Dzyudo kurashi bo'yicha O'zbekiston terma jamoasi a'zolari joriy yilning 5-21 avgust kunlari Rio-de-Janeyro shahri (Braziliya)da o'tkaziladigan XXXI yozgi Olimpiada o'yinlarining yo'llanmalari uchun reyting ochkolar o'ynaladigan musobaqalarga qizg'in hozirlik ko'rishmoqda.
Jumladan, ayni kunlarda polvonlarimiz 25-27 mart kunlari Tbilisi (Gruziya), 1-3 aprel kunlari Samsun (Turkiya) va 13-15 may kunlari Almati (Qozog'iston) shahrida o'tkaziladigan Gran Pri turkumiga kiruvchi turnirlarga, shuningdek, 15-17 aprel kunlari Toshkent shahrida o'tkaziladigan Osiyo chempionati, 6-8 may kunlari Boku shahri (Ozarbayjon)da o'tkaziladigan “Ulkan toj” turniri va nihoyat 27-29 may kunlari Gvadalaxara shahri (Meksika)da o'tkaziladigan “Masters” turkumiga kiruvchi yirik musobaqaga jiddiy tayyorgarlik ko'rishmoqda.
Mazkur musobaqalar yakuniga ko'ra Olimpiada o'yinlarining yo'llanmalari uchun saralash musobaqalari yakuniga etadi va Xalqaro dzyudo federatsiyasi tomonidan “Rio-2016” o'yinlariga yo'llanma olgan dzyudo ustalarining nomlari e'lon qilinadi.
Erkaklar o'rtasida har bir vazn toifasida 1-22 o'rinlarni band etgan sportchi Olimpiada o'yinlari yo'llanmasiga ega bo'ladi. Agarda har bir vazn toifasida bir davlatdan bir nafar sportchini Olimpiada o'yinlari yo'llanmasiga ega bo'lishini inobatga olsak, ayni paytda o'z vazn toifalarida kuchli 22talikka kirmay turgan Mirali Sharipov, Sherali Jo'raev va Abdullo Tangriev kabi sportchilarimiz ham Olimpiada o'yinlari yo'llanmasiga da'vogarlar safida turishibdi. Sababi, ushbu vaznlarda 1-22 o'rinlarni band etib turgan sportchilar orasida bir davlatdan ikki, uch xatto to'rt nafardan sportchilar joy olishgan.
Bugungi kunda faqatgina Ramziddin Saidov kuchli 22talikdan o'rin olmay turibdi. Biroq ushbu sportchimizda Osiyo kvotasi mavjud.
Quyida mamlakatimiz erkaklar terma jamoasining Olimpiya reyting jadvalida egallab turgan o'rinlari berilgan:
-60 kg. Sharofiddin Lutfullaev – 7 o'rin, Diyorbek O'rozboev – 16 o'rin
-66 kg. Rishod Sobirov – 7 o'rin
-73 kg. Mirali Sharipov – 29 o'rin
-81 kg. Shahzod Sobirov – 18 o'rin
-90 kg. Sherali Jo'raev – 24 o'rin
-100 kg. Ramziddin Saidov – 32 o'rin
+100 kg. Abdullo Tangriev – 30 o'rin
Biz esa o'z navbatida mamlakatimiz sportchilariga bo'lajak nufuzli musobaqalarda ham omad va zafarlar tilab qolamiz. Shavkat Jalilov O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.