Lot deb nimaga aytilishini ko'pchilik yaxshi bilsa kerak. Men ijozatingiz bilan bu so'zning ma'nosidan bexabarlarga tushuntirib o'tsam. Kimoshdi savdosida sotuvga qo'yilgan buyumlar bor-ku, masalan, Bekxemning "MYu"dagi futbol kiyimidan tortib, Noyerning EChL finalida kiygan qo'lqopigacha, o'shalar kimoshdi savdosi vaqtida nomi emas, balki raqami bilan aytiladi: birinchi lot, ikkinchi lot… Savdo ishtirokchilariga esa oldindan qaysi raqamdagi lotga nima qo'yilgani, ularning tavsifi keltirilgan bukletlar ulashiladi. Xo'sh, Ronalduning bunga nima aloqasi bor deyapsizmi? Shoshilmang. Maqolani o'qish davomida buni o'zingiz tushunib olasiz.
Ronalduning Madriddan ketishi ehtimoli har qachongidan-da yuqori bo'lib turibdi. Bunga ishonch hosil qilish uchun mish-mishlarning ortidan quvish shart emas. Ha, Ramos va Ronaldu klub prezidenti Florentina Peresdan o'zlarini transferga qo'yishni so'rashgani haqida xabarlar tarqalgani rost. Garchi bu xabarning manbasi shubhali bo'lsa-da, portugaliyalik o'z intervyularida goh "Real"da zerikkani va "MYu"dagi davrlarini qumsayotganini, goh o'zini boshqa chempionatda sinab ko'rish istagi borligini aytib keladi.
"Atletiko"ga yutqazishganidan so'ng nihoyat shu paytgacha ichiga yutib yurgan gaplarini sirtiga chiqardi: "Qirollik klubi"ning muvaffaqiyatsiz natijalarida jamoadoshlarini aybladi. Bu allaqachon hamma bilib bo'lgan voqea, shu bois uning tafsilotlariga to'xtalib o'tirishdan ma'no yo'q. Biroq Krishtianuni hech kim na jamoadoshlari, na ishqibozlar va na OAV tushunishganini qistirib o'tish kerak. Shu sababli dastavval uning so'zlariga boshqacha tus bergan gazeta tahririyatiga qo'ng'iroq qilishga, keyin esa mashg'ulot chog'ida jamoadagi sheriklariga mutlaqo boshqa narsani nazarda tutganini isbotlashga to'g'ri keldi. Vaziyatni bosdi-bosdi qilishdi. Hozir Krishtianu tiliga erk berayotgani yo'q (ammo baribir shaxsiy statistikasini eslatishdan o'zini tiyolmayapti), biroq uning o'shanda "faqat jamoadoshlarining jismoniy tayyorgarligini nazarda tutgani" haqidagi gaplariga ishonish qiyin.
Ronaldu va "Real": suluv arazmi, sovuqchilik?
Darvoqe, klub va futbolchi o'rtasidagi munosabatlarning sovuqlashganiga ancha bo'lgan. Karlo Anchelotti bo'shatilganda Ronaldu umrida birinchi marta qabul "Reala"dagi voqealar rivojidan noroziligini bildirgan edi. U darhol murabbiyning yonini olgan va haligacha uni ma'nan qo'llab keladi. Oxirgi marta dekabrda Anchelotti yilning eng yaxshi murabbiyi ekanini aytib, uning qo'l ostida o'tkazgan damlarini sog'inayotganini bildirgan edi. Ochiqdan-ochiq intervyusida "Real"da murabbiyning tez-tez o'zgartirilishidan mamnun emasligini" ham aytgan edi. Shunisi qiziqki, Ronalduning Benetis haqidagi ikki xil (bir-biriga zid) fikrlaridan alohida bir maqola yaratish mumkin. Umuman olganda, ular chiqisha olishmagani kunday ravshan masala. Bu borada esa Krishtianu yolg'iz emas. Benetis jamoadagi ko'p yulduzlarining ko'ngliga yo'l topolmadi.
Zayniddin Zidan bilan vaziyat biroz yaxshidek. Frantsuz Ronalduning parolini bilishini ko'rsatdi, bosh murabbiy sifatida ish boshlagan kuniyoq portugaliyalikni jahonning eng yaxshi futbolchisi deb aytdi. Birmuncha vaqt hammasi reja bo'yicha ketayotgan edi, lekin "Atletiko" bilan bo'lib o'tgan derbidagi mug'lubiyatdan so'ng va natijada chempionlik poygasidan chiqib ketishgach, portugaliyalik yulduzning asablari dosh bermadi. Umuman olganda, gol urish mumkin bo'lgan 2 ta vaziyatni ko'kka sovurigani uchun muvaffaqiyatsizlikda eng avvalo o'zini ayblashi adolatliroq bo'lardi. Ammo buning o'rniga Kovachich, vaskes va boshqalarning familiyasi tilga olindi.
Krishtianu "Real"dagi muammo haqiqatan ham jamoaning darajasi bilan bog'liq deb hisoblasa nima bo'ladi? U holda matbuotga va hamkorlarga izoh berish bilan ish bitmaydi. Bu bilan uning fikri o'zgarib qolmaydi. Bunday vaziyatda unda yagona yo'l — boshqa klubga o'tish qoladi. Ispaniyada ayni paytda "Barselona"ning hukmronligiga barham berish, menimcha, amalga oshirib bo'lmas vazifa. Biroq boshqa chempionatda boshqa jamoa bilan Ronaldu sovrinlarga muntazam ega bo'lishi mumkin.
Nafaqat murabbiy, balki klub prezidentiga ham qarshi bosh ko'tarishi mumkin bo'lgan o'yinchini jamoada ushlab turishning "Real"ga ham keragi yo'q. "Qirollik klubi"da Peres nimani xohlasa, "Real" ham shuni xohlashi shart. Shu bois mazkur vaziyatda tomonlarning istagi to'la mos kelishi mumkin. Aytgancha, UEFAning cheklovidan hech qayoqqa qochib bo'lmaydi: "Real" ustalik bilan ana shunday qaror ustidan rasman arz qilgan edi. Transfer cheklovi yozgi transfer oynasi ochilishi bilan kuchga kirishi haqiqatga ancha yaqin. Bunday vaziyatda yozda madridliklarni global yangilanish kutmoqda — ham zaxira o'rindig'ini, ham asosiy tarkibni. Top-yulduzlarni sotishning ayni vaqti.
Boshqa jamoaga o'tish yo'lidagi to'siqlar
Ronaldu o'ziga yangi jamoa tanlar ekan, bir qancha qiyinchiliklarga to'qnash keladi. Ayni paytd u 31 yoshda va u jamoa manfaatlaridan ko'ra shaxsiy yutuqlari haqida ko'proq o'ylaydigan mashhur o'yinchi. Yana bir paradoks: Ronaldu sayyoramizning eng kuchli futbolchilaridan biri bo'lishiga qaramay, uning jamoaga kelishi mutlaqo hech narsa (chempionlik, sovrinlar)ni kafolatlamaydi. Qolaversa, uning transferi uchun otning kallasiday pulni to'lashga qodir bo'lgan klublar unchalik ham ko'p emas. Biroq kamsonli bo'lsa-da, ana shundaylar bor.
Davomi Tafsilot.Uz blogida.
— deya xabar beradi uff.uz nashri.