Iker Kasilyas va uning umr yo'ldoshi, taniqli  ispan jurnalisti Sara Karbonero yaqinda mashhur tele-shou -  En la tuya o en la mia («Menikida yoki senikida»)  mehmoni bo'lishdi.
Ko'rsatuv muallifi Berti Osborn yulduz juftlikdan imkon qadar ko'proq ma'lumot olishga harakat qildi, albatta. Xullas, Iker va Sara o'z hayotlari haqida atroflicha gapirib berishdi: Portuda qanday yashayotganlari, o'sha mashhur bo'sa hamda ikkinchi chaqaloqni kutishayotgani va hokazo... Kasilyas tabiiyki, ko'proq futbolga oid savollar yuzasidan fikr yuritdi.
Bo'lajak farzandlari haqida
Sara: - Ha, ikkinchi farzandni kutyapmiz. Hozir shuning uchun ham o'zimni avaylashga harakat qilyapman. Nasib etsa, may oyi oxirlariga borib, oilamizda ko'payish bo'ladi. Ayni payt o'sha baxtli onlarni sabrsizlik bilan kutyapman.
Iker: - Nima desam ekan... Chaqalog'imiz vaqti soati kelsa, tug'iladi. Agar mavsum yakunlangan payt Ispaniyada dunyoga kelsa, nur ustiga a'lo nur bo'ladi. Ha, Visente del Boskedan xushxabar olishni xohlayman. Agar u meni Evro-2016 «zayavka»siga kiritsa, ba'zi rejalarimizni o'zgartirishimizga to'g'ri keladi. Sizga aytsam, aynan shunday bo'lishiga mutlaqo qarshiligim yo'q.
Sara: - Albatta, shaxsiy shifokorlarimiz nazoratidaman va o'ylaymanki, bu masalada qandaydir muammo tug'ilmaydi. Men ham Iker kabi farzandimizning  Ispaniyada ko'z ochishini istayman, lekin hammasini vaqt ko'rsatadi.
Portu haqida
Sara: - Ayni payt Portuda o'zimizni yaxshi his qilyapmiz. Bu shahar biz avval yashagan joylardan keskin farqlanadi. Birinchidan, Portu ancha tinch va bu erda mutlaqo xotirjammiz. Ikkinchidan, shahar ham, uning aholisi ham ajoyib... Eng muhimi esa, Ispaniyaga yaqinligi. Aynan shunisi biz uchun katta plyus hisoblanadi. Zero, xohlasak-xohlamasak, oilamiz, yaqinlarimiz va do'stlarimizni qo'msaymiz. Portuda yashayotganimiz sabab, ular bilan tez-tez ko'rishish imkoniyati bor.
JCh-2010dagi bo'sa haqida
Iker: - Buning jabrini etarlicha tortdik. Xususan, Saraning beayov tanqidlarga uchragani tabiiyki, menga ham ta'sir etmay qolmadi. Aslida o'sha lahza barchasiga nuqta qo'yish uchun ideal imkoniyat edi. Eng qizig'i shuki, ko'pchilik bizni olqishlaganiga qaramay, Ispaniyaning hozirgi hukmdorlari - Felipe va Letitsiya ro'y bergan voqeadan qattiq xavotirga tushishdi. Vaholanki, bu barchamiz uchun ajoyib yakun bo'lgandi.
Sara: - Men Ikerga doimo bitta gapni takror-takror aytaman: «Sen o'sha bo'sa bilan butun Ispaniyani gangitib qo'yding»  (kuladi). Negaki, u ideal emas, xuddi har birimiz kabi. Nima bo'lishidan qat'iy nazar, men Ikerni sevishda davom etaveraman. Bitta gap: endi uchrasha boshlagan paytimiz u shunday degandi: «Barcha darvozabonlar sal boshqacha bo'lishadi, negaki, ularning maydondagi pozitsiyalari ruhan kuchli tayyorgarlikni talab etadi. Axir kiperlar ortida hech kim yo'q - oxirgi chegara bizniki». Shunga muvofiq, Ikerni hech qachon ortiqcha ayblamayman: «Seni kechiraman, darvozabon».
Ta'tilni qaerda o'tkazishlari haqida
Iker:  - O'ylashimcha, Madrid, Toledo, Avila... kabi shaharlardan birini tanlaymiz. Gap shundaki, ayni payt Ispaniyani rosa sog'inayotganimiz rost va yurtimizga qaytish imkoniyatini aslo qo'ldan chiqarmoqchi emasmiz.
Ikerning ota-onasiga munosabati haqida
Sara:  - O'rtamizda ajoyib munosabat shakllangan. Ochig'i,  Ikerning yaqinlari bilan chiqisholmasligim xususidagi gap-so'zlar qaerdan paydo bo'ladi - buni sira tushunmayman. Misol uchun, avvalgi hafta 3 kun  Madridda yurdik, o'g'limiz Martin bu vaqtni to'laligicha buvasi va buvisi yonida o'tkazdi.
Saraning pazandalik mahorati haqida
Iker:  - Sara taomlarni yuqori did bilan tayyorlaydi. Muhimi, juda mazali... Bas shunday ekan, mening oshxonada vaqt sarflashimga hojat yo'q. Boz ustiga, bu masalada g'oyat no'noqman.
Joze Mourino bilan shaxsiy munosabatlari haqida
  Iker: - Doimo mojarolardan qochishga uringanman, biroq o'zaro gaplashmaslik tufayli noqulaylik bor edi. Go'yoki, biz urush holatida yurgandekmiz... Misol uchun, oxirgi yil davomida bir-birimiz bilan mutlaqo gaplashmaganmiz. Oddiy aytganda, vaziyat o'ta xunuk edi. Yo'q, ko'p hollarda haq bo'lganimni ishonch bilan ta'kidlay olmayman, ya'ni mendan ham xatolar o'tgan. O'zi o'rtamizdagi munosabatlar mavsum - 2012|2013da jamoamiz muvaffaqiyatsiz o'ynagan payt buzilgandi.
Aslida biz yagona kuch sifatida birlashishimiz va umumiy holatni to'g'rilashimiz lozim edi. Biroq 2013 yilning sentyabr - dekabr oylari oralig'ida ko'p narsa o'zgarib ketdi: «Malaga»ga qarshi uchrashuvdan boshlab, zaxira o'rindig'iga mixlandim... Bundan tashqari, meni «Barselona» futbolchilari bilan gaplashishim ham Mourinoga yoqmasdi. Vaholanki, o'sha mashhur voqeada  Xavi va Puyolga  kechirim so'rash uchun qo'ng'iroq qilgan emasdim. Aksincha, agar shunday davom etsak, ispan futboliga zarar keltirishimizni aytganman, xolos...
Davomi InterFUTBOL gazetasi blogida.
— deya xabar beradi uff.uz nashri.