O'tgan mavsumni Namanganning «Navbahor» klubida o'tkazgan iqtidorli yarim himoyachi Robbim Hasanov joriy yilgi chempionatni «Andijon»da boshlashga yaqin turibdi. Vaholanki, u mavsumga tayyorgarlikni Jizzaxning «So'g'diyona» klubida olib borayotgandi.
Biz ushbu futbolchining nima sababdan vodiyga qaytganini bilish maqsadida intervyu uyushtirdik. Mazkur suhbat davomida Hasanovning faoliyati va qiziqishlariga taalluqli boshqa savollarga ham javob oldik.
- Millionlar o'yiniga kirib kelishingiz qanday ro'y bergan.
- Amakim Ravshan aka futbolni tanlashimga katta hissa qo'shgandilar. Dastlab Yangierdagi futbol maktabida Faxriddin Jabborovdan saboq olganman.
- «Navbahor»dan ketishingizga nima sabab bo'ldi?
- Shartnomam yakuniga etgach, o'zimga boshqa jamoa izlashni ma'qul ko'rdim.
- Yangi mavsumga «So'g'diyona»da tayyorgarlik ko'rayotgandingiz, ammo jizzaxliklar bilan shartnoma imzolamadingiz...
- Yil boshidan beri 3-4ta klubdan taklif tushdi. Ular orasida «So'g'diyona» varianti ma'qulroqdek ko'ringandi. Lekin keyinchalik Baxtiyor Ashurmatovning takliflaridan so'ng faoliyatimni «Andijon»da davom ettirishga qaror qildim.
- Nima deb o'ylaysiz, Namanganda raqobatbardosh jamoani shakllantira olgan Baxtiyor A'zamovich «Andijon»da ham ijobiy o'zgarishlar qila olarmikan?
- Albatta, andijonliklar yangi mavsumda oliy ligada jon saqlab qolish emas, balki yuqori o'rinlarni egallashni maqsad qilishgan. Tarkibda asosan yoshlar jamlanganiga qaramay, bu galgi chempionatda kerakli natijalarga erishib, mahalliy muxlislarni xushnud etmoqchimiz.
- Yangi klubga moslashish murakkablik tug'dirmadimi?
- Qisqa fursat ichida jamoadoshlarim bilan til topishib ketdik. Moslashish jarayoni qiyin kechmadi. Chunki aksariyat futbolchilarni avvaldan taniyman, bir jamoada to'p surganmiz.
- Boshqa mamlakatlar chempionatini ham kuzatib borasizmi?
- Albatta. Ayniqsa, Angliya premer-ligasi klublarining o'yinini maroq bilan tomosha qilaman. Ular ichida «Manchester Yunayted»ga ishqim baland.
- Futbolchi rivojlanish yo'lida, eng avvalo, nimalarga e'tibor qaratishi kerak?
- Tinimsiz mehnat - muvaffaqiyat garovi, o'z ustida ko'proq ishlaganlar o'sishga erishadilar. Shundagina qaysi jamoada o'ynashidan qat'iy nazar, raqobatni enga oladigan futbolchi bo'lib etishish mumkin.
- Futbolni tanlashingizga oila azolaringiz qanday munosabat bildirishgan?
- Rostini aytsam, onam qarshi chiqqandilar. «Mash'al» safida 1-ligada o'ynab yurgan paytlarim elkamdan jarohat olganimdan so'ng, oila a'zolarim maydonga qaytishimga ruxsat berishmagan. Lekin futbolga bo'lgan kuchli muhabbat boshqa kasbni tanlashimga to'sqinlik qildi.
- Qilgan mehnatingizga yarasha maosh to'lanmasa qay ahvolga tushasiz?
- Hozirgacha pul borasida umuman nolimaganman. Lekin baribir, siz aytgan holat ro'y bersa, alam qiladi. Millionlar o'yini ixlosmandlarining aksariyati «Futbolchilar katta maosh oladi», deyishadi. Ammo mehnatimiz ham shunga yarasha og'ir va mas'uliyatli ekanini unutmaslik lozim.
- Mabodo, futbolchi bo'lmaganingizda, qaysi kasbni tanlardingiz?
- To'g'risi, hayotimni futbolsiz tasavvur qila olmayman. Shu bois, boshqa soha haqida mutlaqo o'ylamaganman. Oilada kenja farzandman, opa-akalarimning barchasi oliy ma'lumotli. Men ham Guliston Davlat universiteti talabasiman.
- Bo'sh vaqtlarda nimalar bilan shug'ullanasiz?
- Ko'proq oila davrasida bo'laman. Tabiatan bolajonman, jiyanlarim bilan hovlida to'p tepamiz. Dam olish kunim ular uchun bayramdek o'tadi. Shuningdek, xorijiy filmlarni tomosha qilaman.
- Sportning boshqa turlariga ham qiziqasizmi?
- Ha, suzish va boksga befarq emasman. Suv sporti bilan shug'ullanishni kun tartibimga kiritganman. Boks tomosha qilish esa jonu dilim. Ayniqsa, jang yakunlanganidan keyingi holatlar hayajonli tarzda kechadi: hozirgina jon-jahdi bilan mushtlashgan bokschilar yakunda bir-birlarini samimiyat ila qutlashadi.
- Mag'lubiyatdan so'ng qanday ahvolga tushasiz va bu holat qancha davom etishi mumkin?
- Tabiiyki, yutqazganimizda jahlim chiqadi. Yolg'iz o'zim ko'chada sayr qilaman. O'sha kuni uyqum kelmaydi. Ertasiga esa bir kun avvalgi noxush holatni unutishga urinaman. Chunki tushkunlikdan tezroq chiqib ketilmasa, mazkur holat keyingi uchrashuvda ham mag'lubiyatga etaklashi hech gap emas.
- Muxlislarga tilaklaringiz...?
- Avvalgi mavsumlarda namanganlik ishqibozlar bizni har qanday vaziyatda ajoyib tarzda qo'llab-quvvatlashdi, ularga alohida minnatdorchilik bildirib o'tsam.
Akmal Eshonxonov blogidan olindi.
— deya xabar beradi uff.uz nashri.