Sport – bu avvalo sog'lom avlod, sog'lom kelajak deganidir.
Binobarin, sog'lom xalq, sog'lom millatgina buyuk ishlarga qodir.
Islom Karimov “Sog'lom avlodni tarbiyalash – buyuk davlat poydevorini, farovon hayot asosini qurish deganidir”. Sog'lom avlod so'zlari onalik hamda bolalikni muhofaza qilish, aholi salomatligini mustahkamlash, yosh avlodni ma'naviy va jismoniy tarbiyalash, ularda Vatanga muhabbat tuyg'usini shakllantirishda asosiy yo'nalishni belgilab beradi.
Joriy yilning 11 fevral kuni Prezidentimiz Islom Karimov raisligida Oqsaroyda O'zbekiston bolalar sportini rivojlantirish jamg'armasi Homiylik kengashining yig'ilishi bo'lib o'tgandi. Unda mamlakatimizda bolalar sportini rivojlantirishda erishilgan qator muvaffaqiyatlar haqida so'z yuritilgan edi. Yig'ilishda bugungi kunda mamlakatimizda sport – sog'lom avlod, sog'lom kelajak shiori ostida bolalar sportini rivojlantirish bosh maqsadimizga aylanganligi alohida tilga olingandi.
Biroq, ba'zida bu shiorga amal qilmay, ayrim hollarda boshqa bir manfaat sabab tayyor qurilgan sport maydonchalari yo'q qilinmoqdaki buning sababini qaerdan qidirishni bilmaysan kishi.
Istiqlol yillarida yoshlarni sportga jalb etish maqsadida zamonaviy sport inshootlari barpo etilayotgan bir vaqtda Samarqand shahridagi “O'rikzor” hamda “Amir Temur” mahallalari o'rtasida joylashgan futbol maydonining buzib tashlanayotgani kishini taajjubga soladi. Salkam yarim asrdan buyon mazkur mahalla bolalarining sevimli maskaniga aylanib qolgan futbol maydonini buzishga va uning o'rniga ko'p qavatli uy qurish uchun ruxsat bergan shahar hokimligi mutasaddi xodimlari nahotki sog'lom avlodni tarbiyalash bosh maqsadimiz ekanini hamon tushunib etmagan bo'lsa?!
O'zbekiston Respublikasining “Jismoniy tarbiya va sport to'g'risida”gi qonunining 20-moddasida “Ta'lim muassalarini, turar joy dahalarini zarur jismoniy tarbiya-sog'lomlashtirish va sport inshootlarini majmuini barpo etmagan holda qurish va qayta qurishga, shuningdek jismoniy tarbiya-sog'lomlashtirish va sport inshootlarini, shu hudud doirasida ularga teng inshootlarni barpo etmasdan turib, tugatishga yo'l qo'yilmaydi”, deb belgilab qo'yilgan.
Ammo SAM GARNET STROY MONTAJ ixtisoslashtirilgan ta'mirlash-qurilish xususiy korxonasi tomonidan futbol maydonchasi o'rniga ko'p qavatli bino qurilishiga 2015 yilning 19 avgustida Samarqand shahar hokimi tomonidan ruxsat berilgan. Savol tug'iladi. Mamlakatimizda bolalar sportini rivojlantirish, yoshlarni ommaviy sportga jalb etgan holda sog'lom turmush tarziga etaklash eng asosiy maqsad bo'lib turgan vaqtda nahotki shahar hokimligi tayyor holdagi futbol maydonini yo'qotishga ruxsat bergan bo'lsa?! Ajablanarlisi shundaki, qurilishga izn berishdan oldin na shahar hokimiyati va na qurilish kompaniyasi ikkalla mahalla fuqarolarining bu boradagi fikrlarini tinglab ko'rmagan.
Joriy yilning yanvar oyida Samarqand shahar hokimligida shahar xududida voyaga etmagan bolalar o'rtasida sodir bo'layotgan jinoyatlarga bag'ishlangan yig'ilish bo'lib o'tdi. Yig'ilishda ishtirok etgan shahar hokimi Akbar Shukurov yoshlar o'rtasida sodir bo'layotgan jinoyatchilikni keskin tanqid qilib, bu borada yo'l qo'yilayotgan kamchiliklar xususida alohida to'xtalib, o'z vazifasiga mas'uliyatsizlik bilan yondoshayotgan rahbarlarni keskin tanqid qilgandi. Qiziq, yig'ilishda jinoyatchilikni oldini olish borasida bong urib gapirilib, kamchiliklar tanqid qilinmoqdayu, ammo negadir yoshlarni yot g'oyadan saqlash, ularni sog'lom turmush tarzini ta'minlash uchun barpo etilgan butun boshli o'yingohni bir enli qog'ozdagi buyruq bilan buzib tashlashga ruxsat berilmoqda. Bu erda hatto donishmand ham maqsadning mantig'ini topolmasa kerak. Mullani aytganini qilu, qilganini qilma degani shu bo'lsa ajabmas.
