Oliy ligada yangi mavsum start oldi. Har yili chempionat boshlanar ekan, yangi umidlar ham kurtak ochadi. Bu safargisi ham istisno emas. Muxlis xal­qi shiddatli va murosasiz kurash ko'rishni istaydi. Endi yo'lga chiqqan mavsumda bu umidlar qay darajada oqlanishini hozirdan aytish qiyin.
Ammo ilk tur  biz kutganchalik bo'ldi, deyishga asos yo'q. Harqalay,mavsum boshidanoq «sensatsiya» ko'tarishga hech bir klub ishtiyoqmand emas, shekilli, barcha uchrashuvlarda kutilgan natijalar qayd etildi. Asosan mezbonlar g'alaba qozonishdi, mehmonlar esa mag'lublikni tan olishdi. Faqat, bir uchrashuvda maydon egalari imkoniyatni boy berishdi. U ham bo'lsa, chempionlikka da'vogar - «Lokomotiv»ga qarshi kechgan o'yinda...
Bekobod va Qo'qon
1-tur o'yinlari boshlanganini bildiruvchi  hushtak dastavval Bekobod va Qo'qonda chalindi. Aynan shu shaharlardagi o'yinlarga ertaroq start berildi. To'p o'yinga kiritilgan vaqt soat millari 16:00ni ko'rsatib turardi.
Balki shu sababga ko'radir, Bekobodda kechgan «Metallurg» - «So'g'diyona» o'yinini u qadar ko'p muxlis tomosha qilgani yo'q. Chunki uchrashuv ish vaqtiga to'g'ri keldi. Rasmiy ma'lumotlarga qaraganda, o'sha kuni stadionda 1718 tomoshabin yig'ilgan, xolos. Ammo ishqibozlarning kamligi «Metallurg»ning o'yiniga salbiy ta'sir ko'rsatdi, deyish qiyin. Chunki bekobodliklar aytarli muammoga duch kelmadilar va 2:1 hisobida g'alaba qozondilar. Umuman, bu hisobni oldindan taxmin qilish qiyin emasdi va balki aynan shu sababga ko'ra ham, tomoshabinlar stadionga uncha oshiqishmagandir...
Aynan shunday hisob "Paxtakor" stadionida ham qayd etildi. Biroq, bu erda tamoshabinbop o'yin bo'ldi, deyish mumkin. Zero, mezbonlar yuzaga kelgan va bir qator vaziyatlarni ko'kka sovurishmaganida yakuniy hisob yirikroq bo'lishi aniq edi...
Biroq «Qo'qon -1912» - «Obod» bahsi ish vaqtiga to'g'ri kelganiga qaramay, vodiyda muxlislar masalasida muammo sezilgani yo'q. Bu uchrashuvni 6553 ishqiboz kuzatib bordi va «Qo'qon-1912» yagona gol evaziga chempionat karvoniga 3 ochko bilan yo'l ochdi. Demak, muxlis darhaqiqat, o'yin ko'rishni istasa, stadionga borishning yo'lini topar ekan. Xo'sh, unday desak, Bekoboddagi o'yin­da nega ishqibozlar safi qisqa bo'ldi? Bunga sabab nima ekan-a?
IKKIYu NOL ...LAR
Oliy liga doirasidagi 2ta uchrashuv  2:0 hisobida mezbonlar g'alabasi bilan yakuniga etdi. «Buxoro» o'z maydonida «Olmaliq»ni shunday ko'rinishda  enggan bo'lsa, «Bunyodkor» - «Neftchi» bahsi taqdiriga ham bir tomonning 2ta goli oydinlik kiritdi.
