Yaponiya futbol assotsiatsiyasi hamda O'zbekiston futbol federatsiyasi hamkorlikda tashkil etgan “Sport for tomorrow” futbol festivali 1 mart kuni start oldi.
Toshkentdagi “Jar” sport majmuasida o'tkazilayotgan ushbu turnirning ochilish marosimida Yaponiya futbol assotsiatsiyasi, O'zbekiston futbol federatsiyasi hamda mehmon jamoalar vakillari so'zga chiqib, ushbu musobaqa barcha uchun foydali bo'lishiga umid qilayotganliklarini, Hindistonda bo'lib o'tadigan o'smirlar o'rtasidagi Osiyo chempionati ishtirokchilari uchun esa, qit'a birinchiligiga tayyorgarlik ko'rishning bir bosqichi vazifasini o'tab berishi maqsad qilinganini ta'kidlashdi.
Ochilish marosimi nihoyasiga etgach, turnirning dastlabki o'yini o'tkazildi. Unda Temur Olimxo'jaev boshchilik qilayotgan O'zbekiston U-16 terma jamoasi Turkmanistonga qarshi maydonga tushdi.
O'yinni to'laligicha o'z nazorati ostida o'tkazgan O'zbekiston o'smirlar terma jamoasi o'yinni yirik — 5:1 hisobidagi g'alaba bilan yakunladi.
Uchrashuvning birinchi bo'limida ko'plab xavfli vaziyatlar yaratilganiga qaramay, o'zbekistonliklar faqat bitta gol bilan kifoyalandi. Uchrashuvning 30-daqiqasida Rasul Yo'ldoshev uzatib bergan to'pni Alfayzi Ne'matov boshi bilan raqib darvozasiga joylab qo'ydi. Birinchi bo'lim nihoyasida Shuxrat Ne'matov raqib jarima maydonchasi ichiga kirib borib, darvoza tomon xavf solgan pallada qo'pollik bilan to'xtatildi. 11 metrlik jarima to'pini Abubakr Mo'ydinov noaniq amalga oshirdi va birinchi bo'lim 1:0 hisobi bilan yakunlandi.
Ikkinchi bo'lim esa gollarga boy bo'ldi. O'zbekiston o'smirlar terma jamoasi tarkibida harakat qilganlardan Baxrom Soatov, Shuhrat Ne'matov, Asadbek Sobirjonov hamda Abdunozir Abdurahmonov o'z hisobiga bittadan gol yozib qo'ydi.
Turkmaniston o'smirlari 11 metrlik jarima to'pidan birgina gol kiritdi. Ushbu golga Meylis Xoshmiradov mualliflik qildi — 5-1.
Shu tariqa O'zbekiston U-16 terma jamoasi ushbu xalqaro o'rtoqlik turnirini g'alaba bilan boshladi.
“Sport for tomorrow-2016”
01.03.2016, Toshkent, “Jar” stadioni
O'zbekiston U-16 – Tojikiston U-16 5:1
Gollar: Alfayzi Ne'matov (30), Bahrom Soatov (55), Shuhrat Ne'matov (64), Abdunozir Abdurahmonov (76), Asadbek Sobirjonov (68) — Meylis Xoshmiradov (76 pen.)
O'zbekiston U-16: 12.Jasurbek Umrzoqov (1.Xojiakbar Jo'raev, 80), 3.Shoxzamon Xayrullaev, 4.Ixtiyor Xoldorov, 7.Oston O'runov, 8.Valeriy Akopov (36.Shuhrat Ne'matov, 30) (6.Mardon Abdullaev, 69), 9.Bahrom Soatov (23.G'ayrat Azizxo'jaev, 76), 10.Rasul Yo'ldoshev, 11.Asadbek Sobirjonov (14.Ibrohim G'anixonov, 80), 16.Alfayzi Ne'matov (32.Abdunozir Abdurahmonov, 57) , 17.Abubakir Mo'ydinov, 19.Islom Karimov.
Turkmaniston U-16: 1.Botir Gayliev, 8.Botir Tachnazarov, 7.Seyran Berdinazarov, 4.Roman Galkin, 11.Meylis Xoshmiradov, 5.Mirza Beknazarov, 14.Ahmat Gurbanov, 2.Sahetmurad Rejebov, 12.Gurbanmamet Guliev, 15.Umut Nazarov, 18.Atamurot Ramazonov.
Zaxiradan maydonga tushganlar: 16.Denis Ikonnikov, 3.Garli Garliev, 9.Xakmurat Annabayramov, 13.Meylis Diniev, 6.Ezizxan Keshayev.
— deya xabar beradi uff.uz nashri.