Televideniyadagi bir sharhlovchimizning(ismini aytmaganim ma'qul) uchrashuvni: - “Hurmatli, futbolsevar do'stlar”-deya boshlashi menga erish tuyuladi. Chunki, bu aynan rus mutaxassislari tomonidan aytiladigan - “Dorogie lyubiteli futbola”  so'zining aynan tarjimasidir. Bu noto'g'ri! Murojaatni biroz o'ylanib o'zimizni tilga o'girsak, “lyubiteli futbola” – “futbol ishqibozlari” bo'lib chiqsa kerak.
Masalan: san'atni, muzqaymoqni, atirgulni, yana nimlarnidir yaxshi ko'rsa bo'lar... Qisqasi, futbolga muxlislik qilish, mehr qo'yish mumkindir, lekin uni sevib bo'lmaydi! Vatan, ota-ona, suyukli yor, farzand muhabbat qo'yishga munosib, xolos.
Ayollarimiz futbolga mukkasidan ketgan paytimiz, bizni to'p o'yinidan rashk ham qiladilar. Biz esa to'qson daqiqalik maydon ertagi ta'siridan so'ng yana oddiy hayotga qaytamiz.  
Gapni indallosi, futbol biz uchun – ermak. Ayollarsiz esa hayotni tasavvur etib bo'lmaydi!
Ravshan Hamroz yozgan mana bu she'r munis onalarimiz, go'zal opa-singillarimizga bag'ishlanadi! Bayramingiz bilan!
   
Futbolni sevar, deb sevgilim, yorim,
Rashk qilib, surmang hech yomon hayollar.
Ko'ngilni to'q qiling, bunga ishoning,
Erkaklar sizlarni sevar ayollar!
Yaxshi ko'rish boshqa, sevishdir boshqa,
Muhabbat axir bu buyuk bir tilsim.
Sizni jondan ortiq sevar-u biroq,
Futbolga qiziqsa ayting ne qilsin?
Yoringiz sizniki, olib havotir,
Iltimos, yog'dirmang ming bir savollar.
Yaxshi ko'rsa ko'rar futbolni, biroq,
Erkaklar sizlarni sevar ayollar! Elmurod ERMATOV, Ravshan HAMROZ. Andijon
— deya xabar beradi uff.uz nashri.