Ammo bu uchrashuvlarning o'xshash jihatlari faqat hisob, xolos. O'yin tomonlama qarasak, ular mutlaqo bir-biridan o'zgacha kechdi. Agar «Buxoro» futbolchilari Aziz Asimov hakamlik qilgan o'yinda 2 marta penalti tepish huquqini qo'lga kiritgan va 66-daqiqada Ruslan Melzitdinov, 90+3-daqiqada esa Suhrob Ne'matov yo'llagan aniq zarbalar evaziga g'alabani qo'lga kiritgan bo'lsalar, «Bunyodkor»ning «Neft­chi»ga qarshi bahsda ancha ter to'kishiga to'g'ri keldi. Umuman, farg'onaliklar oxirgi yillarda  «qaldirg'ochlar» uchun ancha noqulay raqibga aylanishmoqda. Sergey Lushan murabbiylik ishini boshlabdiki, shu vaqtga qadar «Neftchi»ni mag'lub etish uddasidan chiqolmagan edi. Agar 2014 yilgi mavsumda farg'onaliklar bilan 2 marta durang qayd etilgan bo'lsa (uyda - 1:1, safarda - 0:0), o'tgan yili o'tkazilgan har ikki uchrashuv ham boy berildi (uyda - 0:1, safarda - 0:2). Shunday ekan, bu safargi qarama-qarshilik «Bunyodkor» uchun katta ahamiyat kasb etardi. Buning bir qator sabablari bor. Birinchidan, «Neftchi»ga qarshi kechadigan o'yinlarga bog'liq qora an'anani to'xtatish kerak bo'lsa, ikkinchidan, mavsumning ilk bahsi har doim muhim hisoblanadi. Sergey Lushan shogird­lari nihoyat, bu vazifani bajarish uddasidan chiqdilar: Bahodir Nasimov hamda Eldor Shomurodovning gollari evaziga g'alabani tantana qildilar.
NAVOIYDA DRAMA
1-turning eng qiziqarli va shu bilan birga eng g'alati o'yinlaridan biri Navoiy shahrida bo'lib o'tdi. «Qizilqum» start chizig'ida «Mash'al»ni qabul qildi va «mega irodali» g'alabani qo'lga kiritdi. Ammo ta'kidlash joiz, bu irodada Ravshan Ermatov tomonidan belgilangan 2ta penaltining ham hissasi ancha katta. Avvaliga muborakliklar Shahboz Erkinovning 2ta goli evaziga yaxshigina ustunlikni ta'minlashdi. Ammo Akmal Rustamov 67-daqiqada hisobni qisqartirgan bo'lsa, keyin Ilhom Yunusov 70 va 88-daqiqalarda penaltilardan unumli foydalanib, «uloq» «Qizilqum»da qolishiga zamin yaratdi.
Qarshidagi Qqrshilik yoxud «Loko»ning yurishi
Qarshida «Nasaf» va «Sho'rtan» o'rtasida kechgan «Voha derbisi»da gollar faqat mezbonlar tomonidan urildi, ammo hisob 2:1 ko'rinishini oldi. Gap shundaki, birinchi bo'limda «Nasaf» darvozasi tomon berilgan zarbadan so'ng   to'p Sherzod A'zamovga tegib, darvoza to'ridan joy oldi va uning hisobiga avtogol yozildi. Ammo «Sho'rtan» bu o'yinda baribir, hech narsaga erisholmadi. Chunonchi, 54-daqiqada g'uzorliklar darvozasi tomon penalti belgilandi. Asosiy vaqt­ning so'nggi qismi o'tib borayotgan pallada esa Ilhom Shomurodov «Nasaf»­ga g'alaba keltirgan gol muallifiga aylandi.
«Lokomotiv»  Namangandagi gollar shousida «Navbahor»ni irodali tarzda taslim etdi. Garchi birinchi bo'limda namanganliklar Oleksandr Pishurning penaltidan urgan gol evaziga hisobda oldinga chiqib olgan bo'lsalarda, ikkinchisida «temiryo'lchilar»  ketma-ket 3 marta aniq zarba quvonchini tuyishdi. «Navbahor» safida  zaxiradan maydonga tushgan Mo'ydin Mamazulunov kiritgan to'p esa namanganliklar uchun shunchaki, ojiz tasalli bo'ldi, xolos. Yakuniy hisob - 2:3.
Davomi InterFUTBOL gazetasi blogida.
— deya xabar beradi uff.uz nashri.