Prezidentimiz rahnamoligida xotin-qizlarni jismoniy tarbiya va sportga keng jalb etish, ularning sport bilan muntazam shug'ullanishi uchun zarur sharoit yaratishga qaratilayotgan alohida e'tibor jismonan sog'lom, ma'nan etuk farzandlarni tarbiyalashda yuksak samaralar bermoqda.
Bugun yurtimizning chekka tuman va qishloqlarida ham barcha talablarga javob beradigan sport inshootlari barpo etilib, zamonaviy tarzda jihozlanmoqda, malakali murabbiylar bilan ta'minlanmoqda. Xotin-qizlar o'rtasida turli sport musobaqalari o'tkazish, xalqaro miqyosda Vatanimiz sha'nini ulug'layotgan sportchi qizlarni qo'llab-quvvatlash va rag'batlantirishning samarali tizimi yaratildi.
Surxondaryo viloyatida 110 mingga yaqin xotin-qiz sportning 27 turi bilan muntazam shug'ullanmoqda. Ularning 98 mingdan ortig'i 6 yoshdan 18 yoshgacha bo'lgan qizlardir. Sog'lomlashtirish guruhlariga esa 316 mingga yaqin opa-singillarimiz jalb etilgan.
– Xotin-qizlar o'rtasida jismoniy tarbiya va sportning ommalashib borayotgani oilalarda sog'lom turmush tarzini qaror toptirish, ona va bola salomatligini muhofaza qilish, aholining tibbiy madaniyatini yuksaltirish borasida amalga oshirilayotgan ezgu ishlar samarasidir, – deydi Surxondaryo viloyati hokimi o'rinbosari, viloyat xotin-qizlar qo'mitasi raisi Mavluda Qobulova. – Bunda qizlarning sport bilan shug'ullanishi uchun barcha sharoit yaratilayotgani, “Umid nihollari”, “Barkamol avlod”, Universiada sport musobaqalari, “Ayollar sport festivali” kabi tadbirlar muhim omil bo'lmoqda.
O'tgan yili viloyatda tashkil etilgan 2 ming 500 dan ortiq sport bellashuvlarining 2 ming 300 ga yaqini qishloqlarda o'tkazilib, ularda 260 mingdan ortiq sportchi o'zaro bahslashdi. Ushbu musobaqalarda ishtirok etgan sportchilarning qariyb 121 ming nafari xotin-qizlardir.
Xotin-qizlar salomatligini mustahkamlash, hech kimdan kam bo'lmagan sog'lom avlodni voyaga etkazish borasida amalga oshirilayotgan bunday ulkan ishlar qizlarimizning turli musobaqalarda sovrinli o'rinlarni qo'lga kiritayotganida ham o'z ifodasini topmoqda. Xususan, o'tgan yili surxondaryolik sportchi qizlar mamlakat va xalqaro musobaqalarda 120 dan ortiq oltin, kumush va bronza medallarga sazovor bo'ldi.
Sportchilarimizning nufuzli musobaqalarga puxta tayyorgarlik ko'rishi va munosib ishtirok etishida Prezidentimizning 2013 yil 25 fevraldagi “O'zbekiston sportchilarini 2016 yilda Rio-de-Janeyro shahrida (Braziliya) bo'lib o'tadigan XXXI yozgi Olimpiya va XV Paralimpiya o'yinlariga tayyorlash to'g'risida”gi qarori muhim dasturilamal bo'lmoqda. Jumladan, o'tgan yili termizlik Sitora Hamidova Polshada engil atletika bo'yicha o'tkazilgan xalqaro marafonda muvaffaqiyatli ishtirok etib, Braziliyada bo'lib o'tadigan XXXI yozgi Olimpiya o'yinlariga yo'llanmani qo'lga kiritdi.
O'n to'rt yoshidan engil atletika bilan shug'ullanib kelayotgan Sitora Termiz shahridagi 6-umumta'lim maktabi, so'ngra Termiz olimpiya zaxiralari kollejida ta'lim-tarbiya oldi. 2012 yilda Termiz davlat universitetining jismoniy madaniyat fakultetini muvaffaqiyatli tamomladi. Shu yillarda u “Umid nihollari”, “Barkamol avlod”, Universiada musobaqalarida g'oliblikni qo'lga kiritdi. Bir necha bor O'zbekiston chempioni, degan yuksak sharafga sazovor bo'ldi. Ayni paytda u Termiz shahridagi bolalar va o'smirlar sport maktabida yosh avlodga engil atletika sirlarini o'rgatmoqda.
– Biz erishayotgan bunday muvaffaqiyatlar zamirida yoshlar uchun yaratib berilayotgan keng sharoit va imkoniyatlar mujassam, – deydi S.Hamidova. – Sportni rivojlantirishga qaratilayotgan doimiy e'tibor, barpo etilayotgan zamonaviy sport inshootlari biz, yoshlarning irodamizni toblab, o'z kuch va imkoniyatimizga ishonchni mustahkamlamoqda, eng muhimi, barkamol ulg'ayishimizga xizmat qilmoqda.
Viloyat qizlari o'rtasida sportning badiiy va sport gimnastikasi, suzish, tennis va stol tennisi kabi nafis turlari tobora ommalashib borayotgani ularning bo'yi va vazni mutanosibligini ta'minlash, sog'lom va durkun o'sishida muhim omil bo'layotir. Farzandlari barkamolligi yo'lida yaratilayotgan bunday sharoitlardan, ayniqsa, ota-onalar mamnun.
– Qizim Lobar ozg'ingina bo'lib, tez-tez shamollar edi, – deydi Termiz tumanilik Gavhar Mannopova. – Badiiy gimnastika to'garagiga qatnay boshlagach, salomatligi va qaddi-qomatida sezilarli o'zgarish yuz berdi. Harakatlari tezlashib, bo'y-basti o'sdi. Hozir uning nafis harakatlarini kuzatib, quvonamiz, havasimiz keladi. Farzandlarimizni sog'lom va tetik voyaga etkazishga g'amxo'rlik ko'rsatayotgan Prezidentimizdan minnatdormiz.
Manzil: UzA, olympic.uz
— deya xabar beradi uff.uz nashri.