Sport gimnastikasi bo'yicha Olimpiada o'yinlarining g'olib va sovrindori, ikki karra jahon chempioni, hamyurtimiz Oksana Chusovitina joriy yilning 23 oktyabr – 1 noyabr kunlari Shotlandiyaning Glazgo shahrida o'tkaziladigan jahon chempionatida ham munosib ishtirok etib, 2016 yilgi Olimpiada o'yinlariga yo'llanma olishni maqsad qilgan.
Agarda Oksana buni uddalasa u holda ushbu Olimpiada o'yinlari uning faoliyatidagi ettinchisi bo'ladi. Ta'kidlash joizki, sport gimnastikasida bunday muvaffaqiyatga hali hech bir sportchi erisha olmagan.
Hamyurtimiz 1992 – 2012 yillar davomida o'tkazilgan yozgi Olimpiada o'yinlarining barchasida qatnashgan dunyodagi yagona sportchi hisoblanadi.
"Jahon chempionatlarida nechanchi bor qatnashayotganligimni hech qachon hisoblamaganman, - deydi Chusovitina. Glazgoga ham shunchaki ishtirok etish uchun boryapman. 2015 yilgi Jahon chempionati men uchun yakuniy bo'ladimi? Men kelajak haqida bashorat qilishni istamayman. Shuningdek, 2016 yilgi Olimpiyadadan keyin ham o'z faoliyatimni tugatish haqida ham hozir gapirmoqchi emasman. Buni vaqt ko'rsatadi. Hozirda mening yagona maqsadim, Olimpiya o'yinlari yo'llanmasini qo'lga kiritishdir. Olimpiada o'yinlarida ettinchi bor qatnashish mening eng katta orzuyimdir”.
Oksananing so'zlariga qaraganda Glazgoda u to'rt snaryadning barchasida ishtirok etish niyatida. Biz esa o'z navbatida tajribali sportchimizga bo'lajak jahon chempionatida ham omad va zafarlar tilab qolamiz. Shavkat Jalilov
Manzil: O'zbekiston Milliy Olimpiya qo'mitasi matbuot xizmati
— deya xabar beradi uff.uz nashri.