Poytaxtimizda o'tkazilgan futzal bo'yicha Osiyo chempionatida finalga qadar etib borib, o'z tarixida to'rtinchi marta Osiyo vitse-chempioniga aylangan O'zbekiston terma jamoasi qisqa muddatli tanaffusdan so'ng jahon chempionatiga tayyorgarlikni boshlaydi.
Mart oyida O'zbekiston chempionatining 4-tur uchrashuvlari bo'lib o'tishi rejalashtirilgan. Shundan so'ng terma jamoamizning Kolumbiyada o'tkaziladigan mundialga tayyorgarlik bosqichi boshlanishi kutilmoqda. Toshkentdagi musobaqa yakunlangach, termamiz bosh murabbiyi Xose Mariya Mendez Osiyo chempionatining hal qiluvchi o'yinlarini ko'rish maqsadida poytaxtimizga tashrif buyurgan otasi bilan Ispaniyaga jo'nab ketgandi. Biz ta'tilni davom ettirayotgan futzalchilarimizdan biri Jamoliddin Sharipovdan intervyu oldik.
- Jamoliddin, Osiyo chempionatining chorak final bahsi yakunlangach, aksariyat futzalchilarimiz singari siz ham ko'zingizga yosh odingiz. O'sha onlarni yana bir bor eslasak...
- Albatta, bu sevinch yoshlari edi. Shuncha yillik mehnatning samarasi o'laroq, jahon chempionati yo'llanmasi qo'lga kiritilgandi. Nafaqat men, balki boshqa jamoadoshlarim ham final bongi yangraganidan so'ng xursandchilikdan ko'zimizga yosh oldik. 14-Osiyo chempionati futzalimiz tarixiga zarhal harflar bilan yoziladigan bo'ldi. O'sha - Iroqqa qarshi kechgan uchrashuvdan so'z barchamiz o'zimizda yo'q xursand edik. Bundan avvalgi qit'a chempionatlarida maqsad sari bir qadam qolar, lekin yo'llanmani qo'lga kiritishning imkoni bo'lmasdi. Nihoyat, poytaxtimiz uchinchi marotaba mezbonlik qilgan musobaqada orzularimiz ushaldi.
- Guruh bosqichining ilk uchrashuvida Saudiya Arabistoni termasi qiyinchilik bilan mag'lub etildi. Mazkur bahsning shunday murakkab o'tishiga nima sabab bo'ldi?
- Har qaysi musobaqaning dastlabki o'yini hamisha mezbon uchun qiyin kechgan. Ha, Saudiya Arabistoni Osiyo chempionati debyutanti edi. Lekin bu ularning kuchsiz ekanligini ko'rsatmaydi. Saudiyaning Qirg'iziston va Livan bilan uchrashuvlarda qanday o'yin namoyish etganini ko'rdingiz. Maydonga chiqib kelayotganimizda hammamizda hayajon bor edi. Arena muxlislar bilan liq to'lgandi. Barchamizni «Xalqimizning ishonchini oqlay olarmikanmiz?» degan savol qiynardi. Bu bir tomondan bizga bosim yuklardi. Ana shu bosim birinchi bo'limda yaqqol ko'zga tashlanib qoldi. Ikkinchi bo'limda esa o'z o'yinimizni topib oldik va kerakli natijaga erishdik.
- Qirg'iziston bilan o'yin bizga chorak final eshiklarini ochardi. Juda ham qiziqarli kechgan uchrashuv sizda qanday taassurot qoldirdi?
- Haqiqatan ham, yon qo'shnilarimiz bilan bo'lib o'tgan bahs juda murakkab kechdi. Chorak finalda Eronga tushib qolmaslik uchun ham jamoalar bu o'yin-da g'alaba qozonishlari kerak edi. Tabiiyki, biz muxlislarimizni xushnud etish barobarida guruh g'olibi sifatida chorak finalga chiqishni maqsad qilgandik. Uchrashuv oldidan ko'pchilikda biroz xavotir ham yo'q emasdi. Mazkur bahs kutilganidek qiyin kechdi va yakunda biz kichik ustunlik bilan g'alaba qozonib, muddatidan avval 1-o'rinni egallagan holda chorak finalga yo'l oldik.
- Yarim finaldagi raqib - Tailand termasi juda ham kuchli edi. G'o-libning «lotereya»dan aniqlangani ham shundan dalolat. Bizdan penalti tepuvchilar oldindan ma'lum edimi?
- Xuddi shunday. Guruh bosqichidan chiqqanimizdan keyin har ehtimolga qarshi penaltilar tepishni ham mashq qilgandik. Jamoadoshlarim o'zlariga bildirilgan ishonchni to'liq oqlashdi. Agar navbat bizga ham etib kelganida, bu vazifani bajarishga tayyor edik.
- Finalda Eronga qarshi o'ynadinglar. Bundan avvalgi o'zaro to'qnashuvlarda qit'amizning tengsiz jamoasi yirik hisoblarda zafar quchgandi. Ammo bu safar raqibdan hech bir jabhada qolishmadinglar...
- Uchrashuvga chiqishdan oldin jamoamiz bilan kichik yig'ilish o'tkazib, natija qanday bo'lishidan qat'iy nazar, ishqibozlar uchun o'ynashga kelishib oldik. Finalgacha g'alabalarimizdan xursand bo'lib kelgan muxlislarimizning kayfiyati bitta o'yinda tushib ketmasligi uchun harakat qildik. 11 karra Osiyo chempioniga aylangan Eron termasini mag'lub etishimiz ham mumkin edi. Agar so'nggi daqiqalarda yuzaga keltirilgan qulay vaziyatlardan foydalana olganimizda, Osiyo chempionligini qo'lga kiritarmidik...
Davomi InterFUTBOL gazetasi blogida.
— deya xabar beradi uff.uz nashri.