Trampolin bo'yicha O'zbekiston erkaklar va ayollar terma jamoalarining a'zolari Ekaterina Xilko hamda Xusanboy Jonibekov 5-6 mart kunlari Boku shahri (Ozarbayjon)da o'tkaziladigan Jahon kubogining birinchi bosqichida Vatanimiz sharafini himoya qiladilar.
Ayni paytda har ikki sportchimiz ham Boku shahrida tashkil etilgan o'quv-mashg'ulot yig'inida o'z mahoratlarini yanada toblashmoqda.
Jahon kubogining dastlabki bosqchi musobaqasi nihoyasiga etgach, ayollar terma jamoamiz a'zolari Ekaterina Xilko hamda Anna Kasparyan 19 aprel kuni Braziliyaning Rio-de-Janeyro shahrida boshlanadigan litsenzion musobaqaga tayyorgarlik ko'radilar.
Eslatib o'tamiz, Ekaterina Xilko hamda Anna Kasparyan o'tgan yili bo'lib o'tgan jahon chempionatida kuchli 20talikdan o'rin egallab, XXXI yozgi Olimpiada o'yinlariga yo'llanmalar o'ynaladigan musobaqalarning ikkinchi bosqichida qatnashish huquqini qo'lga kiritishgan. Umid qilamizki tajribali sportchilarimiz bo'lajak nufuzli musobaqalarda ham munosib ishtirok etadilar va “Rio-2016” Olimpiada o'yinlariga yo'llanma olgan sportchilarimiz safi yanada kengayadi.
Ma'lumot uchun. Ekaterina Xilko 2000, 2004, 2008, 2012 yillari o'tkazilgan yozgi Olimpiada o'yinlarida ishtirok etib, 2008 yili Pekin shahri (Xitoy)da bo'lib o'tgan Olimpiadada bronza medali sovrindori bo'lgan. Shavkat Jalilov O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.