Ha, dunyo futbolidagi eng durdona liganing bag'ri juda keng. Unda er yuzining turli burchaklaridan tashrif buyurgan legionerlarni ko'rish mumkin. Endi ajoyib faktga e'tibor qarating: APLda shu kunga qadar 101ta mustaqil davlat (Buyuk Britaniya tarkibidagi Angliya, Shotlandiya, Uels va Shimoliy Irlandiyadan tashqari) vakiliga loaqal bitta gol urish nasib etgan ekan.
Qoyilmisiz? Demak, ingliz fanatlari 100tadan ortiq davlat fuqarolari urgan gollarga shohid bo'lishgan. Tushunarliki, APLda Frantsiya, Ispaniya, Gollandiya yoki Daniya vakillari etarlicha gol zavqini tuyishgan. Lekin o'sha 101ta mamlakat orasida o'ta ekzotik o'lka sanaluvchilari ham ko'p. Umuman, bunday «notanish» davlat vakillari tomonidan urilgan har bir gol o'sha joylarda katta xursandchilik bilan qarshi olinadi. Deylik, Bertran Traore «Chelsi»-«Nyukasl» o'yinining 60-daqiqasida Diego Kosta o'rniga maydonga tushdi va oradan 22-23-daqiqa o'tgach, o'z jamoasining 5-goliga mualliflik qildi. Tabiiyki, yosh hujumchi|vinger|hujumkor yarim himoyachi bu goli bilan ona vatani - Burkino-Fasodagi muxlislarga alohida xursandchilik ulashdi. Axir Traorening shu aniq zarbasi o'laroq, Burkino-Faso APLda o'z vakili gol urgan 101-mamlakatga aylandi. Demak, endi Angliya  premer-ligasida fuqarosi gol quvonchini tuygan ekzotik mamlakatlar bilan tanishib chiqamiz.
Bertran Traore - Burkina-Faso
Afrikalik superiqtidor hozir 20 yoshda. U «Chelsi» tizimiga «Oser»dan o'tdi va yarim mavsum ijara asosida «Vitess» (Gollandiya) sharafini himoya qildi. Avvalgi yozda esa nihoyat, Buyuk Britaniyada ishlash uchun ruxsatnoma olib, «aristokratlar»ning rasmiy o'yinida debyut qilish imkoniyatiga ega bo'ldi. Xullas, Traore ilk marta sentyabr oyida ChL doirasida «Makkabi» bilan o'yinda maydonga tushdi. Dekabr oyiga kelib esa (Mourinoning iste'foga chiqishidan 2 haftacha oldin), premer-ligada ham debyutini nishonladi. Shu tariqa u APLda o'yinga tushgan Burkina-fasolik birinchi futbolchiga aylandi. Mana, yaqinda Gus Xiddink qo'l ostida o'z davlati uchun tarixiy golni ham urdi. Aytgancha, Traore 15 yoshligidan buyon Burkina-Faso milliy jamoasida o'ynamoqda.
Kuko Martina - Kyurasao
Joriy mavsumdagi yana bir debyut. Yozda «Tvente»dan «Sautgempton»ga o'tgan o'ng qanot himoyachisi Kuko Martina ayni payt kuchli raqobat tufayli maydonga kam tushyapti. Ya'ni hozircha o'z pozitsiyasida Sedrik Soareshdan ustun ekanligini isbotlay olgani yo'q. Lekin u Boxing Day vaqti «Arsenal»ga qarshi kechgan o'yinda asosiy tarkibdan joy olib, gol ham urdi. Aslida Martina Rotterdamda tug'ilgan, ammo 2011 yildan buyon Kyurasao termasi sharafini himoya qilyapti. Ushbu mamlakatning Niderlandiya Qirolligi tarkibiga kirishi, lekin mustaqil boshqaruv tizimiga egaligini ta'kidlash o'rinli.
Ruel Foks - Montserrat
1992 yilning 15 avgust kuni yangitdan shakllantirilgan premer-liganing ilk o'yinlari o'tkazilgan. Aynan o'sha sanada Karib dengizidagi kichik orol-mamlakat - Montserrat vakili ham turnirda gol urgan. Umuman, ushbu orol Buyuk Britaniyaning dengiz atrofi hududi maqomiga ega. Foksga kelsak, u o'sha vaqt «Norvich» uchun o'ynardi, keyinchalik «Nyukasl» va «Tottenxem» sharafini ham himoya qildi. 90-yillarda APLni oz-moz kuzatgan muxlislar pakanagina (bo'yi atigi 170 santimetr), lekin tezkor va juda chaqqon, texnikasi yuqori bo'lgan ushbu vingerni yaxshi eslashsa kerak. Darvoqe, Ruel aslida Angliyada tug'ilgan va butun faoliyatini tumanli o'lkada o'tkazdi. Hattoki, Angliya terma jamoasi safida ham 1-2 marta maydonga tushdi. 36 yoshida esa kutilmaganda, Montserrat milliy jamoasida o'ynashga qaror qildi. Eng e'tiborlisi, u bu termada o'ynovchi - bosh murabbiy edi.
