Qit'amizning eng kuchli milliy chempionatlaridan biri sanaluvchi Qatar Yulduzlar Ligasida ertadan 22-tur uchrashuvlari start oladi.
Ta'kidlash joizki, joriy yilgi mavsumni juda ko'tarinki ruhda o'tkazgan “Al Rayyan” jamoasi o'tgan turda ham yirik hisobda g'alaba quchish orqali muddatidan oldin mamlakat chempionligini qo'lga kiritdi. Bu haqda xabar berib o'tgandik.
Yulduzlar Ligasi musobaqa jadvaliga e'tibor qaratadigan bo'lsak, chempion nomi halitdan ma'lum. Lekin chempionat kumush medallari qaysi jamoaga nasib etishini oldindan taxmin qilish ham qiyin. Boisi hamyurtimiz Sardor Rashidov o'ynayotgan Duhaylning “Al Jaish” jamoasi 21 ta uchrashuvdan so'ng 40 ochko bilan ikkinchi pog'onada bormoqda. “Al Rayyan” allaqachon eng yaqin ta'qibchisidan 20 ochkoga ilgarilab ketgan. Lekin 3 va 4-o'rinlarda ketayotgan “Lahviya” hamda “Al Sadd” jamoalari ham 38 va 36 ochkodan jamg'argan holda “Al Jaish”ga kumush medallar uchun raqobat qilishmoqda.
Qatar Yulduzlar Ligasi rasmiy sayti sovrinli o'rinlar uchun kurash olib borayotgan ushbu jamoalar imkoniyatini baholadi va “Al Jaish”ning ustun tarafi sifatida uning kuchli “hujum uchligi”ni e'tirof etdi.
“Al Jaish”ning oldingi chizig'ida 3 ta to'purar futbolchilar – Abdurazzoq Hamedallah, braziliyalik Romarino hamda hamyurtimiz Sardor Rashidovlar harakat qilishmoqda. Diqqatga sazovor jihati shundaki, ushbu triodan kimdir deyarli har bir o'yinda gol kiritmoqda. “Harbiylar” jamoasi sanaladigan “Jaish” hozirgacha bu mavsumda 41 ta gol urgan bo'lsa, shulardan naqd 33 tasini ushbu hujum uchligi vakillari kiritdi. Hamedallah 15 ta va qolgan ikki futbolchi 9 martadan raqib darvozasini ishg'ol etishga muvaffaq bo'lishdi.
Davomi Sports.Uz blogida.
— deya xabar beradi uff.uz nashri.