Ma'lumki, futbolchilar yangi klubga o'tgan paytlarida chuqurlashtirilgan tibbiy nazoratdan o'tishadi. Aslida, bu jarayon kimlargadir keraksizdek tuyulishi mumkin. Ammo yangi o'yinchi uchun katta pul to'lagan klublar ham kutilmagan noxushlikka duch kelishni istashmaydi va shu sababli ham shartnoma imzolashdan oldin o'z «xarid»larini sinchiklab tekshirishadi. Zero, bir qarashda sog'lomdek tuyulgan futbolchilarda ham ba'zida kam uchraydigan kasalliklar uchrab qolishi hech gap emas.
Franko Barezi
Dunyo futboli tarixidagi eng buyuk himoyachilardan biri sog'liqdagi kutilmagan muammoga uchragan. Barezi - Italiya termasi safida 1982 yilgi JCh g'olibi, JCh-1994 finalchisi, «Milan» klubi bilan uch karra ChL g'olibi hisoblanadi. Lekin bungacha... Bungacha bo'lgan voqealar xuddi qo'rqinchli tushga o'xshaydi. Ya'ni Barezi endigina 21 yoshga kirganida, birdan nogironlar aravachasiga o'tirib qoladi. Chunki shifokorlar uning qonida kamdan-kam uchraydigan va kishiga ming bir xil azob beradigan virus borligini aniqlashgandi. Frankoning keyinroq eslashicha, o'shanda u o'z tanasida chidab bo'lmas og'riqlarni sezgan. Lekin futbolchining omadi bor ekan: kasallik uning tanasiga qanday kelgan bo'lsa, xuddi shunday tarzda birdan yo'qoldi. Shundan so'ng italiyalik futbolchi maydonga qaytib, 37 yoshgacha to'p surdi va afsonalar qatoriga kirdi.
Morten Vigxorst
Vigxorstni tanimaganlar uchun ma'lumot: u Daniya terma jamoasining sobiq yarim himoyachisi, milliy jamoada 30 o'yin o'tkazgan fidoyi futbolchi. Faoliyati davomida «Lyungbyu», «Dandi», «Seltik» va «Brondbyu» klublari sharafini himoya qilgan. U futbolchilik davrida oyog'idagi eski jarohatidan tez-tez nolib yurardi. Lekin 2000 yilga kelib, unda hadeb uchrayvermaydigan Morten xastaligi borligi aniqlanadi. Bu kasallik bosh miya faoliyati bilan bog'liq bo'lib, «Giyena - Barre sindromi» deb ataladi va miyani ishdan chiqarib, halokatga sabab bo'lishi ham mumkin edi. Tabiiyki, tashxis qo'yilgandan keyin shifokorlar unga darhol futbol bilan xayrlashishni maslahat berishadi. Ammo tabiatan o'jar odam bo'lgan Vigxorst nafaqat kasallikni engadi, balki maydonga qaytishni ham uddaladi. Hatto, 2002|03 yillar mavsumi yakuniga ko'ra u mamlakatning eng yaxshi futbolchisi deb tan olinadi. Keyinroq Vigxorst murabbiylikdagi faoliyatini ham yo'lga qo'yadi.
Mark Gonsales
Agar dunyodagi eng omadsiz futbolchilarning maxsus ro'yxati tuzib chiqilsa, shubhasiz, undan TsSKAning sobiq a'zosi Gonsalesga ham joy topilardi. Zero chililik bu futbolchi maydondan ko'ra, shifokorlar xonasida ko'proq vaqt o'tkazgan desak, yanglishmagan bo'lamiz. Boz ustiga, Mark qaysidir lahzalarda qolgan umrini aravachada o'tkazishga mahkum etilgandek ham tuyulgan. Bularning hammasiga sabab shuki, Gonsales tos suyagi bo'g'inida o'tkazilgan jarrohlik amaliyotidan so'ng qandaydir asorat orttirib oladi-yu, shu bo'yi muammolar girdobida qoladi. Statistikaning guvohlik berishicha, bunday jarrohlik amaliyotidan so'ng 98 foiz bemorlar sog'ayib ketishadi. Gonsales esa kutilmaganda, bor-yo'g'i 2 foizgina omadsizlar qatoridan joy oladi. Shunga qaramay, irodali chililik barcha qiyinchiliklarni engib, futbolga qaytadi va hatto terma jamoa libosini kiyishga ham ulguradi.
Emers Fae
Kot-d’Ivuar termasining sobiq yarim himoyachisi faoliyatining eng gullagan chog'ida - 2012 yilda professional futbolchilik kasbi bilan xayrlashadi. Vaholanki, u 2006 yili terma jamoa safida Afrika kubogi finaliga chiqib, ajoyib o'yin ko'rsatgandi. Shu bois, Angliyaning «Reding» klubi 2,5 million funtdan voz kechib, uni o'z tarkibiga qo'shib oladi. Afsuski, oradan ko'p o'tmay, futbolchida g'oyat kam uchraydigan kasallik - vena tomirlarining shamollashi borligi ma'lum bo'ladi. Fae xastaligiga qaramay, mashg'ulotlarda qatnashaveradi. Biroq 28 yoshga to'lganda baribir, butsalarini mixga iladi.
Davomi InterFUTBOL gazetasi blogida.
— deya xabar beradi uff.uz nashri.