Xabaringiz bor, biroz vaqt muqaddam Uff.uz orqali o'zbekistonlik hakam Ravshan Ermatov Qozog'iston Superkubogi bahsini boshqarishi xabar qilingan edi. Bugun O'zbekiston futbol federatsiyasi rasmiy saytida ham bu haqida ma'lum qilindi.
Xabarda aytilishicha, Shveytsariyaning Tsyurix shahrida bo'lib o'tgan FIFAning navbatdan tashqari Kongressida O'zbekiston Futbol Federatsiyasi bosh kotibi Sardor Rahmatullaev hamda Qozog'iston Futbol Federatsiyasi bosh kotibi Azamat Aytxojin o'rtasida uchrashuv bo'lib o'tdi.
Mazkur uchrashuv davomida ikkala federatsiya bosh kotiblari ikki tomonlama o'zaro hamkorlik aloqalarini mustahkamlash, shuningdek, mazkur hamkorlik doirasida bir qator loyihalarni amalga oshirish borasida kelishuvga erishdilar.
Ushbu uchrashuvdan so'ng esa, hamkorlik doirasidagi loyihalardan biri sifatida o'zbekistonlik FIFA referisi Ravshan Ermatov 8 mart kuni Astana shahrida bo'lib o'tdagan Qozog'iston Superkubogi uchun uchrashuvni boshqarib borish uchun taklif oldi.
Ma'lumot uchun, Qozog'iston Superkubogi uchun uchrashuvda Qozog'iston poytaxti Astana shahridagi "Astana Arena"da "Astana" hamda "Qayrat" klublari o'zaro o'ynaydilar.
Shuningdek, mazkur loyihaga ko'ra, tashrif davomida Ravshan Ermatov Astana shahrida qozog'istonlik yosh referilar uchun seminar o'tkazishi rejalashtirilgan.
Ta'kidlash joiz, o'tgan yil yakunlariga ko'ra "GlobeSoccer" talqiniga ko'ra dunyoning eng yaxshi hakami deb topilgan Ravshan Ermatov, bungacha uch marotaba Qozog'iston terma jamoasining Qirg'iziston, Ummon hamda Burkina-Faso terma jamoalariga qarshi o'tkazgan uchrashuvlarda hakamlik qilgan.
— deya xabar beradi uff.uz nashri.