“Bunyodkor” – “Neftchi” uchrashuvidan keyin “mikst-zona”da har ikkala jamoa futbolchilari OAV vakillari savollariga javob qaytarishdi.
Akramjon Komilov (“Bunyodkor” himoyachisi) – Bu chempionatdagi birinchi uchrashuv edi. Shu bois o'yin oson o'tdi, deyolmayman. Raqibga o'tgan mavsum yutqazib qo'yganimiz, bizni ikki hissa ishtiyoq va sergak o'ynashimizga turtki bo'ldi. O'yinni tartibli o'tkazdik. G'alaba yo'lida barcha jamoadoshlarim birdek harakat qilishdi. G'alaba qozonish yoqimli. Tezkor gol urib, raqibga bosim o'tkazish rejamizda bor edi. Bu reja ish berdi.
Abbosbek Maxstaliev (“Neftchi” yarim himoyachisi): - Ilk turdayoq kuchli raqibga ro'baro' keldik. Bunday stadionda va kuchli raqibga qarshi o'ynash og'ir. “Bunyodkor” bizgacha Osiyo Chempionlar ligasida uchta uchrashuv o'tkazishga ulgurgandi. Shu boisdan ham ularda o'yin amaliyoti ko'pligi sezildi. Jamoamiz etakchisi Mansur Saidovning yo'qligi albatta bilindi. Uni tezroq safga qaytishini tilab qolaman. Keyingi uchrashuvimiz ham oson bo'lmaydi. Chunki vodiy derbisida “Navbahor”ni qabul qilamiz.
Aleksandr Alempievich (“Bunyodkor” yarim himoyachisi): “Neftchi”ni oson engdik, demagan bo'lardim. Raqib bo'sh o'ynagani yo'q. Shunchaki tezkor gol kiritganimiz qolgan daqiqalarda bizga osonlik tug'dirdi. Odatda musobaqa startidagi g'alaba muxim omil bo'lib xizmat qiladi. Bu keyingi uchrashuvlarda jamoaga qo'shimcha kuch bag'ishlaydi.
Rustamjon Ashurmatov (“Bunyodkor” himoyachisi): - Yaratilgan vaziyatlarimizni golga aylantira oldik. Raqibga esa imkon bermadik. Himoyada ham yaxshi o'yin ko'rsatdik, deb o'ylayman. “Neftchi”ni yutish uchun ularga to'pni bermaslik kerak edi. Biz buni uddaladik. Jamoamizdagi hamma futbolchi asosiy tarkibga loyiq. Shu bois bugungi o'zgarishlar o'yin sifatimizga aslo ta'sir ko'rsatmadi.
Umid Qodirov (“Neftchi” yarim himoyachisi): - Uchrashuvga puxta hozirlik ko'rgandik. Afsuski yo'l qo'ygan xatoimizni raqib kechirmadi. O'tkazib yuborilgan tezkor gol rejalarimizga o'zgartirib yubordi. Bugun bizni bevosita stadionda qo'llab-quvvatlagan “Neftchi” muxlislariga minnatdorchilik bildiraman. Keyingi uchrashuvlarda ularni g'alabalar bilan xursand qilishga harakat qilamiz.
Otabek Shukurov (“Bunyodkor” yarim himoyachisi): - Avvalo yangi chempionat boshlangani bilan futbol muxlislarini tabriklayman. “Bunyodkor”ning bu yilgi maqsadlari ulkan. O'zimiz ishtirok etayotgan barcha musobaqalarda g'olib chiqishni istaymiz. Shunday ekan har qanday uchrashuvlarda g'alaba qozonish kerak. “Neftchi”ni yutganimizdan xursandman. O'z ustimda tinmay mehnat qilib asosiy tarkibdun muqim joy egallashga va jamoam muvaffaqiyatlariga hissa qo'shishga harakat qilaman.
Dostonbek Hamdamov (“Bunyodkor” yarim himoyachisi): - Chempionatning ilk uchrashuvi bo'lgani uchun chiroyli o'yin ko'rsatishga harakat qildik. O'ylaymanki, ko'rsatgan o'yinimiz muxlislarga yoqdi. Biz muhim uch ochkoni qo'lga kiritdik. “Neftchi” yaxshi jamoa. Ularga keyingi uchrashuvlarda omad tilayman.
Alisher Samatov (“Neftchi” himoyachisi): - Biz uchun mavsumning birinchi o'yini bo'ldi. Shuning uchun bizda hayajon sezildi. “Bunyodkor” esa yaxshi va jamoaviy o'yin ko'rsatdi. O'ylashimcha, ular jamoaviy jipslik evaziga g'alaba qozonishdi. Yo'l qo'ygan kamchiliklarimizni ko'rib chiqamiz va boshqa takrorlamaslikka harakat qilamiz.
Eldor Shomurodov (“Bunyodkor” hujumchisi): - Jamoaviy o'yin hisobiga g'alaba qozondik. E'tibor bergan bo'lsangiz, ikki to'p farqi bilan oldinga o'tib olgandan keyin to'pni o'zimizda ko'proq saqlab turishga harakat qildik. Bunday paytda esa hamma jamoadoshlarim muntazam harakatda bo'lishdi. Bu esa biroz charchatgan bo'lishi mumkin. Lekin vaqt o'tishi bilan jismoniy holatimizni ko'tarib boramiz.
— deya xabar beradi uff.uz nashri.