Madridning "Real" klubi yarim himoyachisi Guti "Atletiko" himoyachisi Diego Godinga javob qaytardi. Biroz vaqt muqaddam Guti "Atletiko"ning biror futbolchisi "Real"ga mos kelmasligini aytgach, Godin undan "Atletiko" o'yinchilariga nisbatan hurmat bilan fikr bildirishni talab qilgan edi.
"Men yana bir bor o'sha gapimni takrorlayman: "Atletiko" futbolchilari Diego Simeonening o'yin uslubi uchun juda yaxshilar, ammo birortasi "Real"da o'ynab keta olmaydi.
Futbol haqidagi gaplarning esa kamtarlikka mutlaqo dahli yo'q. Albatta men Godin va dunyodagi boshqa barcha futbolchilarni hurmat qilaman. Chunki o'zim ham futbolchi bo'lganman. Mening ota-onam va "Real" boshqalarga nisbatan hurmat bilan munosabatda bo'lishga o'rgatgan.
Men "Atletiko" "Santyago Bernabeu"da yuta olmaydi, demadim. Shunchaki, bu jamoa futbolchilari "Atletiko" uchun juda yaxshilar, ammo "Real" uchun emas", - deydi Guti.
— deya xabar beradi uff.uz nashri.