Bugun, 5 mart kuni O'zbekiston professional futbol ligasining 2016 yilgi mavsumi start oladi.
Ushbu mavsumning dastlabki tur o'yinlari 5, 6 hamda 7 mart kunlari davomida bo'lib o'tadi.
Quyida 1-tur o'yinlari taqvimini keltirib o'tamiz:
5 mart, shanba.
16:00 “Qo'qon-1912” – “Obod”
16:00 “Metallurg” – “So'g'diyona”
16:45 “Buxoro” – “Olmaliq”
17:00 “Qizilqum” – “Mash'al”
18:00 “Bunyodkor” – “Neftchi”
6 mart, yakshanba.
16:00 “Navbahor” – “Lokomotiv”
17:00 “Nasaf” – “Sho'rtan”
7 mart, dushanba.
17:30 “Paxtakor” – “Andijon”
Chempionat debyutanti — Toshkentning “Obod” klubi mavsumni Qo'qonga safar qilish bilan boshlaydi. Ushbu jamoalar Oliy liga doirasida hali o'zaro to'qnash kelmagan. Obod ikki mavsum avval ikkinchi ligadan birinchi ligaga yo'l olib, O'zbekiston birichniligining o'tgan yilgi yakunlariga ko'ra Oliy ligada ishtirok etish huquqini qo'lga kiridi. “Qo'qon-1912” esa O'tgan mavsumda Oliy liga debyutanti sifatida ishtirok etib, yakunda uni 12-o'rin bilan nixoyasiga etkazgandi.
Bekobod shahrida o'zaro to'qnash keladigan “Metallurg” va “Sug'diyona” shu vaqtga qadar Oliy liga doirasida 28 bora to'qnash kelgan. Bu o'yinlarda 12 bora “So'g'diyona”, 10 marta “Metallurg” g'alaba qozongan va 6 o'yin durang natija qayd etilgan. Bekobodda o'tkazilgan so'nggi 4 uchrashuvning barchasida Rustam Mirsodiqov shogirdlari g'alaba qozonib kelmoqda.
O'z maydonida “Olimaliq”ni qabul qiladigan “Buxoro” uchun Shkvirin jamoasi juda noqulay raqiblardan biri hisoblanadi. Shu vaqtga qadar jamoalar Oliy liga doirasida, Buxoroda 7ta o'yinda maydona tushgan bo'lsa, ularning to'rttasida aynan safarda o'ynagan “Olmaliq” g'alaba qozongan. Faqatgina uchtasida buxoroliklar zafar quchgan. Jamoalarning Buxoroda o'tkazilgan o'zaro o'yinlarida shu vaqtga qadar durang natija qayd etilmagan. Avvalgi mavsum doirasida Buxoroda bo'lib o'tgan uchrashuvda “Olmaliq” yirik — 4:0 hisobida g'alaba qilgan.
Navoiyda “Qizilqum” Muborakning “Mash'al” klubini qabul qiladi. Zarafshonliklar Muborak jamoasini o'z maydonida to'qqiz mavsumdan buyon mag'lub eta olayotgani yo'q. Yangi mavsumning dastlabki uchrashuvida “Mash'al” ushbu an'anani saqlab qolishga harakat qilsa, “Qizilqum” esa nixoyat o'zi uchun noxush seriyaga barxam berishga harakat qiladi.
Mavsumni Osiyo chempionlar ligasi o'yinlari orqali barchadan avval boshlab ulgurgan “Bunyodkor” Oliy liga doirasidagi ilk o'yinida “Neftchi”ni qabul qiladi. Avvalgi mavsumda “Neftchi” o'z tarixida birinchi marta safarda “Bunyodkor”ni mag'lub eta oldi. Unga qadar ikki o'yinda durang o'ynab, qolgan 6 o'yinda mag'lub bo'lgan.
Avvalgi mavsumning so'nggi turida “Navbaxor” maydoniga safar qilib, dramatik o'yinda 3:2 hisobida g'alaba qozongan “Lokomotiv” yangi masumni ham Namanganga safar bilan boshlaydi. Mavsumlar oralig'ida tarkibga ko'pgina yangi futbolchilarni jalb qilgan har ikki jamoa ham yakshanba kuni chempionatni muvaffaqiyatli boshlab olishga intiladi. Ta'kidlash kerakki, “Lokomotiv” uchun 2016 yilgi mavsum allaqachon boshlanib ulgurgan va “temiryo'lchilar” Osiyo chempionlar ligasi doirasida ikki o'yin o'tkazib, har ikkisida bittadan ochko olib ulgurdi. “Navbaxor” esa yangi mavsumdagi ilk ochkolarni aynan Toshkent jamoasiga qarshi o'yinda qo'lga kiritishga urinadi.
Ikkinchi mart kuni Saudiya Arabistonining “Al-Ahli” klubini qabul qilib, 2:1 hisobida g'alaba qozongan qarshiliklar endi, 6 mart, yakshanba kuni Qarshidagi “Markaziy” o'yingohda Qashqadaryoning boshqa bir klubi — “Sho'rtan”ni qabul qiladi.
Turni esa O'zbekistonning amaldagi chempioni “Paxtakor” hamda Baxtiyor Ashurmatov boshchiligidagi “Andijon” jamoalari o'rtasida Toshkentda bo'lib o'tadigan o'yin yakunlab beradi. Ushbu o'yin dushanba, 7 mart kuniga belgilangan.
— deya xabar beradi uff.uz nashri.