An'anaga muvofiq, gazetamiz orqali oy laureatlarini aniqlashda davom etamiz. To'g'ri, aslida, bu ishni yanvardan boshlash niyatimiz yo'q emasdi. Biroq yil boshida futbolchilarimiz tomonidan qayd etilgan natijalar qoniqarli ko'rinish olmagani bois, eng yaxshilarni e'tirof etishni fevralga qoldirishni ma'qul ko'rdik.
O'z navbatida, reytingdagi yana bir o'zgarish millionlar o'yinining kichik ko'rinishi - futzal bilan bog'liq. Zero, mundial yo'llanmasini qo'lga kiritib, tarixiy natija qayd etgan Xose Mariya Mendez va futzalchilarimizni e'tirof etmaslik adolatdan bo'lmaydi. Ayniqsa, ularning joriy yil sentyabrida boshlanadigan jahon chempionatida ishtirok etishlarini inobatga olsak, kuzda o'z hisoblariga navbatdagi ochkolarni yozadiganlar topilishidan umidvormiz. O'z navbatida, OChLning yangi mavsumida ilk o'yinlarini o'tkazgan jamoalarimizda ham o'zlarini ijobiy tomondan ko'rsatganlar uchradi. Quyida fevral oyi laureatlari bilan tanishtiramiz.
Xabaringiz bor, Toshkent shahri uchinchi marta futzal bo'yicha Osiyo chempionatiga mezbonlik qildi. Avvalgilaridan farqli o'laroq, bu galgi turnir jahon chempionati yo'llanmasining o'ynalishi bilan ahamiyatli edi. Shu bois, har bir ishtirokchi davlat termalari musobaqaga qizg'in hozirlik ko'rishdi. Ular orasida tabiiyki, hamyurtlarimiz ham bor edi. Mezbon sifatida futzalchilarimizdan o'zlarini ko'rsatishlari talab etilardi. Aslida, shunday ham bo'ldi. Bahsdan-bahsga o'yinini kuchaytirgan vakillarimiz guruhdan 100 foizlik natija bilan chiqishdi. Chorak finalda iroqliklarni engib, joriy yil Kolumbiyada o'tadigan mundial yo'llanmasini qo'lga kiritishdi. So'ngra yarim finalda Tailand termasi mag'lubiyatga uchratildi, finalda esa forslar bilan tengma-teng o'ynashdi.
Ushbu natijalarning qo'lga kiritilishida asosiy sababchilardan biri bo'lgan darvozabon Rustam Umarovni fevral oyi yakunlariga ko'ra birinchi o'ringa qo'yishni ma'qul ko'rdik. Darhaqiqat, mahoratli kiper termamizning barcha o'yinlarida raqib zarbalarini qaytarib, jamoadoshlari joniga oro kirdi. Rustamning turnir yakunida e'lon qilingan ramziy termadan joy olgani musobaqada undan yaxshiroq darvozabonning yo'qligiga ishora. Nasib qilsa, Umarov mundialda ham o'zining ijobiy xislatlarini namoyish etib, jamoatchilik mehrini qozonadi va albatta, termamiz yutuqlariga hissa qo'shadi.
OChLning yangi mavsumini boshqa klublarimizdan oldinroq boshlagan «Bunyodkor» dastlabki ikkita uchrashuvni ko'tarinki kayfiyatda o'tkazdi. «Qaldirg'ochlar» dastlab «pley-off»da BAAning «Al-Shabab» klubini engib, kerakli natijani qo'lga kiritishdi. Ushbu bahsda «dubl» qayd etib, jamoasini guruh bosqichiga olib chiqqan Eldor Shomurodovni bugungi reytingimizning ikkinchi o'rniga loyiq ko'rdik. O'tish o'yinida o'zidan yorqin taassurot qoldirgan tezkor futbolchi Saudiya Arabistonining «Al-Nasr» klubiga qarshi kechgan 1-tur uchrashuvida ham yorqin xatti-harakatlari bilan alohida ajralib turdi.
Uchinchi o'rinni esa futzal bo'yicha Osiyo chempionati ramziy termasidan joy olgan yana bir hamyurtimiz Dilshod Rahmatov egalladi. Poytaxtimizda o'tkazilgan turnir davomida ushbu futzalchimizning bir-biridan chiroyli gollariga guvoh bo'ldik. Ayniqsa, Rahmatovning Iroqqa qarshi kechgan bahsdagi xatti-harakatlari tahsinga sazovor. Eng asosiysi, Dilshod termamizning mundial yo'llanmasini qo'lga kiritishida asosiy sababchilardan biriga aylandi. Uning Kolumbiyada bundan-da kuchliroq o'yin namoyish etib, jamoa g'alabalariga hissa qo'shishiga tilakdoshmiz.
Shuningdek, Dilshod Irsaliev, Artur Yunusov, Farhod Abdumavlonov, umuman, barcha futzalchilarimiz fevral oyi uchligidan joy olishga loyiq edilar. Ammo vaziyat ularning hammasini reytingga kiritishimizga to'sqinlik qildi. O'z navbatida, «Bunyodkor»-«Al-Nasr» uchrashuvining eng yaxshi o'yinchisi Dostonbek Hamdamov, superkubok bahsidagi hal qiluvchi gol muallifi Artur Gevorkyan, «Lokomotiv» va «Paxtakor»ni mag'lubiyatdan saqlab qolgan gollar mualliflari - Sardor Mirzaev va Davron Hoshimov, «Nasaf»dagi o'yini orqali muxlislar nazariga tushgan Bobir Abduxoliqovlarni ham alohida e'tirof etish joiz.
Murabbiylar borasida gap ketganda, shubhasiz, futzal bo'yicha O'zbekiston termasini mundialga olib chiqqan Xose Mariya Mendez haqli ravishda birinchi o'rinni egalladi. Ispaniyalik mutaxassis termamizga g'oliblik ruhini singdirib, shogirdlarini bir maqsad yo'lida birlashtira oldi. U matbuot anjumanlarida aytganlarini amalda uddaladi, gapining ustidan chiqdi. Bunday kishilar esa har doim maqtovga loyiq ko'riladilar. Demak, Mendezga JCh yo'llanmasi uchun tashakkur bildirgan holda uni fevral oyining eng yaxshi murabbiyi, deb topdik.
Davomi InterFUTBOL gazetasi blogida.
— deya xabar beradi uff.uz nashri.