Bu yilgi mavsumdan “Mash'al” jamoasini bir qancha futbolchilar tark etishdi.
Shular qatori jamoadan rasman ketgan Abbos Amonov ham bor,  biz bu yilgi mavsum va o'zgarishlar haqida bilish uchun ushub futbolchini suhbatga chorladik.
- Salom Abbos kayfiyatlar yaxshimi?
- Rahmat xudoga shukur, barchasi alo darajada.
- Abbos bu yildan e'tiboran siz “Sho'rtan” jamoasida to'p tepasiz, o'tgan mavsum ham g'uzorliklar tarkibida ko'rikda bo'lib, mavsum boshlanishiga yaqin qolganda yana “Mash'al” tarkibiga qaytgan edingiz.
- Ha shunday, ammo bu yildan etiboran yana jonajon klubim “Sho'rtan”da faoliyat ko'rsatishga qaror qildim.
- G'uzorliklar bilan tuzgan shartnomangiz necha yilga mo'ljallangan?
- “Sho'rtan” klubi bilan bir yilga shartnoma imzoladim. Agarda klub murabbiylari va rahbariyatga ma'qul kelsam, shartnomani uzaytirishim mumkin.
- Sizningcha “Sho'rtan”da qanday o'zgarishlar bor?
- “Sho'rtan” nafaqat viloyatimizda, balki mamlakatimizda qolaversa Osiyoda OFK kubogidagi ishtiroki bilan tanilgan jamoa hisoblanadi. Menimcha jamoada katta o'zgarish ro'y bergan emas. Klub o'z imkoniyati darajasida transferlarni oshirdi. Tarkib yomon emas, nasib etsa yangi mavsumda muxlislarimizni albatta xursand qilamiz.
- “Sho'rtan” klubidagi mavjud shart-sharoitlar sizni qoniqtiradimi?
- Futbolchilar uchun barcha sharoitlar a'lo darajada hammasi meni qoniqtiradi. Maydonlar holati ham ajoyib. Oliy liga o'yinlarini o'tkazadigan asosiy maydonimiz ham hozir juda yaxshi holatda, xullas G'uzorda yangi futbol mavsumi uchun hammasi tayyor.
- Siz bu erdagi sharoitlarni sobiq jamoangizdagi sharoitlarga taqqoslab ko'rasizmi?
- Menda  “Mash'al” jamoasidan juda iliq xotiralar qolgan. Muborakda ajoyib ikki mavsumni o'tkazdim, Muborakda to'p surgan ilk kunlarimdanoq men xuddi o'z uyimda yurgandek his qilganman. Sharoitlar bo'yicha taqqoslaydigan bo'lsam “gazchilar” shahrida barchasi professional tarzda tashkil etilgan. Mashg'ulotlar va tayyorgarlik  uchun alohida maydonlar qilingan.
B. Vafoev nomli asosiy o'yingoh esa doim bir xilda yam-yashil holatda turadi. U erda barcha o'z ishining proflari yig'ilgan desam, xato bulmaydi. Fursatdan foydalanib meni kulubda qo'llab-quvvatlagan rahbariyatga, jamoadoshlarimga va muboraklik muxlislarga o'z minnatdorchiligimni bildiraman.
- Abbos, xuddi sizdek Sanjar Quvvatov ham bu yildan “Mash'al”ni tark etdi va yangi jamoasi – “Nasaf”da Superkubok sohibiga aylandi.
- Avvalo do'stim Sanjarni va “Nasaf” jamoasini hamda butun voha ahlini ana shu tarixiy g'alaba bilan chin yurakdan tabriklayman. Sanjarning “Nasaf”ga o'tgani bu uning uchun oldinga tashlangan qadam bo'ldi. Mana debyut o'yinidayoq nufuzli sovrin sohibiga aylandi, qolaversa u bu yil Osiyoning nufuzli turniri OChLda ham ishtirok etmoqda. Suyunov va Quvvatovlar o'zi avvaldan do'st edilar. Bilasiz ular o'z vaqtida Muborakda, “Mash'al” akademiyasida birga tahsil olishgan. Oradan bir muddat vaqt o'tib ular yana mamlakatning eng kuchli jamoalaridan biri bo'lmish – “Nasaf”da birlashishdi. O'ylaymanki, “Nasaf”da teng kuchli ikki darvozabon paydo bo'ldi va bu haqiqiy raqobatni  yuzaga keltiradi. Ular endi kim asosiy darvozabon ekanligini isbot qilishga urinishadi. Yana bir jihati kelgusida ularning ikkalasi ham milliy terma jamoa safida faoliyat yuritishadi, bunga hech shubham yo'q. Fursatdan foydalanib, do'stim Sanjarga va “Nasaf” jamoasiga oliy liga va OChLda omadlar tilayman.
- Yana “Mash'al” jamoasiga qaytsak, “gazchilar” o'tgan yili 7-o'rin bilan kifoyalanishdi, sizningcha ular bundan ko'piga loyiqmi?
-  “Mash'al” juda barqaror jamoa, tarkib hozir ham juda ajoyib bu yil 3-4 nafar futbolchi jamoani tark etdi,  ammo bu jamoaga umuman  ta'sir ko'rsatmaydi. Chunki akademiyadan etishib chiqayotgan yosh iqtidorlar juda ko'p. Ular ketgan futbolchilar o'rnini bemalol to'ldira olishadi. Hoizirda mamlakatimiz turli yosh toifasidagi terma jamoalari tarkibida kamida 2-3 nafar “Mash'al” akademiyasi tarbiyalanuvchisini ko'rish mumkin, bu ham o'z navbatida ish jarayoni juda yaxshi yo'lga qo'yilganidan dalolatdir.
- “Mash'al” jamoasi va muboraklik muxlislarga tilaklaringiz?
- Sobiq jamoamga yangi mavsumda yanada yuqori o'rinlarni egallashlarini chin ko'ngildan istayman. O'ylaymanki, “Mash'al” bu yil ham “Nasaf”, “Paxtakor”, “Lokomotiv” va “Bunyodkor”  jamoalariga haqiqiy boshog'riq jamoa bo'la oladi. Muboraklik muxlislar esa doim sog' bo'lishsin, “Mash'al”ni esa omad tark etmasin.
- Suhbatingiz uchun rahmat!
- Salomat bo'ling! Suhbatni Dilshod Safarov olib bordi.
Manba: voha.uz
— deya xabar beradi uff.uz nashri.