Oldindan kelishaylik, sport olamidan xato qidiradigan bo'lsak, hammasidan topsa bo'ladi. Misol uchun menga penaltilar seriyasi umuman yoqmaydi. O'yinda ikki tomon g'olibni aniqlay olmaganidan so'ng joriy etiladigan qoida... Biroq, butun o'yin hal qila olmagan muammoni ko'p jihati ruhiy holatga bog'liq bo'lgan seriya echib bermasligi kerak. Men shunday hisoblayman.
Ammo mehmonda urilgan gol masalasida fikrim ijobiy. Ijobiyligiga sabab, futbol va gandbol o'yinlaridagi pley-off bosqichi aynan shu jihati bilan-da shiddatliroq o'tadigandek chamamda. Bunday bahslarda o'z uyida o'ynayotgan jamoaning holati bilan mehmonda to'p surayotgan klubning holati bir-biridan farq qiladi. Bu o'zgachalik o'yinga ikki tomonning ikki xil munosabatini yuzaga keltiradi. Murabbiylar ham o'sha o'yinga turlicha yondoshuvlarni amalga oshiradilar. Menga bu turfa xil munosabatlar yoqadi va bu jihat pley-offning eng chiroyli manzaralaridan biri bo'lib tuyulaveradi.
Mehmonda urilgan gol qoidasi masalasida narigi sahifada yozayotgan hamkasbimdan tashqari taniqli shaxslar, xususan Arsen Venger bilan Zepp Blatter o'zlarining e'tirozli chiqishlari bilan tanilganlar. Frantsiyalik mutaxassisga mehmondagi gol qoidasi qachon yoqmay qolgan, e'tibor bering - “Bavariya” bilan kechgan pley-off bahslarida. Qachonki mehmonda 0:2 hisobida engilgan, uyida 3:1ga engib, musobaqadan chiqib ketganida!
Bunaqa paytda har qanday mutaxassis bu qoidaning dushmaniga aylanadi. Tushunaman. Ammo o'sha intervyusida Venger qiziq bir gapni aytgan ekan: “Mehmondagi gol qoidasini o'ylab ko'rish kerak. Axir, Myunxenda gol urish imkonsizligini ko'pchilik biladi-ku. Biz esa, uyimizda o'tkazib yuborgan golimiz tufayligini turnirni tark etyapmiz!”
Sezyapsizmi, Venger o'z intervyusida Myunxenda gol ura olmasligini asosiy ojizligi sifatida baholamoqda. Demak, bu “Bavariya”ning yutug'i. Endi Myunxen klubidagi shu holatga qaraylik. “Bavariya” murabbiyi avvalo o'z uyida gol o'tkazmasligini asosiy qurol sifatida ishlatadi, keyin esa “Arsenal” maydonida iloji boricha bitta gol urishga urinib ko'radi! Bir xil masalada ikki jamoa solishtirilganida, demakki, “Bavariya” aslan “Arsenal”dan kuchliroq va u keyingi bosqichga chiqishga ham haqlidir. Buning o'rniga mabodo penaltilar seriyasi bo'lib qolsa, men aslo rozi emasdimki, u holda kuchsizrog'i penaltini to'g'ri tepa olgani uchungina keyingi bosqichga chiqib ketishi mumkin edi. 
 
Ko'pchilik Milan shahrida o'tkazilgan (2002/2003) “Milan” – “Inter” jamoalari o'rtasida o'tgan ikki o'yinni esga olib, o'sha ikki bahs bitta stadionda kechganligi uchun ham “Milan”ning finalga chiqishi nohaq bo'lganini aytadilar. Bu erda nozik bir masala borki, buni ikki klub vakillari oldindan bilishgan. Qur'a natijasi ularni shunday harakat qilishga mahkum etgan edi. Bu esa, avvalambor, ikki klubning ko'z ilg'amas kelishuvi ham hisoblanadi.
Endi, o'sha ikki uchrashuvni diqqat bilan tomosha qilgan inson sifatida aytamanki, Milan shahri jamoalari garchi bir stadionda o'ynagan bo'lsalar-da, ikki o'yinda turlicha harakat qilishgani yodimda. Ikkinchi o'yinni “uyi”da o'tkazayotganini yaxshi bilgan “Inter” birinchi bahsda nima qilib bo'lsa-da gol urishi lozimligini faxmlagan. Biroq, aynan shu jihatni e'tiborga olgan “Milan” agar shu o'yinda gol urmasa, javob bahsida o'ziga qiyin bo'lishini anglab etgan va shunga yarasha hujumkor futbol namoyish etgan. Bitta golni urganidan so'ng, tabiiyki, asosiy e'tiborni himoyaga qaratgan. Shu ishni yaxshiroq uddalagani uchun “Milan” o'sha yili final yo'llanmasiga haqli edi.
Endi tasavvur qilingki, mehmondagi gol qoidasi yo'q. Milan derbisining ikki o'yini bir-biridan farqli bo'lmasligi turgan gap edi. Chunki ular uchun ikki o'yin o'z uyida o'tayotgan bir xil uchrashuvlarga aylanardi. Faqatgina mehmondagi gol qoidasi tufayligina bir stadionda o'tgan ikki o'yin ikki stadionda o'tgan turlicha o'yinlarga aylangandi o'shanda.
Bu qoidaning yana bir foydali tomoni bor. Har qanday jamoa guruh bahslari yo davraviy turnirlarda asosiy e'tiborni hujumga qaratadi, to'g'rimi? Chunki uyida o'ynayapti, muxlislar qarshisida hujumkor futbol namoyish etgisi keladi. Himoya ikkinchi darajaga tushadi. Biroq, mehmondagi gol qoidasi joriy etilgan pley-off bahslarida mezbon jamoa hujum va himoyaga bir xil e'tibor qaratishga majbur bo'ladi. Ming hujumkor o'yin ko'rsatsa ham, birgina o'tkazib yuborajak goli qimmatga tushishini his qilib o'ynaydi. Bu ham murabbiyga yangi motivatsiya ulashadi.
Yana bir masala. 0:2 bilan 1:3 hisobi ko'rinishidan bir xil natija. Lekin pley-offda ularning taqdiri turlicha kechadi. Mehmonda 3ta to'p o'tkazib yuborgan, ammo bittagina gol urishga muvaffaq bo'lgan klub o'z uyida yaxshiroq natija qayd etishga urinadi. Unga bir hafta oldin mehmonda urgan birgina goli javob bahsidan umid qilishiga yordam beradi. Mana shu tomondan ham, birinchi bellashuvda mehmonda birgina gol urib qaytgan “Chelsi” javob bellashuviga “Zenit”dan farqli o'laroq ancha jiddiyroq hozirlik ko'rgan.
Oxirgi gapim. Futbol bir yarim asrdan beri davom etayotgan ko'xna sport turlaridan biri. Unda uzoq davrlardan beri davom etib kelayotgan ba'zi qoidalari borki, u zoxiran noto'g'ridek ko'rinsa-da, aslida futbolning bezagidir. Demoqchimanki, yarashib turgan sepkildan voz kechishga urinish haqiqiy go'zallikning yo'qolishiga sabab bo'ladi. Xayrulla Hamidov
— deya xabar beradi uff.uz nashri.