Bobbi Bouri - Sent-Kits va Nevis
Deyarli butun faoliyati davomida quyi ligalarda to'p surgan va faqat 2 mavsum elitada «Kristal Pelas» sharafini himoya etgan yarim himoyachi. Xususan, 1992|1993 yillar mavsumi nafaqat Bouri, balki premer-liga uchun ham tarixdagi birinchisi edi. Bobbi o'zining APLdagi yagona golini aynan o'sha, birinchi chempionatda rasmiylashtirgan. Bu esa hozirgacha Karib dengizidagi yana bir mitti orol-mamlakat - Sent-Kits va Nevis vakillari uchun yagonaligicha qolyapti. Umuman, Bouri 2000 yili bu mamlakat milliy jamoasida 1-2 marta maydonga tushgan, xolos.
Manushu - Angola
Bebe emas, lekin Aleks Fergyusonning yana bir ekzotik transferi. Xullas, ko'pni ko'rgan murabbiy 2008 yili angolalik notanish hujumchini «MYu»ga olib kelgandi. O'shanda ko'p shov-shuv ko'tarilgandi, biroq mo''jiza ro'y bermadi: Manushu «qizil iblislar» safida atigi 2 marta maydonga tushgach, uning uchun ijara «sayohat»lari boshlandi. Angolalik shunday kelishuvlardan birini APLda ishtirok etgan «Xall Siti»da o'tadi. Xullas, Manushu Angliya elit divizionidagi 2ta golini ham shu klubda nishonladi, keyin Ispaniyaga yo'l oldi. U hozirgacha APLda gol urgan yagona angolalik bo'lib turibdi. Vaholanki, Afrikaning ushbu mamlakatida futbolga jiddiy e'tibor qaratilmoqda, ammo harakatlar uncha samara berganicha yo'q.
Shon Gouter - Bermud orollari
XX va XXI asrlar almashinuvi vaqti «Manchester Siti» bunchalik boyib ketishini hali tasavvur ham qilolmasdi va 2ta divizion orasida sargardon edi. Klub hattoki, Bermud orollari kabi o'lkalardan tashrif buyurgan hujumchilar xizmatidan foydalanishga or qilmasdi. Gouter etarlicha gol urgan, ammo asosan ikkinchi divizionda (o'sha payt birinchi liga deb yuritilardi). Lekin elitadagi statistikasi ham chakki emas: 2ta mavsumda 13ta gol urgan. Xullas, Shon shu natijasi o'laroq, nafaqat o'zi, balki jonajon mamlakati nomini ham APL tarixiga bitib qo'ydi. Asosiysi, Gouter ushbu maqolada zikr etilgan ko'plab qahramonlardan farqli ravishda, aynan Bermudda tug'ilgan, ulg'aygan va yashagan. Bermud orollari - Buyuk Britaniyaning Atlantika okeanidagi dengiz atrofi hududi. Eng diqqatga sazovor tomoni, Shon keyinchalik AQSh va Angliyada o'qishga urindi, qolaversa, 90-yillar oxirida «MYu»dek klub skautlarini o'ziga qaratdi. Ammo unga «qizil iblislar» safida loaqal bir marta maydonga tushish nasib etmadi. Nima bo'lgan taqdirda ham, bermudliklar Shon bilan faxrlanishsa, arziydi. Zero, u «shaharliklar» sharafini munosib himoya qilgan.
Titi Kamara - Gvineya
«Liverpul»ning 25 yoshdan katta muxlislari ushbu o'ziga xos hujumchini hali ham esdan chiqarishmagandir... Vaholanki, gvineyalik futbolchi «qizillar» safida atigi bir mavsum o'ynadi, xolos. To'g'ri, shu birgina mavsum davomida 33ta uchrashuvda qatnashib, 8ta golga mualliflik qildi. Ke-yinchalik Titini «Vest Xem»ga sotishdi, ammo Londonda uning ishlari uncha yurishmadi. Titi Gvineyada tug'ilgan va bir necha yil davomida shu mamlakat milliy jamoasi libosini sharaf bilan kiydi. Qolaversa, ma'lum muddat ushbu jamoaga ustozlik ham qildi, shuningdek, o'z mamlakatida hattoki, sport vaziri lavozimida ishladi.
Davomi InterFUTBOL gazetasi blogida.
— deya xabar beradi uff.uz nashri.