Qatar poytaxti Doha shahrida boks bo'yicha kattalar o'rtasida o'tkazilgan jahon chempionati yakunlandi. O'zbekiston Milliy Olimpiya Qo'mitasi rasmiy sayti Olympic.uz JCh yakunlarini sarhisob qildi.
Mazkur jahon chempionatida dunyoning 69 davlatidan kelgan 243 nafar sportchi 10 vazn toifasida sovrinli o'rinlar hamda 2016 yili Rio-de-Janeyro shahri (Braziliya)da o'tkaziladigan XXXI yozgi Olimpiada o'yinlarining 23 ta yo'llanmasi uchun kurash olib bordilar.
E'tiborlisi, jahonning etakchi charm qo'lqop ustalari ishtirokida o'tkazilgan musobaqada O'zbekiston terma jamoasi a'zolari 6 ta medal hamda 4 ta Olimpiya yo'llanmasini qo'lga kiritib, O'zbekiston sportchilari hech kimdan kam emasliklari va kam bo'lmasliklarini amalda yana bir bora isbotladilar. Shu o'rinda ta'kidlash lozimki, 1993 yildan buyon jahon chempionatlarida mustaqil jamoa sifatida ishtirok etib kelayotgan boks bo'yicha O'zbekiston terma jamoasi bir chempionatda 6 ta medalga sazovor bo'lmagan.
Hamyurtlarimiz medallar soniga ko'ra Kuba terma jamoasidan so'ng ikkinchi, umumjamoa hisobida esa 7-o'rinni band etdilar. Umumjamoa hisobida 4 ta oltin, 2 ta kumush va 1 ta bronza medaliga sazovor bo'lgan Kuba vakillari birinchi, 2 ta oltin hamda bittadan kumush va bronza medalini qo'lga kiritgan rossiyaliklar ikkinchi, bittadan oltin va kumush hamda 2 ta bronza medaliga sazovor bo'lgan Ozarbayjon terma jamoasi uchinchi o'rinni egalladi. Bittadan oltin, kumush va bronza medaliga ega bo'lgan irlandiyaliklar to'rtinchi, bittadan oltin medalni qo'lga kiritgan Frantsiya hamda Marokash terma jamoalari beshinchi va oltinchi o'rinlarni band etdilar. Kuchli o'nlikdan, shuningdek, Qozog'iston (8-o'rin), Xitoy (9-o'rin) va Ukraina (10-o'rin) terma jamoalari joy oldilar.
Umuman jahon chempionatida ishtirok etgan 69 davlatdan 18 tasiga sovrinli o'rinlarni qo'lga kiritish nasib etdi. Shundan olti davlat vakillarigina oltin medalga sazovor bo'ldilar.
Ushbu jahon chempionatida yangidan-yangi nomlar ham kashf etildi. Quvonarlisi, jahon chempionatida ilk bor sovrinli o'rinlarni qo'lga kiritgan sportchilarning besh nafarini O'zbekiston terma jamoasi a'zolari tashkil qildi. Bu ham o'z navbatida O'zbekiston boks maktabida yangidan-yangi iqtidorlar kamolga etayotganligidan darak beradi. Umid qilamizki, jahon chempionatida boshlangan zafarli odimlar Olimpiada o'yinlarida ham davom etadi.
Shunday qilib, finalga qadar kechgan janglarni mag'lubiyatsiz o'tkazgan Murodjon Ahmadaliev (-56 kg), Fazliddin G'oipnazarov (-64 kg) va Bektemir Meliqo'ziev (-75 kg) jahon chempionatining kumush medallari bilan taqdirlangan bo'lishsa, Elnur Abduraimov (-60 kg), Elshod Rasulov (-81 kg) va Bahodir Jalolov (+91 kg) bronza medali sohibi bo'ldilar.
2016 yilgi Olimpiada o'yinlarining yo'llanmalariga Murodjon Ahmadaliev (-56 kg), Elnur Abduraimov (-60 kg), Fazliddin G'oipnazarov (-64 kg) va Bektemir Meliqo'ziev (-75 kg) sazovor bo'ldilar.
Hamyurtlarimiz jahon chempionati davomida Kuba, Rossiya, Italiya, Qozog'iston, Tailand, Hindiston, Turkiya, Gruziya, Frantsiya, Irlandiya, Jazoir, Yangi Zelandiya, Mo'g'iliston, Venesuela va Iordaniya kabi 15 davlat vakillarini engishga muvaffaq bo'ldilar.
Xususan, Tailandning uch nafar, Qozog'iston, Italiya, Jazoir va Yangi Zelandiya terma jamoalarining ikki nafardan, Kuba, Rossiya, Irlandiya, Mo'g'iliston, Turkiya, Venesuela, Hindiston, Frantsiya, Iordaniya va Gruziya terma jamoalarining bir nafardan sportchisini mag'lub etishdi.
Jahon chempionati bahslarida muvaffaqiyatli ishtirok etgan O'zbekiston terma jamoasi a'zolari 18 oktyabr kuni Toshkent vaqti bilan soat 01:30da Vatanimizga qaytib keladilar.
Ma'lumot uchun. Boks bo'yicha 2017 yilgi jahon chempionati Germaniyaning Gamburg shahrida o'tkaziladi. Shavkat Jalilov
Manzil: O'zbekiston Milliy Olimpiya qo'mitasi matbuot xizmati
— deya xabar beradi uff.uz nashri.