Besh mingga yaqin fuqaro istiqomat qiladigan mazkur mahallaning o'yingohida har yili yozda mahalla bolalari o'rtasida futbol bo'yicha turli musobaqalar o'tkazilib kelinadi. Bolalarni sportga jalb etish maqsadida mahalla shirkati bankdan kredit olib, o'yingohni bolalar uchun qayta ta'mirlab bergan. Mahalla faollari keyinchalik o'zaro kelishgan holda sun'iy qoplamali futbol maydonchasi qurishni rejalashtirgandi. Biroq hech kim kutmagan holda bu erga ko'p qavatli uy barpo etiladigan bo'ldi.
SAM GARNET STROY MONTAJ ixtisoslashtirilgan ta'mirlash-qurilish xususiy korxonasi mas'ul xodimiga O'zbekiston Respublikasining “Jismoniy tarbiya va sport to'g'risida”gi qonuni, shuningdek mamlakatimiz Prezidenti Islom Karimovning talabi asosida bolalar sportini rivojlantirish, yoshlarni ommaviy sportga jalb etish orqali ularni turli xil oqimlardan asrash maqsadimiz bo'lib turgan vaqtda nega tayyor o'yingohni buzayotganini bilish maqsadida murojaat qildik. Afsuski, tashkilot mas'ul xodimi bizga bu holatni izohlab berishni o'ziga maqul ko'rmadi.
Shu yil 4 fevral kuni xalq deputatlari Toshkent viloyati Kengashining navbatdan tashqari sessiyasida Yurtboshimiz Islom Karimov “Men bir fikrni ko'p marta aytganman va uni bugun ham takrorlashga majburman: qaerdaki rahbarlar o'z zimmasidagi mas'uliyatni unutsa, qaerdaki ishlar o'z holiga tashlab qo'yilsa, o'sha erda ish orqaga ketadi, bundan qancha-qancha odamlar zarar ko'radi, eng yomoni, aholining joylardagi hokimiyat idoralariga ishonchi yo'qoladi”, deb ta'kidlagandi. Shuningdek, har bir rahbar – u qaysi vazifada ishlashi, qaysi bo'g'inni boshqarishidan qat'i nazar, avvalambor o'zining manfaati bilan emas, odamlarning dardu tashvishlari bilan yashashi, ularni qiynayotgan muammolarni echish haqida chuqurroq o'ylashi, uzoqroqni ko'rishi va jamoatchilikni o'z ortidan ergashtirish uchun ularning ishonchini qozonishi kerak, deya aytib o'tgandi.
Ammo “Amir Temur” va “O'rikzor” mahalla faollari tayyor o'yingohni saqlab qolish maqsadida shahar hokimiyati va boshqa mutasaddi tashkilot rahbarlarga ko'p bora murojaat qilishgan. Biroq ular qaerga murojjat qilishmasin masala qurilish tashkiloti foydasiga hal bo'lib kelmoqda. Sababi oddiy. Joyni hatto kelib ham ko'rmagan, mahalla fuqarolarining dardiga quloq solmagan shahar hokimining qarori.
Tayyor sport maydonchasining yo'qolishi muammoning bir bo'g'ini bo'lsa, uning o'rniga qad rostlayotgan ko'p qavatli uy ham keyinchalik qator muammolarni keltirib chiqarishi mumkin. SAM GARNET STROY MONTAJ ixtisoslashtirilgan ta'mirlash-qurilish xususiy korxonasi tomonidan qurilayotgan uy yon atrofdagi ko'p qavatli uylarda favqulotda vaziyat yuzaga kelganda, xususan yong'in sodir bo'lganda, tez tibbiy yordam va boshqa hollarda qutqaruv mashinalarining kirishi birmuncha qiyinlashadi. Zilzila paytida hamma chiqadigan ochiq joy, marakalar o'tkaziladigan maydon mahallalar aholisining hayotini mushkullashtiradi.
2015 yilda Samarqandda bolalarni sportga jalb etish maqsadida 40 ta sport sog'lomlashtirish inshooti qurilgan bo'lsa, joriy yilda 45 ta yana shunday sport inshootlarini barpo etish rejalashtirilgan.
Davomi Farhod Norbo'taev blogida.
— deya xabar beradi uff.uz nashri.