8,5, Doniyor Saylalov (Toshkent) – 8,0.
Zaxiradagi hakam: Naim Qosimov (Qarshi) - 9.
Nazoratchi: Radik Serazetdinov (Toshkent). O'zbekiston kubogi-2015. Chorak final, dastlabki o'yin.
«Paxtakor-2» (Toshkent) – «Nasaf» (Qarshi) 0:6
Gollar: Ilhom Shomurodov 7, - 0:1. Artur Gevorkyan 28, - 0:2. Odil Hamrobekov 45, - 0:3. Ilhom Shomurodov 53, - 0:4. Azamat Allaniyazov 77, 85.
Hakamlar: R. Ermatov (Toshkent), A. Rasulov (Toshkent), J. Saidov (Toshkent), D. Karimov (Toshkent)
Nazoratchi: R. Aytekov (Toshkent) Javob o'yini. Qarshi, "Markaziy" stadioni
«Nasaf» (Qarshi) – «Paxtakor-2» (Toshkent) 2:0
Gollar: Farruh Sayfiev (16), Doniyor Narzullaev (19)
Hakamlar: D. Pislegin (Toshkent), N. Ro'zimov (Toshkent), S. Shoyusupov (Toshkent), N. Qosimov (Qarshi)
Nazoratchi: G'. Karimov (Toshkent). O'zbekiston Kubogi-2015. Yarim final. Dastlabki o'yin. Qarshi, "Markaziy" stadion.
"Nasaf" - "Lokomotiv" 2:0
Gollar: Azamat Allaniyozov (14), Shohruh Gadoev (28)
Hakamlar: Hasan Ro'ziev, O. Abduvosilov, S.Shoyusupov, Z.Qodirov.
Nazoratchi: D.Roman (Toshkent).

Javob o'yini. Toshkent, TTMI stadioni.
"Lokomotiv" - "Nasaf" 1:0
Gol: Marat Bikmaev 49
Hakamlar: B. Namozov (Toshkent), T. Galeev (Toshkent), A. Po'latov (Toshkent), O. Tolibjonov (Toshkent)
Nazoratchi: R. Aytekov (Toshkent).
17 oktyabr, Jizzax. O'zbekiston kubogi-2015. Final

«Bunyodkor» (Toshkent) – «Nasaf» (Qarshi)
"So'g'diyona" markaziy stadioni.
Hakamlar: R. Ermatov (Toshkent), A. Rasulov (Toshkent), J. Saidov (Toshkent), B. Namozov (Toshkent)
Nazoratchi: A. Arutyunov (Toshkent).
— deya xabar beradi uff.uz nashri.